(މާޗް 25، 2014 ވަނަ ދުވަހުގެ ބަޔާ ގުޅޭ)
އިންތިހާބުތަކުގައި ވޯޓް ލުން
ރައީސް މައުމޫނުގެ ވެރިކަމަށް 20 އަހަރު ފުރި، ފަސް ވަނަ ދައުރަކަށް ކުރިމަތިލައްވައިގެން މަސައްކަތް ކުރައްވަމުން ދިޔަ ދުވަސްވަރެވެ. ރިޔާސީ އިންތިހާބުގައި ހަމަޖެހިފައި އޮންނަ، ފެންނަ ނުފެންނަ ފާހަގަލާ ވޯޓް ކަރުދާސްކޮޅުގައި ރަނގަޅު ފާހަގަ ލެެއްވުމަށް މަސައްކަތް ކުރެއްވެމުން ދިޔަ ދުވަސްވަރެވެ. ލިބިވަޑައިގަންނަވާ އެންމެ މަތީ އައުލަބިއްޔަތެއް ހޯއްދެވުމަށް ކުރައްވާ މަސައްކަތްޕުޅެވެ. އެއީ އެ ދުވަސްވަރުގެ ކެމްޕޭނެވެ.
މި ދުވަސްވަރާ ދިމާކޮށް އާދައިގެ މަތިން ރައްޔިތުންނަށް ސަރުކާރުން ކޮށް ދެއްވުމަށް ވައުދުވެ ވަޑައިގަންނަވާ އެކިއެކި މަޝްރޫއުތަކުގެ އަޑުފަށްގަނޑު ރޭޑިއޯ އާއި ޓީވީން ތާ އަބަދު އިވެމުން ދިޔަ އެވެ.
ޖެނުއަރީ 1998 ގެ ތެރޭގައި ހިތަދޫގައި ބައިނަލްއަގްވާމީ ޓްރާންސްޝިޕް ބަނދަރެއް ހެދުމަށްޓަކައި ފްރާންސްގެ ކުންފުންޏެއް ކަމަށްވާ ޕޯޓް އޮފް މާސޭ އާ އެކު ސަރުކާރުން އެއްބަސްވުމެއްގައި ސޮއި ކުރެއްވި އެވެ. އެކަމަކު އެ ވާހަކަވީ ތާކުންތާޖު ނުޖެހޭ ވާހަކައަކަށެވެ.
ރައީސްގެ ހާއްސަ އިނާޔާތުގެ ދަށުން ފޭދޫގެ ދޮނޑުދޮށް ދޮންވެލިން މުއްސަނދިކޮށް ދެއްވުމަށް ހިންގެވި މަޝްރޫއު ހަތަރު އަހަރު ފަހުން މި އަހަރުގެ ފެބްރުއަރީގައި ނިމިގެން ދިޔަ އެވެ. މާ ގިނަ ދުވަހެއް ނުވެ ބައެއް ދިމަދިމާއިން މި ފަސްގަނޑު ގިރާ ހުސްކޮށްލި އެވެ.
ފަނަރަސަތޭކަ އެނދުގެ ރިސޯޓެއް ގޮތުގައި ތަރައްގީ ކުރެއްވުމަށް ބިޑް ކުރެވިފައިވާ ވިލިގިލީގެ މަޝްރޫއުގެ މުއްދަތު ޑިސެމްބަރަށް ފަސް ކުރެއްވީ އެވެ. ސެޕްޓެމްބަރު މަހުގެ ތެރޭގަ އެވެ. އޭގެ އެތައް އަހަރެއް ފަހުން މި ރިސޯޓް ހަދައި ހުޅުވޭވަރުވީ 2008 ގަ އެވެ.
އޮކްޓޯބަރު މަސް ފެށުނު އިރު ގަމާއި ހިތަދު އާ އެކު އެ ދޭތެރޭގައިވާ ރަށްރަށުގެ ކަރަންޓް އެއް ފުރާޅެއްގެ ދަށަށް ގެނެސް ހިތަދޫ އާރްއޭއެފްގައި އަޅަމުންދާ އިންޖީނު ގޭގެ މަސައްކަތް ވެސް ނިމުމަކަށް ދަނީ އެވެ. ޖަޕާން ސަރުކާރުގެ ހިލޭ އެހީ އާ ވެސް އެކުގަ އެވެ.
މި ހުރިހާ ޕްރޮޖެކްޓްތަކާ އެކު ރިޔާސީ އިންތިހާބުގެ ކެމްޕޭން ފޯރި ނަގަމުން ދިޔަ އިރު، އެއަށް ވުރެ އައްޑޫ މީހުންގެ ޝައުގުވެރިކަން ހުއްޓިފައި އޮތީ އަންހެނުންގެ ވޮލީ ޓީމްތަކުގެ ވާދަވެރި ކަމުގެ މައްޗަށެވެ. ގިނަ ބައެއްގެ ސަމާލުކަން ހުއްޓިފައި އޮތީ 1999 ގައި އޮންނަ އަންހެނުންގެ ގައުމީ ވޮލީ މުބާރާތަށް ތައްޔާރުވުމަށް ޓީމްތަކުން ކުރަމުންދާ މަސައްކަތަށެވެ.
މި ދުވަސްވަރަކީ ރިޔާސީ އިންތިހާބްގެ ކެމްޕޭން ފޯރި އެންމެ ގަވަދެގެން އައި ދުވަސްވަރަށް ވުމާ އެކު، އެއީ މި ޓީމްތަކަށް ލިބުނު ރަނުގެ ފުރުސަތަކަށް ވެގެން ދިޔަ އެވެ. ބޭރު ކުޅުންތެރިންނާއި ކޯޗުން ހޯދުން ފަދަ ބޮޑެތި ހަރަދުތަކަށް މަގުފަހިވެގެން ދިޔަ އެވެ. ޓީމްތަކުގެ ހުށަހެޅުންތައް ސިޔާސީ ބޭފުޅުންނަށް ބޮލާލައި ޖެހޭކަށް ނެތެވެ. ރިޔާސީ އިންތިހާބަށް ފަހު، ދާދި އަވަހަށް އޮތީ ރައްޔިތުންގެ މަޖިިލިސް އިންތިހާބެވެ.
މި އަހަަރުގެ ތެރޭގައި ސުވާދީބުގެ ވެރިކަން ހިނގި ހިތަދޫ ފިޔާތޮށިގޭ އިމާރާތުން (35 އަހަރު ފަހުން) ސަރުކާރުގެ އިމާރާތަކަށް އައްޑު އަތޮޅު އޮފީސް ބަދަލު ކުރެވުނެވެ. އޮކްޓޯބަރު 25 ވަނަ ދުވަހު އެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.