(މާޗް 23، 2014 ވަނަ ދުވަހުގެ ބަޔާ ގުޅޭ)
އިސްލާމިއްޔާގެ އައު އިމާރާތް ހުޅުއްވައި ދެއްވީ ރައީސް މައުމޫނެވެ. ސަދަން ސެކަންޑްރީ ސްކޫލް (މިހާރުގެ ޝަރަފުއްދީން) ހުޅުވި ފެބްރުއަރީ 17، 1992 ވަނަ ދުވަހު އެވެ.
މި ރަސްމިއްޔާތުގެ ތެރޭގައި ރައީސްގެ އަރިހުން އެދިގެން ބޭރު ގައުމުތަކުން އިސްލާމިއްޔާ ހިންގުމުގެ ހަރަދުތަކަށް ފަންށް ހޯދުމުގެ ހުއްދަ ލިބޭނެ ގޮތް ހަމަޖައްސަވައި ދެއްވި އެވެ.
ހަރުފަތަކަށް ފަހު ހަރުފަތެއް ގިރާކޮށް، އިސްލާމިއްޔާ ކާމިޔާބް ސްކޫލެއްގެ ގޮތުގައި މުޅި ރާއްޖެ އަށް މަޝްހޫރޫވެގެން ދިޔައީ ދާދި އަވަހަށެވެ.
މައްސަލަތައް ކުރިމަތިވާން ފެށީ 2000 ވަނަ އަހަރުގެ ތެރޭގަ އެވެ.
"އަޅުގަނޑު އިންޑިއާ އަށް ބޭހަކަށް ގޮސްފައި އައި އިރު ރައްޔިތުންގެ މަޖިލީހުގެ އިންތިހާބުގެ ކެމްޕޭން ހިނގަމުން ދަނީ. އައްޑު އަށް ކުރިމަތިލެއްވި ހިޔަލީ މުހައްމަދު ރަޝީދާއި ޑރ. މުހައްމަދު މުނައްވަރު ކެމްޕޭން ކުރުމުގެ މަސައްކަތް އިސްލާމިއްޔާގެ މެނޭޖްމަންޓާ ވެސް ހަވާލުވެފައި އޮތީ. އަޅުގަނޑު އެކަމާ މައްސަލަ ޖައްސައި ދެކޮޅު ހެދީ. އަޅުގަނޑު ބުނީ އެއީ އެކަމުގެ ތެރެއަށް ވަންނާކަށް ރަނގަޅު ކަމެއް ނޫނޭ. މިއީ އަޅުގަނޑުމެން ގޯސް ބަޔަކަށް ވާން ފެށި ހިސާބު. ހަމީދު (އެޓޮލްސް މިނިސްޓަރު އަބްދުﷲ ހަމީދު) ވިދާޅުވެގެން 1993 ވަނަ އަހަރުގެ ރިޔާސީ އިންތިހާބުގައި ވެސް އެހީތެރިވެ ދޭން ޖެހުނު. އެކަމަކު އެ ފަހަރު ވެސް އެ ބޭފުޅުން ބޭނުންވީ ވަރަށް އެކަމެއް ކޮށް ނުދެވިގެން ގޯސްވެފައި އޮތީ."
އެ ދުވަސްވަރަކީ ތަފާތު ދީނީ ފިކުރުތަކުގެ މީހުންގެ ބަސްމަގު ބަހައްޓަމުން ދިޔަ ގޮތުން ރައީސް މައުމޫނަށް ދަތިތަކެއް ކުރިމަތިވަމުން ދިޔަ ދުވަސްވަރެކެވެ. އެގޮތުން 1994 ވަނަ އަހަރުގެ ރިޔާސީ ބަޔާން އިއްވަވަމުން މި ދިވެހި ރާއްޖޭގައި ދީނީ ގޮތުން ހައްދު ފަހަނައަޅާފައިވާ އެއްވެސް ބަޔަކަށް ޖާގައެއް ދީގެން ނުވާނެ ކަމަށް ވިދާޅުވި އެވެ. އަދި އެފަދަ މީހުންނަނީ މުޖުތަމައު ބައިބައި ކުރަން މަސައްކަތް ކުރާ ބައެއް ކަމަށް ތުހުމަތު ކުރެއްވި އެވެ.
އެ ދުވަސްވަރަކީ ޑރ. ޒާހިރު ހުސައިން އެޑިއުކޭޝަން މިނިސްޓަރުކަމުން ކުޅިވަރާ ބެހޭ މިނިސްޓްރީ އަށް ބަދަލުވީ ދުވަސްވަރެވެ. ގަމުގައި ސްޕޯޓްސް ސެންޓަރެއް ހަދައި. މުޅި އަތޮޅުގައި އަންހެނުންގެ ވޮލީ އާއި ބަށި ފަދަ މުބާރާތްތައް ބޭއްވި، ކުޅިވަރަށް ވަރަށް ބޮޑު އަހައްމިއްޔަތު ކަމެއް ދެވިފައި އޮތް ދުވަސްވަރެކެވެ.
އަދި ހަމަ އެއީ އަމީނާ ވަދޫދު އޭ ކިޔާ އެމެރިކާގެ އަންހެނަކު ގެނެސް ރާއްޖޭގެ ކިޔަވާ ކުދިންނަށް އިސްލާމް ދީނާ ބެހޭ ގޮތުން މައުލޫމާތު ދީ، ތަގުރީރު ކުރުމުގެ ފުރުސަތު ލިބުނު ދުވަސްވަރު ވެސް މެ އެވެ. އޭނާއަކީ ލާދީނީ މީހެއް ކަމަށް ގޮވައި، އައްޑޫން ފައްސާލި އެވެ.
އަމީނާ ވަދޫދަށް އައްޑޫން ކުރިމަތިވި މައްސަލަ އާއި އެ ދުވަސްވަރު ގަމުގެ ސްޕޯޓްސް ސެންޓަރުން ހިންގި ކުޅިވަރު ޕްރޮގްރާމްތަކަށް އެދެވޭ ތަރުހީބެއް ލިބެމުން ދިއުމުގެ މައްސަލަ އާ މެދު ބައެއް ފަރާތްތަކުން އިނގިލި ދިއްކުރަމުން ދިޔައީ އިސްލާމިއްޔާ އާ ދިމާއަށެވެ. އަދި އެކަން އެހެންވީ އިސްލާމިއްޔާގެ މުދައްރިސުން މިސްކިތްތަކުގައި ދީނީ ނަސޭހަތް ދެއްވާން ފެށި ދުވަސްވަރު އެވެ. މާ ގިނަ އަންހެން ނިވާވެ ބުރުގާ ވެސް އަޅަން ފެށުމާ އެކުގަ އެވެ.
މި ހުރިހާ ކަންތައްތަކެއް މި ގޮތަށް ހިނގަން ފެށުމަކީ ބަޔަކު މީހުން އިސްލާމިއްޔާ އާ މެދު ތަފާތު ގޮތަކަށް ބަލަން ފެށި ކަމަކަށްވި އެވެ. އެ މީހުން ތުހުމަތުތަކެއް ކުރަން ފެށި އެވެ. އިސްލާމިއްޔާ ހިންގަން ތިބީ ދީނީ ގޮތުން ހައްދު ފަހަނައަޅާފައިވާ ބައެއް ކަމަށެވެ. އިސްލާމިއްޔާގެ ނަމުގައި ފައިސާ ހޯދައިގެން ވިޔަފާރި ކުރަމުންދާ ކަމަށެވެ.
"މިފަދަ ހަގީގަތެއް އަސްލެއް ނެތް ވާހަކަަތަކެއްގެ މައްޗަށް އަޅުގަނޑުމެން ބަދުނާމްކޮށް ސަރުކާރަށް ޝަކުވާ ކުރަން ފެށީ. މިއީ ބަޔަކު ގަސްތުގައި ރާވައިގެން ހިންގި ނުބައި އަމަލެއް. ދެން އެއް ރޭ ދަންވަރު ސިފައިން ޕްލާޒާ މުހައްމަދުދީދީ ގެންގޮސްފި. އަބްދުއްލަތީފުގެ ގެއަށް ވެސް ވަދެ ގަނެ، އެގެ ބަލައި ފާސްކޮށް ހެދުމަށް ފަހު އޭނާ ވެސް ޖަލަށް ލައިފި. މުހައްމަދުދީދީގެ ޕްލާޒާ ފިހާރަ ވެސް ސިފައިން ވަދެ ފާސްކޮށް ހިސާބު ކުރާ ފޮތްތަކާއި ފައިލްތަކާއި ޗެކްފޮތްތަކަށް ދާންދެން ގެންގޮސްފި. އޭގެ އަނެެއް ދުވަހު އަޅުގަނޑު ވެސް ގެންގޮސް ޖަލަށް ލައިފި. އަޅުގަނޑުގެ ބައެއް ލިޔެކިޔުންތަކާއި ކޮމްޕިއުޓަރު ވެސް ގެންދިޔަ."
މި ބޭކަލުންގެ މައްޗަށް ތުހުމަތު ކުރެވިފައި ވަނީ ބޭރުގެ ޓެރަރިސްޓް ޖަމާއަތްތަކާ ގުޅުން ހުރި ބައެއް ކަމަށެވެ. ހަރުކަށި، ދީނީ ސިޔާސަތުގެ ބައެއް ކަމަށެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.