ރާއްޖެ އަށް ޓޫރިސްޓުން ގެނައުމުގެ މަސައްކަތުގައި "މޯލްޑިވްސް އެކްސްކްލޫސިވް" ހަރަކާތްތެރިވާތާ މިއީ ނުވަ ވަނަ އަހަރެވެ.
އައްޑޫގައި އޮފީހެއް ހަދައިގެން ހިންގަމުން އަންނަ އެ ޓްރެވެލް އެޖެންސީގެ މަސައްކަތް މިހާތަނަށް އައި އިރު ވަރަށް ކާމިޔާބް ކަމަށް އެ އެޖެންސީން ބުންޏެވެ.
މަރަދޫފޭދޫ ބޮޑު މަގުގައި ހުންނަ މޯލްޑިވްސް އެކްސްކްލޫސިވް އޮފީހުގެ މައިގަނޑު މަސައްކަތަކީ ރާއްޖޭގެ ޓޫރިޒަމް އިންޑަސްޓްރީ ޕްރޮމޯޓްކޮށް، ޓޫރިސްތުން ރާއްޖެ އަށް ގެނައުމުގެ މަސައްކަތެވެ.
އެ މަސައްކަތުގެ ނަތީޖާ ވެސް ރަނގެވެ. ފައިދާ ވެސް ބޮޑެވެ.
މޯލްޑިވްސް އެކްސްކްލޫސިވްގެ މެނެޖިން ޑިރެކްޓަރު މުޖުތަބާ ސައީދު (މުޖާ) ވިދާޅުވީ ރާއްޖެ އަށް ޓޫރިސްޓުން ގެނައުމަށް އޭނާ ހިންގަވާ ޓްރެވެލް އެޖެންސީއަކީ ފައިދާ ބޮޑު މަސައްކަތެއް ކަމަށެވެ.
އަދި ދުނިޔޭގެ އެކި ކަންކޮޅުތަކުގެ ޓޫރިސްޓުންގެ މެދުގައި ރާއްޖޭގެ ރިސޯޓްތައް ޕްރޮމޯޓްކޮށް، ޓޫރިސްޓުން ގެނައުމަށް ކުރާ މަސައްކަތް ކުރިއަށްދާ ގޮތާ ދޭތެރޭ ހިތްހަމަޖެހިވަޑައިގަންނަވާ ކަމަށް އޭނާ ވިދާޅުވި އެވެ.
"އަޅުގަނޑުމެން މި މަސައްކަތް ކުރަމުން މި އަންނަނީ 2006 ވަނަ އަހަރުން ފެށިގެން. މިހާތަނަށް އައިރު މިއީ ރަނގަޅު މަސައްކަތެއްގެ ގޮތުގައި ވަނީ ފާހަގަ ކުރެވިފައި. އަޅުގަނޑުމެންގެ ޓްރެވެލް އެޖެންސީން ވަރަށް ބޮޑަށް އެބަ މަސައްކަތް ކުރޭ ދުނިޔޭގެ އެކި ގައުމުތަކުގެ ޓޫރިސްޓުންގެ މެދުގައި ރާއްގެ އިޝްތިހާރުކޮށް އަޅުގަނޑުމެންގެ ތުރޫކޮށް ރާއްޖެ އަންނަ ޓޫރިސްޓުން އިތުރު ކުރަން،" 2010 ވަނަ އަހަރު ދުނިޔޭގެ މަޝްހޫރު ފުޓްބޯޅަ ކުޅުންތެރިޔާ ކްރިސްޓިއާނޯ ރޮނާލްޑީ ވެސް ރާއްޖެ ގެނައި މޯލްޑިވްސް އެކްސްކްލޫސިވް އާ ބެހޭ ގޮތުން މުޖާ ވިދާޅުވި އެވެ. "އަޅުގަނޑުމެން އަބަދު ވެސް ވަރަށް ބޮޑަށް މަސައްކަތް ކުރަން މަޝްހޫރު މީހުން ވެސް ރާއްޖެ ގެނެވޭތޯ. އެގޮތުން ކުރެވުނު މަސައްކަތުގެ ތެރެއިން އަޅުގަނޑުމެން މެދުވެރިކޮށް ރޮނާލްޑޯ ރާއްޖެ އައީ."
އޭނާ ވިދާޅުވީ މޯލްޑިވްސް އެކްސްކްލޫސިވްގެ ރަސްމީ ވެބް ސައިޓާއި ފޭސްބުކް ޕޭޖްތައް ބޭނުންކޮށްގެން ރާއްޖޭގެ ހުރިހާ ރިސޯޓްތަކަށްހެން ޓޫރިސްޓުން ގެންނަ ކަމަށެވެ.
"އަޅުގަނޑުމެން އައްޑޫގައި ތިބެގެން މި ކުރާ މަސައްކަތުގެ ނަތީޖާ ހަމަ ވަރަށް ރަނގަޅޭ ބުނެވޭނީ،" ގައުމީ އެއާލައިން މޯލްޑިވިއަންގެ އެޖެންޓްކަން ވެސް ކުރައްވާ މުޖާ ވިދާޅުވި އެވެ. "ޓޫރިސްޓުން ރާއްޖެ ގެންނަ އިރު ވަރަށް ބޮޑު އިސްކަމެއް އަބަދު ވެސް ދެން އެ މީހުން ސެޓިސްފައިވާ ވަރުގެ ހިދުމަތެއް ދޭން. އެގޮތުން ޓޫރިސްޓަކު ރިސޯޓަކަށް ދާން ޕޭމަންޓް ހަދާ ހިސާބުން ފެށިގެން ގޮސް ޗުއްޓި ނިންމާފައި ރާއްޖޭން ފުރަންދެން އަޅުގަނޑުމެން ކަށަވަރު ކުރާނަން އެ މީހުން ހިތްހަމަޖެހޭ ވަރުގެ ހިދުމަތެއް ދެވުނުތޯ. ހަގީގަތުގައި މިހާތަނަށް މިކަމުގައި ދެމިތިބެވުމުގެ މައިގަނޑު ސަބަބަކީ ވެސް ޓޫރިސްޓުން އަޅުގަނޑުމެންނަށް ކުރާ އިތުބާރު."
މުޖާ ވިދާޅުވީ މޯލްޑިވްސް އެކްސްކްލޫސިވްގެ ވެބްސައިޓް މެދުވެރިކޮށް ރިސޯޓްތަކާ ބެހޭ ވަރަށް ގިނަ މައުލޫމާތާއި އެތަންތަނުގެ އަގުތަކާ ބެހޭ މައުލޫމާތު ލިބޭނެ ކަމަށެވެ. އަދި އޮންލައިންކޮށް ބްކިންސް ހެދޭނެ ކަމަށް ވެސް އޭނާ ވިދާޅުވި އެވެ.
މުޖާ ވިދާޅުވީ ޓްރެވެލް އެޖެންސީއެއް ހިންގުމަކީ ހަގީގަތުގައި ފަސޭހަ ކަމެއް ނޫން ކަމަށެވެ.
މީގައި ގޮންޖެހުންތަކެއް ހުރި ކަމަށް އޭނާ ގަބޫލް ކުރައްވަ އެވެ. އެގޮތުން ދިވެހި ޓްރެވެލް އެޖެންސީތަކަށް ބައެއް ރިސޯޓްތަކުގެ އެހީތެރިކަން ލިބެން ޖެހޭ ވަރަށް ނުލިބޭކަން އޭނާ ފާހަގަ ކުރައްވަ އެވެ.
"ލޯކަލް އެޖެންސީތަކާއި ބޭރުގެ އެޖެންސީތަކާ ދެމެދު ތަފާތު ކުރުންތަކެއް ބައެއް ރިސޯޓްތަކުން ގެންގުޅޭކަން ވަރަށް ބޮޑަށް ފާހަގަ ކުރެވޭ. އެގޮތުން ލޯކަލް އެޖެންސީތަކަށް ވުރެ ބޮޑަށް ބޭރުގެ އެޖެންސީތަކަށް ރިސޯޓްތަކުން އިސްކަން ދޭ،" މުޖާ ވިދާޅުވި އެވެ. "އެކަހަލަ ކަންތައްތައް ރަނގަޅު ކުރެވި ހަމަހަމަ ގޮތެއްގައި ކުރިއަށް ގެންދެވޭ ކަހަލަ ގޮތެއް ވެއްޖެ ނަމަ ލޯކަލް ޓްރެވެލް އެޖެންސީތަކުގެ ދައުރު މިހާރަށް ވުރެ ބޮޑަށް ފުޅާވެ ކުރި އަރައިގެން ދާނެ."