ހޮނިހިރު ދުވަހު ނިމިގެން ދިޔަ ރައްޔިތުންގެ މަޖިލިހުގެ އިންތިހާބުގައި އެމްޑީޕީގެ ފަރާތުން ފޭދޫ ދާއިރާގެ ގޮނޑިއަށް ވާދަ ކުރެއްވި ކެންޑިޑޭޓް މުހައްމަދު ނިހާދުގެ ގެއިން ސިހުރު ހަދާފައިވާ ކަމަށް ބެލެވޭ ކިހައެއް ފެނިއްޖެ އެވެ.
ނިހާދުގެ ގާތް މީހަކު މިއަދު "އައްޑޫ ލައިވް" އަށް ބުނީ ނިހާދުގެ ގެ ސިވިލްޒޭޝަން ހައުސްގެ ކުރިމަތީގައި ހުރި އަނބު ގަހާ ދިމާލުގައި އޮތް މި ކިހާ ފެނުނީ އަންގާރަ ދުވަހު ކަމަށެވެ.
ނިހާދުގެ އެކުވެރިޔާ ބުނީ ކިހާ ފެނުނީ އިންތިހާބުގެ ފަހުން އަންގާރަ ދުވަހު އަނބު ގަސް ހުރި ސަރަަހައްދު ކުނި ކަހަނިކޮށް ނިހާދުގެ މަންމަ އަށް ކަމަށެެވެ.
އޭނާ ބުނީ އެ ކިހާ ފެނުނު އިރު ވެސް އާދަޔާހިލާފު ގޮތެއް ހުރި ކަމަށެވެ. އެއީ އޭގައި ގިނަ އަދަދަަށް ކަނޑާ ނަަގައި ލިޔެ ކުރެހުންތަކެއް އަޅާފައި ހުރުމުން އެއީ ފަންޑތަ ގުޅުން ހުރި އެއްޗެއް ކަމަށް ބެލެވުނު ކަމަަށެވެ.
ނިހާދުގެ އާއިލާ އާ ހަވާލާދީ އޭނާގެ އެކުވެރިޔާ ބުނީ އެ ފަންޑިތަވެރިޔަކަށް ވެސް ދެއްކި ކަމަށެވެ.
އަދި އޭގެ ހާސިލް ކުރަން އުޅުނު ކަންތައްތައް މިހާރުވެ ނިމިފައިވާ ކަމަށާއި އޭގެ ނުރައްކަލެއް ދެން ނެތް ކަމަށް އެ މީހާ ބުނި ކަމަށް ނިހާދުގެ އެކުވެރިޔާ ބުންޏެވެ.
އަދި އެ ބެލީ މީހާ ބުނީ ބުނީ އޭގެ ބައިތަކެއް ވޯޓުލީ ތަނުގައި ވެސް ހުންނާނެ ކަމަށް ބެލެވޭ ކަމަށެވެ. ފޭދޫގައި ބެހެއްޓި ފަސް ވޯޓް ފޮށި ވެސް ހުރީ ފޭދޫ ސްކޫލްގަ އެވެ.
ފަންޑިތަ އާ ގުޅުން ހުރި މިފަދަ އެއްޗެއް އިންތިހާބުގެ ދުވަސްވަރު ނިހާދުގެ ގޭގެ ގޯތެރެއިން ފެނުމަކީ، އިންތިހާބުގައި ވަކި ނަތީޖާއެއް ހާސިލް ކުރަން ކޮށްފައިވާ ކަމެއް ކަމަށް ބެލެވޭ ކަމަށް ނިހާދުގެ އެކުވެރިޔާ ބުންޏެވެ.
އަދި އެއީ ނިހާދާ ވާދަ ކުރި އަލްހާން ފަހުމީގެ ފަރާތުން ކުރި ކަމެއް ގަބޫލް ނުކުރެވޭ ކަމަށާއި އެއީ އިންތިހާބު ކާމިޔާބު ކުރި ޕީޕީއެމްގެ ކެންޑިޑޭޓް އިބްރާހީމްދީދީ (އައިބީ) ގެ ފަރާތުން ކޮށްފައިވާ ކަމެއް ކަމަށް ވަރަށް ބޮޑަށް ބެލެވޭ ކަމަށް ނިހާދުގެ ކެމްޕޭން ޓީމުން ވެސް ބުންޏެވެ.
އިންތިޚާބުގައި ނިހާދަށް 1،202 ވޯޓް ލިބުނު އިރު، ގޮނޑި ކާމިޔާބް ކުރި އައިބީ އަށް ލިބުނީ 1،299 ވޯޓެވެ.