ދަނޑުވެރިކަމުގެ ތަޖުރިބާ ދަތުރެއްގައި މީދޫގެ ދަނޑުވެރިންތަކެއް ބ. އަތޮޅުގެ ރަށްތަކަށް ދަތުރެއް ފަށައިފި އެވެ.
މީދޫ އެކުވެރިންގެ ޗޭނު ޖަމިއްޔާ (އެމްއީސީ) ގެ ފަރާތުން ދެ މެމްބަރަކާއި މީދޫގެ އާންމު ދަނޑުވެރިންގެ ފަރާތުން ދެ ދަނޑުވެެރިންނާއި ސ. އަތޮޅު މަދުރަސާގެ އެގްރިކަލްޗަ ކްލަބުގެ ދަރިވަރަކާ އެކު ބ. އަތޮޅަށް ކުރާ މި ދަތުރަކީ އިއްޔެ އިން ފެށިގެން މި މަހުގެ 29 ވަނަ ދުވަހާ ހަމައަށް އެ އަތޮޅުގެ އެކި ރަށްތަކަށް ޒިޔާރަތް ކުރާ ގޮތަށް ރާވައިފައިވާ ދަތުރެކެވެ.
އެމްއީސީގެ އޮފިޝަލަކު ބުނީ ބ. އަތޮޅަށް ދިޔަ ޓީމުން އެ އަތޮޅުގެ ކެންދޫ، އަންހެންފުށި، ސޮނޭވާފުށީ ގެ އިތުރުން ގޮއިދު އާއި ފެހެންދު އަށް ވެސް ޒިޔާރަތް ކުރާނެ ކަމަށެވެ.
އަދި އެ އަތޮޅުގެ ދަނޑުވެރިކަން ކުރާ މައި ރަށް ކަމަށްވާ އަންހެންފުށްޓާއި އޯގަނިކް ފާމިން އަށް ޚާއްޞަ ރަށެއް ކަމަށްވާ ސޮނޭވާ ފުށްޓަށް ވެސް ދާނެ ކަމަށެވެ.
އެމްއީސީން ބުނީ އެ އަތޮޅުގެ ދަނޑުވެރިންގެ ފަރާތުން ވަރަށް ބޮޑު އެއްބާރުލުމަކާއި ތަރުޙީބެއް މީދޫގެ ޓީމަށް ލިބެމުންދާ ކަމަށެވެ.