(މާޗް 26، 2014 ވަނަ ދުވަހުގެ ބަޔާ ގުޅޭ)
ވީމާ 1998 ވަނަ އަހަރު ވެގެން ދިޔައީ އައްޑު އަށް ފަހި އަހަރަކަށެވެ. އެފަދަ އުންމީދީ ވާހަކަތަކެއް އިވެމުން ދިޔަ އަހަރަކަށެވެ.
ރިޔާސީ އިންތިހާބުގެ ވޯޓް ލުން އޮތީ އޮކްޓޯބަރު 16 ވަނަ ދުވަހު އެވެ. ރައްޔިތުންނަށް އެހާ ފައިދާ ހުރި ތަރައްގީގެ ޕްރޮޖެކްޓްތަކާ އެކުގައި ރިޔާސީ އިންތިހާބެއް ބޯމަތިވެގެން އައި އިރު ވެސް ރައްޔިތުން ކުޅިވަރަށް މިހާ އާފިލްވެފައި ތިބީ ކީއްވެގެން ހެއްޔެވެ؟
މި ޕްރޮޖެކްޓްތަކާ ގުޅިފައި ވަނީ ރައްޔިތުންނަށް ސަރުކާރުން ލިބި ދޭން ޖެހޭ އަސާސީ ހިދުމަތްތަކެވެ. އެކަށޭނެ ތައުލީމާއި ސިއްހީ ފަރުވާގެ ވާހަކަ އެވެ. ވަޒީފާގެ ފުރުސަތެވެ. ބޯ ފެނާއި ނަރުދަމާގެ ވާހަކަ އެވެ. ބޯހިޔާވަހިކަމުގެ ވާހަކަ އެވެ.
ނަމަވެސް މި ވާހަކަތައް އައްޑޫ ރައްޔިތުންނެކޭ އެއްފަދައިން ރާއްޖޭގެ އެހެން އަތޮޅުތަކުގެ އެންމެހާ ރައްޔިތުން އަހަމުންދާތާ 20 އަހަރުވެއްޖެ އެވެ.
ވޭތުވެ ދިޔަ ރިޔާސީ ހަތަރު ދައުރުގައި ވެސް ރައްޔިތުންނަށް މި ވައުދުތައް ވެވަޑައިގަންނަވަމުން ގެންދެވި އެވެ. ހާއްސަކޮށް ކޮންމެ ރިޔާސީ އިންތިހާބަކާ ކައިރިވަމުން އަންނަ ދުވަސްވަރު އެވެ.
ދެރައީ މި ދުވަސްވަރުތައް މީސްތަކުންގެ އުމުރުން ވެސް ގުނެމުންދާ ކަމެވެ. އޭގެ ސަބަބުން މީގެ 20 އަހަރު ކުރިން، ރައީސް މައުމޫންގެ އުންމީދުން ފުރިގެންވީ ތަގުރީރުތައް އަޑު އަހަން ފެށި އިރު ސްކޫލްތަކުން ނިކުތް ނޫކަށި ފުރައިގެ ޒުވާނުންނަށް މިއަދު ކާފަ މާމަ ކިޔައިފި އެވެ. އަދިވެސް ހަމަ އިވެނީ އެ ރާގެވެ. ހަމަ އެ ލަވަ އެވެ. އެއް ލަވައެއް އަޑު އަހައި އަހައި ފޫހިވާހާ ދުވަސްވީ އެވެ.
ކިޔާހާ ޅެން ފަރިއްސަށްވީމާ ދެން ވާނެ ގޮތް ވެސް ވީ އެވެ. ނަވާރަސަތޭކަ ނުވަދިހަ އަށް ވަނަ އަހަރު އޮތް ރިޔާސީ އިންތިހާބްގެ ދުވަސްވަރު، އައްޑޫގައި ކެމްޕޭން ޝުއޫރުތަކަށް ވުރެ ބޮޑަށް، އަންހެނުންގެ ވޮލީގެ ފޯރި ގަދަވެގެން ދިޔައީ ވެސް އެހެންވެގެންނެވެ.
ރިޔާސީ އިންތިހާބުގައި ވޯޓްލާ ދުވަސް ކައިރި ވަމުން އަންނަ އިރު، ސަރުކާރުގެ އެކިއެކި އޮފީސްތަކުން އެކި ނަންނަމުގައި ވަރަށް ގިނަ ބޭފުޅުން އައްޑު އަށް ޒިޔާރަތް ކުރައްވަ އެވެ. އަދި އައްޑޫގެ އެކި ރަށްރަށުގައި ތިއްބެވި ރައްޔިތުންނާ ގުޅުން ހުރި ނުފޫޒު ގަދަ ބައެއް ބޭފުޅުން އެކި ނަންނަމުގައި އަތޮޅުން ބޭރުކޮށްލެވެމުން ދިޔަ އެވެ.
މަޝްހޫރު ޑީއެންސީ ކުލަބްގެ ކެޕްޓަން އުދުހޭ އަބްދުﷲ މުފީދު ފަދަ ގަމުގައި ހިންގި ފެކްޓްރީތަކުން ދިވެހިންގެ މެނޭޖަރެއްގެ ގޮތުގައި ގިނަ ދުވަހު މަސައްކަތް ކުރެއްވި އިބްރާހީމް ރަޝީދާއި ކުރީގެ އަތޮޅުވެރިކަން ކުރައްވާފައިވާ އަހުމަދު ސޯލިހް އަލިދީދީ ފަދަ، ހުސައިން ޝާހިދު ފަދަ ބޭކަލުންނެވެ.
ރައީސް މައުމޫނަށް ވަފާތެރި ބޭކަލުންނަށް ޝައްކުވާތީ އެވެ. ރިޔާސީ އިންތިހާބުގައި މި ބޭކަލުންގެ ނުރުހުމާ ކުރިމަތިވެދާނެ ކަމަށެވެ. އިންތިހާބުގެ ވޯޓް ލުމުގެ ކަންތައްތަކަށް މި ބޭކަލުންގެ ހިޔަނި އެޅިގެން ހިނގައި ދާނެ ކަމަށް ބައްލަވާފަ އެވެ. ރައްކާތެރި ކަމުގެ ފިޔަވަޅެއްގެ ގޮތުންނެވެ.
ނަމަވެސް އިންތިހާބުގެ ތެރޭގައި ރައީސް މައުމޫން އައްޑު އަށް ވަޑައިގެންނެވސި ދަތުރުފުޅުތަކުގައި އާދަޔާހިލާފަށް ސެކިއުރިޓީ ވަރުގަދަ ކުރައްވާފައިވާތަން ފެނުމުން ބައެއް މީހުން ހައިރާންވެގެން އެ ވާހަކަ ދައްކައި ހެދި އެވެ. މޮޓަކޭޑްގައި ފުލް ސެކިއުރިޓީ އާ އެކުގައި ނޫނީ އެއްވެސް ތާކަށް ވަޑައެއް ނުގެންނެވެ އެވެ.
ސެކިއުރިޓީން ކަނޑުފަޅު ފީނައި ބަލައި ހެދި އެވެެ. އެއްގަމު އަރުމާޒުގައި ގަމުން ހިތަދު އަށް ވަޑައިގަންނަވާ އިރު ވެސް، އެއް ހަމައެއްގައި އޮވެގެން ކޯސްޓްގާޑް ލޯންޗް ކަނޑުމަގުން ދަތުރު ކުރެ އެވެ.
ގަމުގެ ސެކިއުރިޓީ ގާޑުން އަބޫހެރަ އާއި މާމެންދޫ އަދި ގައުކެނޑީގެ ތެރެއިން ހިތަދު އަށް ދާން އޮންނަ މަގުގެ ދެ ފަރާތުގައި ގަސްތަކުގެ ތެެރޭގައި ފިލައި ތިބެގެން މަގު ބެލެހެއްޓި އެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.