ވާރޭ ވެހޭ ނަމަ އައްޑޫގެ ރަށްރަށުގެ މަގުތަކުގައި ހިނގާބިނގާވެ ދުއްވައި އުޅުމަކީ ވަރަށް އުނދަގޫ ކަމެކެވެ.
ހާއްސަކޮށް ލިންކް ރޯޑާ ދިމާ އަށް ހުންނަ ބައެއް ގޯޅިތަކާ ދިމާލުގައި ފެން ބޮޑުވެ، ބޮޑެތި ކޯރުތައް ހެފިދައިވެ އެވެ. މިހެންވުމުގެ ސަބަބުން، ހިނގާ މީހުންނަށް ޖެހެނީ ފެންގަނޑު ތެރެއަށް އެރިގެން ހިނގާށެވެ.
ދުއްވާ އެއްޗެއް ނަމަ އެ އުޅަނދެއް ވެސް ބޮޑު ކަނޑެއްް ހުރަސް ކުރުން ފަދަ އެވެ. މިފަދަ އެއް ސަރަހައްދަކީ ފޭދޫ މާދެލަ ފަންނެވެ.
އެ ސަރަައްދުގައި ބޮޑެތި ބިޔަ ފެންގަނޑު ވިއްސާރަ އާ އެކު އާންމުކޮށް ހެދިފައި ހުންނަ ތަންތަނުގެ ތެރޭގައި ލިންކް ރޯޑްގައި ހުންނަ "ސިޓީ ލޮޖް" ދިމާލާއި "ޗިލީ" ގަރާޖް ސަރަހައްދު ހިމެނެ އެވެ.
ފެން ހިއްދަން އެ ސަރަހައްދުތަކުގައި މީގެ ކުރިން ޖަންގްޝަންތައް ބަހައްޓާފައި ހުރި ނަމަވެސް، އެ އެއްޗިއްސެއް ރަނގަޅަށް މަސައްކަތެއް ނުކުރެ އެވެ. އެހެންވެ ވާރޭ ވެހިލާ އިރަށް މަގުގެ ބޮޑު ސަރަހައްދެއްގައި އޮންނަނީ ފެންބޮޑުވެފަ އެވެ. މިއީ އެތައް ބަޔަކަށް އުނދަގުލާއި ތުރާ ކުރިމަތިވާ ކަމެކެވެ.
މީގެ ކުރިން ވެސް މި ގޮތަށް ލިންކް ރޯޑާ ދިމާގައި އާދަޔާހިލާފަށް ފެން ބޮޑުވާ ދިމަދިމާ ހައްލު ކުރަން ޖަންކްޝަންތައް ބަހައްޓައި، ބައެއް ދިމަދިމާލުން ވަނީ މައްސަލަ ހައްލުކޮށްފަ އެވެ.
ފޭދޫ ސިޓީ ލޮޖާ ދިމާލުން ފެން ބޮޑު ސަރަހައްދަކީ އަވަސް ހައްލެއް ބޭނުން ކަމެކެވެ. އެތަނުގެ ހާލަތު އޮންނަ ގޮތުން އެތައް ބަތަކަށް އެބަ އުނދަގޫވެ އެވެ.
މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރްޑީސީ) ގެ އައްޑޫ ޔުނިޓްގެ އޮފިޝަލަކު ވިދާޅުވީ ސިޓީ ލޮޖް ކައިރީގައި ފެން ބޮޑުވުން ހައްލު ކުރަން މަސައްކަތްތަކެއް ފަށާފައިވާ ކަމަށެވެ. އެތަނުގެ ޓީމެއް އިއްޔެ ވަނީ އެތަން ބަލައި ވެސްފަ އެވެ.
އެހެންވެ ވަރަށް އަވަހަށް އެ ސަރަހައްދުގައި ފެން ބޮޑުވާ މައްްސަލަ ހައްލު ކުރެވޭނެ ކަމަށް އެމްއާރްޑީސީން ބުންޏެވެ.