ހިތަދޫ ދެކުނު ދާއިރާގެ ރައްޔިތުންގެ މަޖިލީހުގެ ގޮނޑި މި ފަހަރު ސަރުކާރު ހިންގާ ކޯލިޝަނަށް ގެއްލުނީ އެ ދާއިރާ އަށް ކޯލިޝަނުގައި ހިމެނޭ ޖުމްހޫރީ ޕާޓީގެ ކެންޑިޑޭޓް އަދި މިހާރު ވެސް އެ ދާއިރާގެ މެމްބަރު ހަސަން ލަތީފަށް ދޭން ޖެހޭ އެއްބާރުލުން ނުދީގެންނާއި ޕީޕީއެމްގެ އިހުލާސްތެރި ކަމެއް ނެތުމުން ކަމަށް ލަތީފް ވިދާޅުވެއްޖެ އެވެ.
ހިތަދޫގައި ހުންނަ ހަސަން ލަތީފްގެ ގެ އެވަރެސްޓްގައި މިއަދު އައްޑޫގައި ތިބޭ ނޫސްވެރިންނާ ކެމްޕޭން ޓީމާ އެކު ބައްދަލު ކުރައްވައި އޭނާ ވިދާޅުވީ ގޮނޑި ގެއްލުނު މައިގަނޑު ސަބަބަކީ ހަމަ ޕީޕީއެމްގެ އިހުލާސްތެރިކަން ނެތުން ކަމަށެވެ.
އެހެން ނަމަވެސް ޕީޕީއެމުން އެގޮތަށް ކަންތައް ކުރުމަކީ ކޯލިޝަނެއް ހަދައި، ގުޅިގެން މަސައްކަތް ކުރުމުގެ ރޫހާ އެއްގޮތަށް ހިނގާފައިވާ ކަމެއް ނޫން ކަމަށް ހަސަން ލަތީފް ވިދާޅުވި އެވެ.
އަދި އޭނާއަކީ އަބަދުވެސް ސަރުކާރަށް މަޖިލީހުގެ ތެރެއިން އެއްބާރުލުން ދެއްވާ މެމްބަރެެއްކަން ފާހަގަ ކުރެއްވި އެވެ. ނަމަވެސް އޭނާ އާ ދޭތެރޭ ޕީޕީއެމުން ތަފާތު ނަޒަރަކުން ދެެކުމަކީ ސީދާ ކޮން ކަމަކާ ގުޅިގެން ދެކެން ޖެހުނު ކަމެއް ކަމަށް އެނގިވަޑައި ނުގަންނަވާ ކަމަށް ވިދާޅުވި އެވެ.
އެކަމަކު ފަހަރުގައި އެއީ ދެކުނު އަތޮޅުތަކުގައި އަޅަން އުޅުނު 1،500 ހައުސިން ޔުނިޓްގެ ތެރެއިން ބޮޑު ބައެއް ހުޅުމާލޭގައި އަޅަން މި ސަރުކާރުން ވެސް ބޭނުންވުމުން، އެކަމަށް ތާއީދު ނުކުރުން ކަމަށް ވެދާނެ ކަމަށް ހަސަން ލަތީފް ވިދާޅުވި އެވެ.
"ފަހަރުގައި މިއީ ޕީޕީއެމްގެ ބޭފުޅުންނަށް ގަބޫލް ކުރަން އުނދަގޫ ކަމަކަށް ވެދާނެ އެ ބޭފުޅުން ކުރައްވަން އުޅުއްވި ކަމަކާ އަޅުގަނޑު ދެކޮޅު ހެދީ ކަމަށް. އެއީ ރައްޔިތުންނަށްޓަކައި އަޅުގަނޑު ކުރި ކަމެއް. ރައްޔިތުންނަށްޓަކައި ނިމިފައި އޮތް ކަމެއް ބަދަލު ކުރަން ނޭދޭތީ އަޅުގަނޑު ކުރި ކަމެއް އެއީ އެކަމަށް ތާއީދު ނުކުރުމަކީ،" ހަސަން ލަތީފް ވިދާޅުވި އެވެ. "އަޅުގަނޑަކީ އެއްގޮތަކަށް ވެސް ސަރުކާރުން ކުރަން އުޅުނު ކަމަކަށް ހުރަސް އަޅަން އުޅުނު މީހެއް ނޫން. އަޅުގަނޑު ހުންނާނީ ސަރުކާރާ އެއްކޮޅަށް ކަންކަން ނިންމުމުގައި ވަރަށް ބޮޑަށް އެއްބާރުލުން ދީފައި. ވަރަށް ރަނގަޅަށް މަސައްކަތްކޮށް ދީފައި."
ލަތީފް އިތުރަށް ވިދާޅުވީ ޕީޕީއެމްގެ ވަރަށް އިސް ދެ ބޭފުޅަކު އޭނާ އާ ދެކޮޅަށް ދެކުނު ދާއިރާ އަށް ވާދަ ކުރައްވައި، ތަފާތު ނުފޫޒުތައް އެ ދާއިރާ އަށް އޮއްސުމަކީ ޕީޕީއެމުން އޭނާ އަށް އެއްބާރުލުން ދޭން ބޭނުން ނުވުން ކަމަށް ދެކެވަޑައިގަންނަވާ ކަމަށެވެ.
އެ ދެ ބޭފުޅުންނަކީ ޑރ. އަލީ ޝަރީފާއި ޗާންދަލިއާ އަހުމަދު ހަސަނެވެ. ލަތީފް އަދި ވިދާޅުވީ މެދު ދާއިރާގެ މެދެއާރި މަގު ވެސް އިފުތިތާހް ކުރީ، އަމިއްލަ ގޮތުން ވާދަ ކުރެއްވި އަހުމަދު ހަސަން ބައިވެރިކޮށްގެން ކަމަށާއި އިންތިހާބުގެ ކުރިން ރައީސް އަބްދުﷲ ޔާމީން އައްޑު އަށް ވަޑައިގެން ހިތަދޫގައި ބޭއްވި ޖަލްސާ އަށް ވެސް ދައުވަތު ނުދެއްވާ ކަމަށެވެ.
"އެންމެ ފަހު ވަގުތުގަ ވެސް އަޅުގަނޑަށް ފާހަގަވެގެން ދިޔަ ވަރަށް ގިނަ ނުފޫޒުތަކެއް އަޅުގަނޑާ ދެކޮޅަށް މި ދާއިރާގެ ވަޒީފާގެ ފުރުސަތު ކަމުގައި ވިޔަސް އަދި ފައިސާގެ ނުފޫޒާ މިހެން ގޮސް ހުރިހާ ނުފޫޒްތަކެއް އަޅުގަނޑުގެ ދާއިރާ އަށް އޮހެމުން ދިޔަކަން،" ލަތީފް ވިދާޅުވި އެވެ. "އެހެންވީމާ މި ހުރިހާ ގޮންޖެހުމަކާ އެކު ވެސް ޕީޕީއެމްގެ އިސް ދެ ބޭފުޅަކާ އަޅުގަނޑާ ވާދަކޮށްގެން، މި ދާއިރާގެ ރައްޔިތުން ވަރަށް މަތީ ޕަސެންޓޭޖެއް އަޅުގަނޑަށް ދެއްވި." އޭނާ ވިދާޅުވި އެވެ. "ލަތީފް އިތުރަށް ވިދާޅުވީ މި ވާހަކަ މި ގޮތަށް ދެއްކުމަކީ ފިތުނަ އުފައްދައި ދޭތެރެ ޖެއްސުމެއް ވެސް ނޫން" އަދި ނާކާމިޔާބުވާން ޖެހުނު ސަބަބަކީ ކޮބައިކަން ހާމަކޮށް ދޭން ޖެހޭ."