އެނދުމަތީގައި އިށީނދެގެން އިނދެފައި ލަމްޔާ މަޑުމަޑުން ތެދުވެގެން ގޮސް ކޮޓަރީގެ ކުޑަ ދޮރު ކައިރި އަށް ހުއްޓުނެވެ. އަދި ދޮރުފަތި ކަހާލުމަށް ފަހު، އަނދިރިވެފައިވާ މަގު މައްޗައް ބަލަން ހުއްޓެވެ.
އޭނާގެ މޫނުގައި އެެއްވެސް ތާޒާކަމެއް އުފާވެރި ކަމެއް ނެތެވެ. ތުންފަތުގައި އަމުދުން ހިނިތުންވުމުގެއްގެ އަސަރު ވެސް ނެތެވެ. ލޮލުން ފޭދުނު ކަރުނަ ތިކިތައް ފޮހެލުމަށް ފަހު، ރިންގްވަމުން ދިޔަ މޮބައިލް ފޯނާ ދިމާ އަށް ލަމްޔާ ފަރުވާ ކުޑަ ގޮތަކަށް ބަލާލި އެެވެ.
އަދި މަޑުމަޑުން ހިނގަމުން ގޮސް އެނދުގެ ސައިޑް ކަބަޑުމަތީގައި އޮތް ފޯނަށް ބަލާލި އެވެ. އެ ކޯލް ނަގާހިތެއް ލަޔްމާ ނުވި އެވެ. ބަދަލުގައިވީ ފޫއްސެވެ. ތަކުރާރުކޮށް ކެނޑިކެނޑިފި އެތައް ފަހަރަކު ފޯން ރިންގްވި އެވެ. އެކަމަކު ލަމްޔާ ހަމަ ބަލަން އިނީ އެވެ.
ދެން އަނެެއްކާ ވެސް ތެދުވެގެން ގޮސް ކުރިން ވެސް އޭނާ މަޑުކޮށްލައިގެން ކުޑަ ދޮރު ކައިރި އަށް މަޑުކޮށްލި އެވެ. މި ފަހަރު ހިމަފޮދު ވާރޭ ވެހެނީ އެވެ. ތަންކޮޅެއް ދުރުގައި އިން ބޮކި ހޮޅިދަނޑިން އެޅިފައިވާ އޮރެންޖް ކުލައިގެ އަލީގެ ތެރެއިން ވާރޭގެ ތިކިތައް ވަރަށް ހިތްގައިމުކޮށް ފެންނަމުން ދިޔަ އެވެ.
އެ މަންޒަރު ބަލަލާން ކިތަންމެހާ ވެސް ހިތްގައިމެވެ. އެއީ އަބަދު ވެސް ލަމްޔާގެ ހިތަށް އުފާވެރިކަން ވެސް ލިއްބައިދޭ ކަމެެވެ. ވާރޭ ވެހޭ މަންޒަރު ބަލަން އިނުމަކީ ފޫއްސެއް ނެތި އަބަދު ވެސް އޭނާ ކުރާ ކަމެކެވެ. އެކަމަކު އެ ޒަމާން ވެސް ބަދަލުވެއްޖެ އެވެ. އެކަން ވެސް މާޒީވެ ދިޔައީ އެވެ.
ދޮރުފޮތި ދަމާލުމަށް ފަހު، ލަމްޔާ ދެން ހިނގައިގަތީ ކޮޓަރީގެ މައި ދޮރާ ދިމާއަށެވެ. މަޑުމަޑުން ދޮރު ހުޅުވާލުމަށް ލަސް ފިޔަވަޅުތަކެއްގައި، އޭނާ ސިޑިން ތިރި އަށް ފޭބި އެވެ. ގޭތެރެ ވެސް އޮތީ އަނދިރިކޮށެވެ. އެއްވެސް ދިރުމެއް ހިލަމެއް ނެތެވެ.
ނަމަވެސް ލަމްޔާ ސިޑިން ފައިބަިއގެން ގޮސް، ސިޓިން ރޫމްގެ ސޯފާ އާ އަރާ ހަމަވިތަނުން، ސޯފާގައި ނިދާފައި އޮތް ލަމްޔާގެ ލޯބިލޯބި ދިންބޮޅާ ހޭލައިފި އެވެ. އަދި ތެދުވެފައި، އާ ފުރާލައިފި އެވެ.
އަނދިރިކަމުގެ ތެރެއިން ވެސް ލަމްޔާ ފެނުމުން ބުޅާ ގޮވާލި އެވެ. ފާރުގައި އިން ސްވިޗަށް އޮބާލުމާ އެކު، މުޅި ސިޓިން ރޫމްތެރެ އަށް ފަނޑު އަލިކަމެއް ވެރިވި އެވެ. ލަމްޔާ ބުޅާ ކައިރީގައި އިށީނދެއްޖެ އެވެ. އަދި މަޑުމަޑުން ބުޅަލުގެ ބޮލުގައި ވަރަށް ލޯބިން ފިރުމާލި އެވެ.
ލިބުނު އޯހާތެރިކަމާއި ކުލުނުވެރިކަމުން ބުޅާ މަޑުމަޑުން ކައިރީގައި އޮށޯވެއްޖެ އެވެ. ލަމްޔާ މަޑުމަޑުން ދެން ވެސް ބުޅަލުގެ ގައިގައި ފރުމަމުން ދިޔަ އެވެ. އަދި އެ ދަނޑިވަޅުގައި އޭނާގެ ހިތަށް އެތައް ޝުއޫރުތަކެއް އަރައި ފައިބަމުން ދިޔަ އެވެ.
އަހަރެން މި އުޅެނީ ކޮން ކަހަލަ ދިރިއުޅުމެއްގައި ހެއްޔެވެ؟ އަހަރެން މި އުޅެނީ އުފަލުން ހެއްޔެވެ؟ ބޭނުންވާ ވަރަށް އޯގާތެރިކަމާއި ލޯބި ލިބޭ ހެއްޔެވެ؟ މިހާ އެކަނިވެރި ދުވަސްތަކެއް ހޭދަ ކުރަން ޖެހިފައި ވަނީ ކީއްވެބާވަ އެވެ؟ އެއީ ހަމަ އަހަންނަށް ހުރި ގޮތް ހެއްޔެވެ؟
ދުވަހެއްގެ ކޮޅުން ވެސް އަހަންނަށް އުފަލުގައި އުޅެވޭނެ ދަނޑިވަޅެއް އައިސްދާނެ ބާވަ އެވެ.މިފަދަ ފިކުރުތަކެއްގެ ތެރޭގައި ލަމްޔާ އިން އިިރު، އޭނާގެ ލޮލަށް ޖަމާވަމުން ދިޔަ ހޫނު ކަރުނަތައް ކޯތާފަތް މައްޗަށް ފައިބަމުން ދިޔަ އެވެ. އެ ހިތް ވަނީ "ފާޑަކަށް" ހަލާކުވެފަ އެވެ. އެ ހިތަށް ބޭނުނީ އަވަސް ޝިފާއެކެވެ. އޯގާތެރި އަތެެއްގެ ފިރުމުންތަކެވެ.
ބަައެއް ފަހަރު ލަމްޔާގެ ހިތަށް އަރަ އެވެ. ލޯބިވާ މީހެއްގެ އަތުތެރޭގައި އަބަދު ވެސް ބޮޑިވެގެން އޮވެވޭނެ ނަމަ އެވެ. އެކަމަކު އެއީ އޭނާ އަށް ނެތް ނަސީބެއް ކަހަލަ އެވެ. ކީއްވެގެން ހެއްޔެވެ؟ މިފަދަ އެތައް ސުވާލެއްގެ ޖަވާބު އަމިއްލަ އަމިއްލަ އަށް ދޫފައި ނިންމާލުމަކުން ލަމްޔާގެ ހިތަށް ލިބޭނެ ފަރުވާއެއް، ހަމަޖެހުމެއް ނެތެވެ. އެ ވާހަކަ ހިއްސާ ކުރަން ޖެހެ އެވެ. ކޮންމެވެސް މީހަކާ އެވެ. އެކަމަކު ސުވާލަކީ އެކަން ހިއްސާ ކުރާނީ ކާކާތޯ އެވެ؟ އެ އަޑު ކެތްތެރިކަމާ އެކު އަޑު އަހާނީ ކާކުތޯ އެވެ؟
އެތައް އިރެއް ވަންދެން ސޯފާގައި އިށީނދެގެން އިނުމަށް ފަހު، ވަރުބަލިވާ ވަރުވުމުން ލަމްޔާ ސޯފާގެ އެއްކޮޅުގައި އޮށޯވެއްޖެ އެވެ. އެހެން އޮއްވައި އޭނާ އަށް ނިދުނީ އެވެ. އޭރު ގަޑިން މެންދަމު 1:30 ވަނީ އެވެ.
ކުއްލިއަކަށް އެޕާޓްމަންޓްގެ ޑޯ ބެލް ރިންގްވާން ފެށި އެވެ. ނިދިފައި އޮތް ލަމްޔާ އަށް ހޭލެވުނެވެ. ބެލް ރިންގްވާ އަޑުގަދަމުން ނޯވެވިގެން ގޮސް، ލަމްޔާ އެންމެ ފަހުން ދޮރު ހުޅުވާލި އެވެ. ކުރިމަތީގައި ހުރީ ލަމްހާ އެންމެ ދެކެން ބޭނުން ނުވި މީހާ އެވެ. (ނުނިމޭ)