ފިލްމް "ޖަބްޖަބް ޕޫލް ކިލޭ" އާއި "ދޫލް ކާ ޕޫލް" ފަދަ މަޝްހޫރު ފިލްމުތަކުން ބެލުންތެރިންގެ ހިތް އަތުލި ބަތަލާ ނަންދާ މިއަދު މަރުވެއްޖެ އެވެ.
ކުއްލި ގޮތަކަށް މިއަދު ނަންދާ މަރުވި ހަބަރާ އެކު ބޮލީވުޑަށް ވަނީ ބޮޑު ސިހުމެއް ގެނެސްފަ އެވެ. އަދި މި ހަބަރާ ގުޅިގެން ބޮލީވުޑްގެ ވަރަށް ގިނަ ފަންނާނުން ވަނީ ނަަންދާގެ އާއިލާ އަށް ތައުޒިޔާ ފޮނުވައިފަ އެވެ.
އޭނާގެ މަރާ ބެހޭ ގޮތުން މީޑިއާތަކުގައި މާ ތަފުސީލީ ވާހަކަތަކެއް ގެނެސް ދީފައެއް ނުވެ އެވެ. އެހެންވެ ބޮޑަށް ބެލެވެނީ އުމުރުން 75 އަހަރުގެ ނަންދާ މަރުވީ ވަކި ހާއްސަ ކަމެއް ދިމާވެގެން ނޫން ކަމެވެ. އޭނާއަކީ ހުވަފަތްވެފައިވާ އަންހެނެކެވެ.
ނަންދާގެ ފިރިމީހާ މަންމޯހަން ދެސާއީ ވަނީ 1994 ގައި މަރުވެފަ އެވެ. އޭގެ ފަހުން ނަންދާ ކައިވެންޏެއްް ނުކުރެ އެވެ.
ނަންދާ އޭނާގެ ފިލްމީ ކެރިއަރު އެންމެ ފުރަތަމަ ފެށީ ޗައިލްޑް އެކްޓަރެއްގެ ގޮތުގަ އެވެ. އެހެން ނަމަވެސް ބަތަލާއެއްގެ ގޮތުގައި އޭނާ ބޮލީވުޑަށް ނިކުތީ 1956 ވަނަ އަހަރު ރިލީޒް ކުރި "ތޫފާން އޯރް ދިޔާ" އިންނެވެ.
ނަންދާގެ ފާހަގަކޮށްލެވޭ އިތުރު ފިލްމުތަކުގެ ތެރޭގައި "ބާބީ"، "ގުމްނާމް"، "ދުލްހަން" އަދި "ނަޔާ ސަންސާރު" ފަދަ ފިލްމްތައް ހިމެނެ އެވެ.
އޭނާ އެންމެ ފަހުން ފެނިގެން ދިޔަ ފިލްމަކީ މަރްހޫމް ރާޖް ކަޕޫރު 1983 ގައި ގެނެސް ދިން "ޕްރޭމް ރޯގް" އިންނެވެ. އެ ފިލްމުގައި ލީޑް ރޯލް ކުުުޅުނީ ރާޖްގެ ދަރިފުޅު ރިޝީ ކަޕޫރާއި ޕަދްމިނީ ކޯލަޕޫރީ އެވެ.