ސ. ގަން އެއާޕޯޓް ތަރައްގީ ކުރަން ހިއްކާ ބިމުގެ މަސައްކަތް، އެ މަސައްކަތުގެ ކޮންޓްރެކްޓަރު ދުބާއީގެ ގަލްފް ކޮބްލާއިން ނިންމައިފި އެވެ.
އެ ކުންފުނީގެ އޮފިޝަލަކު ވިދާޅުވީ ހިއްކަން ޖެހޭ ބިން އެއްކޮށް ހިއްކައި، މިހާރު ނިމިފައިވާ ކަމަށެވެ.
މި މަސައްކަތް އަމަލީ ގޮތުން ފެށީ މިދިޔަ އަހަރުގެ މެއި މަހުގެ ތެރޭގަ އެވެ. އެހެން ނަމަވެސް ހިއްކުމުގެ މަސައްކަތް ފެށޭވަރުވީ އޮގަސްޓްގެ ތެރޭގަ އެވެ.
އެއީ ކޮންނަ ބޯޓް ހިއްކަން ޖެހޭ ސަރަހައްދަށް ނުވެއްދި ލަސްވުމާ ގުޅިގެންނެވެ.
ބިން ހިއްކުމުގެ މަސައްކަތް ކޮބްލާ އިން ނިންމާލި އިރު، ފައިސާގެ މައްސަލަތަކެއްގައި އެ ކުންފުނިން ވަނީ ދެ ފަހަރެއްގެ މަތިން މަސައްކަތް މެދުވެސް ކަނޑާލައިފަ އެވެ. އަދި އަލުން މަސައްކަތް ފެށީ، ސަރުކާރުން ހަމަޖައްސައި ދޭން ޖެހޭ ފައިސާ ހަމަޖައްސައި ދިނުމުންނެވެ.
ބިން ހިއްކަން ކޮބްލާ އާ ހަވާލު ކުރީ 11.7 މިލިއަން ޑޮލަރަށެވެ.
ކޮބްލާ އިން ބިން ހިއްކި ނަމަވެސް، ރިވެޓްމަންޓްގެ މަސައްކަތް ކުރާނީ އެ ކުންފުނީގެ ރާއްޖޭގެ ޕާޓްނަރެއް ކަމަށްވާ ޓެންސާ މޯލްޑިވްސްގެ ފަރާތުންނެވެ.
ޓެންސާ އިން ބުނީ ރިވެޓްމަންޓްގެ މަސައްކަތަށް ގާތްގަނޑަކަށް ހަ މަހެއްހާ ދުވަސް ނަގާނެ ކަމަށެވެ.