(މާޗް 24، 2014 ވަނަ ދުވަހުގެ ބަޔާ ގުޅޭ)
"އަޅުގަނޑާ ސުވާލު ކުރީ ކީއްވެތޯ ހުއްދަ ނުހޯދައި ބޭރުގެ އެހީ ހޯއްދަވަނީ. ދެން ސަރުކާރުން ދައްކާފައި އޮތް ހުއްދަ ދެއްކީމާ އެ ފަދަ އެހެން ސުވާލުތައް ކުރިމަތި ކުރަމުން ދިޔައީ. އެންމެ ފަހުން އަޅުގަނޑުގެ ކޮމްޕިއުޓަރުގައި ހުރި ސިޓީއެއްގެ މައްސަލަ ޖެހުނީ. އެއީ ރިސޯޓްތަކުގެ ކޮޓަރިތަކުގައި ބެހެއްޓުމަށް ޤުރުއާންގެ އިނގިރޭސީ ތަރުޖަމާ ހޯދަން ސައޫދީ އެމްބަސީއަށް ލިޔެފައިވާ ސިޓީއެއްގެ ކޮޕީއެއް. ރާއްޖޭގައި ކިޔަވައިދޭ ކަރިކިއުލަމް ވަނީ އިނގިރޭސީ ސިސްޓަމްއަށޭ ލިޔެފައި އޮތް މައްސަލަ. އެއީ ސަރުކާރުގެ ސިޔާސަތާ ބެހުން ކަމަށް އެއްބަސްވާން މަޖުބޫރު ކުރުވީ."
އިސްލާމިއްޔާގެ ތިން ފައުންޑާ މެމްބަރުން ޖަލު ބަންދުގައި ތިބި އިރު، ދެން ހުންނެވި ޝެއިހް އިދްރީސް ވީ ގައުމުން ބޭރުގަ އެވެ. ސިފައިން އޭނާ އަތުނުޖެހިގެންނާއި ހުރި ތަނެއް ނޭނގިގެން ވަރަށް ބޮޑަަށް މައްސަލަ ޖެއްސި އެވެ. އިދްރީސް ހުންނެވީ ގައުމުން ބޭރުގަ އެވެ.
އޭނާ އަށް ރާއްޖެ ވަޑައިގަންނަވާކަށް ކެރިވަޑައެއް ނުގަތެވެ. ވުމާއެކު އަމިއްލަ އަށް ގައުމުން ބޭރަށް އަރުވާލެވިގެން ހުންނެވީ އެވެ. އިސްލާމިއްޔާ ހިންގެވީ ޝެއިހް ހަސަން ލަތީފެވެ. އޭނާ ވެސް ހުންނެވީ ވަރަށް ބިރުންނެވެ.
އިސްލާމިއްޔާގެ އޮފީހަށް ވެސް ސިފައިން ވަދެ، ވަރަށް ހަރުކަށި ގޮތަކަށް އެތާ ހުރި ބައެއް ލިޔެ ކިޔުންތައް ވެސް ގެންގޮސްފައިވުމާ އެކުގަ އެވެ.
މި ދުވަސްކޮޅުގެ ތެރޭގައި ސްކޫލް މަދަރުސާތަކުގެ ރަޖިސްޓްރީ އަލުން އައު ކުރަން އަންގަވައިފި އެވެ. އެކަމަކު އިސްލާމިއްޔާގެ ރަޖިސްޓްރީ މި ވަގުތު އައު ކުރާނެ ގޮތެއް އޮތީ ނޭނގުމެއްގެ ތެރޭގަ އެވެ. މަސްއޫލުވެރިން ބަންދުވެފައިވުމާ އެކުގަ އެވެ.
މި ހިސާބަށް ކަންތައް ދިޔަ އިރު އިސްލާމިއްޔާއަކީ 23 މިލިއަން ރުފިޔާގެ އިންވެސްޓްމަންޓެކެވެ. ހުސެން ރަޝީދު ވިދާޅުވި އެވެ.
އެހެން ނަމަވެސް ކަންތައް މިހެން އޮއްވައި އެޑިއުކޭޝަން މިނިސްޓްރީން ބޭނުންވީ އިސްލާމިއްޔާގެ މިލްކުވެރިކަން ސަރުކާރަށް ބަދަލު ކުރާށެވެ.
މިނިސްޓަރަކަށް ހުންނެވީ ޑރ. ލަތީފެވެ. މަދަރުސާގެ މަސްއޫލުވެރިއަކާ ޕްލާޒާ މުހައްމަދު އަހުމަދުދީދީ އެވެ. އޭނާ ބަންދުގައި ހުއްޓާ ތަކުރާރުކޮށް މި ހުށަހެޅުން އަންނަން ފެށުމުން އިސްލާމިއްޔާ އެޑިއުކޭޝަން މިނިސްޓްރީ އާ ހަވާލު ކުރަން އެއްބަސްވެ ލިއުން ދެއްވީ އެވެ.
"މިކަމެއް ހިނގީ އަޅުގަނޑުމެންގެ މަޝްވަރާއެއް ވެސް ނެތި. އެކަމަކު އެއީ އެވަގުތު އޭނާ އަށް ވެސް ކަން ކުރެވެން އޮތް ގޮތް. އެނޫން ގޮތެއް ނެތީ. ދެން ކީއްތޯ ކުރާނީ؟ އިސްލާމިއްޔާގެ މިލްކުވެރިކަން އެޑިއުކޭޝަން މިނިސްޓްރީ އަށް ބަދަލު ކުރެވުނުތާ ގަޑިއެއްހާ އިރު ތެރޭގައި އަޅުގަނޑުމެން ބަންދުން ދޫކޮށްލައިފި."
އާންމުންކަށް ނޭނގެ އެވެ. އިސްލާމިއްޔާއަކީ އާންމުންގެ ރުހުން ކިތަންމެ ބޮޑަކަށް ލިބިގެން ހިންގި ތަނަކަށް ވިޔަސް ކަން މިވީ ގޮތުން އެ ވާހަކަ ދައްކާކަށް މަސްއޫލު ފަރާތްތަކަށް އެހާ ފަސޭހައެއް ނޫނެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.