ސިޒޭރިއަން ހަދައިގެން މިދިޔަ އާދީއްތަ ދުވަހު ވިއްސި ކުއްޖާ ހޯމަ ދުވަހު މަރުވީ ސ. ހިތަދޫ ރީޖަނަލް ހޮސްޕިޓަލްގެ އިހުމާލުން ކަމަށް އާއިލާ އިން ބުނެފި އެވެ.
ކުއްޖާ މަރުވި ސަބަބެއް ކަމަށް ޑޮކްޓަރު މަރު ފޯމްގައި ޖަހާފައި ވަނީ މިއުކޯނިއަމް އެސްޕިރޭޝަން ސިންޑްރޮމާއި އާލީ އޮންސެޓް އޮފް ސެޕްސިސް އެވެ.
މަރުވި ކުއްޖާގެ މަންމަ މަރަދޫ ނޫރާނީ މަންޒިލް މަރިޔަމް އަނީސާ، 44، ހޮސްޕިޓަލްގައި އޮވެ ބުނީ ދަރިފުޅު މަރުވީ ހޮސްޕިޓަލްގެ އިހުމާލުން ކަމަށާއި ކަމާ ބެހޭ ހުރިހާ ފަރާތްތަކުގެ ސަމާލު ކަމަށް އެކަން ގެނެސްފައި ވާނެ ކަމަށެވެ.
އޭނާ ބުނީ އެފަދަ ހިތާމަވެރި ކަމެއް އެހެން މީހަކަށް ވެސް ދިމާވާން ބޭނުން ނުވާ ކަމަށެވެ.
"އެހެންވެ މިކަން ބަލައި، އިހުމާލުވި ފަރާތްތަކާ ދޭތެރޭ ފިޔަވަޅު ވެސް އެޅެން ޖެހޭނެ،" މިހާރު ފަސް ކުދިން ތިބި އަނީސާ ބުންޏެވެ.
"ބަރާބަރަށް ޑޮކްޓަރަށް ދައްކަމުން ޑޮކްޓަރުގެ އިރުޝާދާ އެއްގޮތަށް އަޅުގަނޑު އަމަލު ކުރަމުން ދިޔައީ ވެސް. އެކަމަކު މީގެ ހަތަރު ފަސް ވަރަކަށް ދުވަސް ކުރިން ބަނޑުން ފެން ފައިބާތީ ހޮސްޕިޓަލަށް ގޮސް ޑޮކްޓަރަށް ދެއްކީމަ ބުނީ ބަނޑުން ފެން ފޭބިޔަސް އަދި ވިހާ ހިސާބަކަށް ނުދެއޭ. އެކަމަކު މިހެންވާތީ ދެ ފަހަރަކަށް ދިޔައިމަ ވެސް ޑޮކްޓަރު ބުނީ އެހެން،" އޭނާ ބުންޏެވެ
އޭނާ އަދި ބުނީ ހޮސްޕިޓަލްގައި އެޑްމިޓްކޮށްގެން ފަރުވާ ދޭން ޑޮކްޓަރު އެހާ ވަރަކުން ނޫޅޭ ކަމަށެވެ.
"އެހެންވެ އަޅުގަނޑާއި ފިރިމީހާ ވެސް ބެލީ މާ ބޮޑު މައްސައެއް ނެތް ކަމަށް. މީގައި ޑޮކްޓަރާއި ހޮސްޕިޓަލްގެ އިހުމާލެއްވާ ކަމަށް އަޅުގަނޑުމެން ގަބޫލު ކުރަނީ." އަނީސާ ބުންޏެވެ.
އަނީސާ އަދި ބުނީ ސިޒޭރިއަން ހަދައިގެން ނެގި ކުއްޖާ ފެނުނީ ވެސް މަރުވެގެން މޫނު ދައްކަން، އޭނާ އޮތް ވޯޑަށް ގެންދިއުމުން ކަމަށެވެ.
އޭނާ އިތުރަށް ބުނީ ވިހާނެ ކަމަށް ޑޮކްޓަރު ބުނެފައި އޮތީ އަންނަ މަހުގެ ދެ ވަނަ ދުވަހު އެވެ.
ތުއްތު ކުއްޖާ މަރުވި ސަބަބެއް ކަމަށް މަރު ފޯމްގައި ޑޮކްޓަރު ބުނެފައި ވަނީ، ނޭވާލުމުގެ މައްސަލަތަކަކާއި ލޭގެ މައްސަލަތަކެއް ކަމަށެވެ.
ހިތަދޫ ރީޖަނަލް ހޮސްޕިޓަލް ހިންގެވުމާ ހަވާލުވެ ހުންނެވި ހަދީޖާ ހަފްސާ (ހައްޖަ) ވިދާޅުވީ މިދިޔަ އާދިއްތަ ދުވަހު ސިޒޭރިއަން ހަދައިގެން ނެގި ކުއްޖާ އަށް އައިސީޔޫގައި ފަރުވާ ދެނިކޮށް މަރުވި މައްސަލަ ވަރަށް ބޮޑު ސަމާލު ކަމެއް ދީގެން ބަލަމުން އަންނަ ކަމަށެވެ.
އޭނާ ވިދާޅުވީ އެ ކުއްޖާ މަރުވީ ފަރުވާދެމުން އަންނަނިކޮށް އިއްޔެ ހަވީރު 5:47 ހާއިރު ކަމަށެވެ.
ހައްޖަ ވިދާޅުވީ ބަނޑަށް 38 ހަފުތާގައި ސިޒޭރިއަން ހަދާފައި ކުއްޖާ ނެގިއިރު ވެސް ހާލު ވަރަށް ދެރަ ކަމަށެވެ. އަދި ހޮސްޕިޓަލުން ދެވެން އޮތް އެންމެ ރަނގަޅަކަށް، އައިސީޔޫގައި ފަރުވާދިން ކަމަށް އޭނާ ވިދާޅުވި އެވެ.
އެކަމަކު ކުއްޖާގެ ހާލު ސީރިއަސްކަމުން އިތުރު ފަރުވާ އަށް މާލެ ފޮނުވަން ވެސް މަސައްކަތް ކުރި ކަމަށާއި ނަމަވެސް އިއްޔެ މޯލްޑިވިއަންގެ ފްލައިޓުން ޖާގައެއް ލިބޭ ގޮތެއް ނުވި ކަމަށް ވިދާޅުވި އެވެ.
"އެހެންވެ ދެން މަސައްކަތް ކުރީ އައިޖީއެމްއެޗުން ޑޮކްޓަރެއް މިކޮޅަށް ގެނެސްގެން ފަރުވާ ދޭން. އެކަމަކު އެތާނގެ އިސްވެރިއަކާ ނުގުޅި ލަސްވާތީ ހުޅުމާލޭ ހޮސްޕިޓަލުން އިއްޔެ މެންދުރު ފަހު ޑޮކްޓަރަކު ގެނެސްގެން ފަރުވާ ދިނީ،" ހައްޖަ ވިދާޅުވި އެވެ. "އެ ޑޮކްޓަރު ސީދާ އެއާޕޯޓުން ހޮސްޕިޓަލަށް ވަޑައިގެން ކުއްޖާ އަށް ފަރުވާ ދެމުން ދަނިކޮށް ހަވީރު މަރުވީ."
މި މައްސަަލަ އިތުރަށް ތަހުގީގު ކުރަމުން އަންނާތީ ހައްޖަ އިތުރު ތަފުސީލެއް ނުދެއްވަ އެވެ.
އޭނާ ވިދާޅުވީ މި މައްސަލާގައި ހޮސްޕިޓަލްގެ އިހުމާލެއް އޮތްކަން އެނގޭނީ މައްސަލަ ތަހުގީގުކޮށް ނިމުމުން ކަމަށެވެ.