ރޭ އެކަނި ލޯންޗެއްގައި މަހަށް ނުކުމެ އުޅެނިކޮށް ކަނޑަށް ވެއްޓުނު އައްޑޫ ހިތަދޫ މީހަކު ފަތާފައި ގޮސް ފުވައްމުލަކަށް އަރައިފި އެވެ.
އެ މައުލޫމާތު ދިން މީހާއާ ހަވާލާދީ އައްޑޫ މޭޔަރު އަލީ ނިޒާރު ވިދާޅުވީ ފަތާފައި ގޮސް ފުވައްމުލަކަށް އެރި މީހަކީ ހިތަދޫ ކެޔޮޅުގޭ އަލިމަނިކުފާނު ކަމަށެވެ. އޭނާ ވިދާޅުވީ އެ މީހާ އަށް ގުޅައި ހާލު ވެސް ބެއްލެވި ކަމަށާއި ހާލު ރަނގަޅު ކަމަށް ބުނެފައިވާ ކަމަށެވެ. އަދި އަލިމަނިކުފާނު ލޯންޗުން ކަނޑަށް ވެއްޓުނީ އައްޑޫގެ އުތުރުން 13 ވަރަލަށް މޭލު ބޭރުން ކަމަށް ވެސް ވިދާޅުވި އެވެ.
ނިޒާރު ވިދާޅުވީ މިކަމާ ގުޅިގެން ފުވައްމުލަކު މޭޔަރު އިސްމާއީލް ރަފީއު އަށް ގުޅުއްވައި އަލިމަނިކުފާނުގެ ހާލު ބަލައި އެހީތެރިވެއްދުމަށް ވެސް އެދިވަޑައިގެންނެވި ކަމަށެވެ. އަދި އޭނާ މަހަށް ނުކުތް ލޯންޗް ހޯރުމުގެ މަސައްކަތްކޮށް ދިމުމަށް އެމްއެންޑީއެފް ސަދަން އޭރިއާގައި އެދިފައިވާނެ ކަމަށާއި ލޯންޗާ ބެހޭ މައުލޫމާތު ވެސް ހިއްސާކޮށްފައިވާ ކަމަށް ވިދާޅުވި އެވެ.
އެނގިފައިވާ ގޮތުގައި އަލިމަނިކުފާނަކީ އާންމުކޮށް އެކަނި މަހަށް ނުކުންނަ މީހެކެވެ. އަދި ރޭގަނޑާއި ދުވާލު ވެސް އޭނާ އެގޮތަށް މަހަށް ނުކުމެ އެވެ. އޭނާ ފުވައްމުލަކަށް ހަ ގަޑިއިރު ފަތާފައި ކަމަށްވެ އެވެ.
ނިޒާރު "އައްޑޫ ލައިވް" އަށް މިއަދު ވިދާޅުވީ އަލިމަނިކުފާނު ކަނޑަށް ވެއްޓިގެން ފަތާފައި ފުވައްމުލަކަށް އެރިކަމުގެ މައުލޫމާތު ލިބުނީ ރޭ 10:00 ޖަހައި ބޮޑުވި ފަހުން ކަމަށެވެ.
"ދެން އެ މައުލޫމާތު ފޯރުކޮށްދިން މީހާ މެދުވެރިކޮށް އަޅުގަނޑު އޭނައާ ވާހަކަ ވެސް ދެއްކިން. ހާލު ހަމަ ރަނގަޅު. އެކަމަކު ޓެސްޓްތަކެއް ހެދުމަށްޓަކައި ހޮސްޕިޓަލްގައި އޭނަ މިހާރު އޮތީ،" އޭނާ ވިދާޅުވި އެވެ.
ނިޒާރު ވިދާޅުވީ ފުވައްމުލަކު ކައުންސިލުން ވެސް އަލިމަނިކުފާނަށް ބޭނުންވާ އެހީތެރިކަން ދެމުން އަންނަ ކަމަށާއި އޭނާ ހޮސްޕިޓަލުން ދޫކޮށްލައި އައްޑު އަށް އަންނަން ކައުންސިލުގެ އެހީތެރިކަން ބޭނުން ވަނަ އެކަން ކޮށްދޭނެ ކަމަށެވެ.
"އޭނަ މަހަށް ދިޔަ ލޯންޗް މިއަދު ވަރަށް ހެނދުނުން ފެށިގެން އެމްއެންޑީއެފް ސަދަން އޭރިއާ އިން ވަނީ ހޯދަން ފަށާފައި." ނިޒާރު ވިދާޅުވި އެވެ.