ވ. އަތޮޅު ފަރަކަށް އެރި ބާޖުގެ ވެރިފަރާތް 100 މިލިއަން ރުފިޔާއިން ޖުރިމަނާ ކޮށްފިއެވެ.
އީޕީއޭއިން ބުނެފައިވަނީ "AM AAGAM" ނަމަކަށް ކިޔާ ބާޖު މޭ 1 ވަނަ ދުވަހު ވ. އަތޮޅު މާގުޅީ ފަޅުގެ އުތުރުން އޮންނަ ކަނޑުއޮޅިން ވަނުމުގެ ތެރޭގައި އެ ބާޖު އެ ކަނޑު އޮޅީގައި އޮންނަ ފަރަކަށް އަރާފައިވާ ކަމަށެވެ. އަދި މި އުޅަނދަކީ އިންޑިއާއިން ހިލަ ހިފައިގެން އައި ޓަގް ބޯޓާއެކު ވ. ރަކީދޫއަށް ދަތުރު ކުރަމުން ދިޔަ އުޅަނދެއް ކަމަށްވެސް އީޕީއޭއިން ބުނެފައިވެއެވެ.
އީޕީއޭއިން ބުނެފައިވަނީ ބާޖު ފުންކޮށް ނިމުމުން އެ ސަރަހައްދުގެ ތިމާވެއްޓަށް ލިބުނު ގެއްލުންތައް ބެލުމަށް އީޕީއޭއިން އެ އުޅަނދުގެ ވެރިފަރާތާ ގުޅިގެން އެ ސަރަހައްދު ބަލައި ޖޮއިންޓް-ސަރވޭއެއް ކުރެވިފައިވާ ކަމަށެވެ. އެގޮތުން ބެލިބެލުމުން އެ ފަރުގެ 6054 އަކަމީޓަރުގެ ސަރަހައްދަކަށް ބޮޑެތި ގެއްލުންތަކެއް ލިބިފައިވާ ކަން ފާހަގަކުރެވިފައިވާ ކަމަށް އީޕީއޭއިން ބުނެފައިވެއެވެ.
އެހެންކަމުން ލިބުނު ގެއްލުންތައް ބަލައި ވަޒަންކޮށް ކަނޑައެޅުނު ޖުމްލަ ޖުރިމަނާއާއި ބަދަލަކީ 152،569،800 ރުފިޔާކަން އީޕީއޭއިން ފާހަގަކުރިއެވެ. އެހެންނަމަވެސް ގާނޫނުގެ ދަށުން ކަނޑައެޅޭ އެންމެ ބޮޑު ޖުރިމަނާއަކީ 100 މިލިއަން ރުފިޔާ ކަމުން 100 މިލިއަން ރުފިޔާއިން އެ ބާޖުގެ ވެރިފަރާތް ޖުރިމަނާ ކޮށްފައިވާ ކަމަށް އީޕީއޭއިން ބުނެފައިވެއެވެ. އީޕީއޭއިން ބުނެފައިވަނީ އެ ފައިސާ 30 ދުވަހުގެ ތެރޭގައި ދެއްކުމަށް އަންގާފައިވާކަމަށެވެ.
އީޕީއޭއިން ބުނެފައިވަނީ ބާޖު ފަރަށް އަރައިގެން ލިބުނު ގެއްލުމުގެ ބަދަލު ޝަރީއަތް މެދުވެރިކޮށް ހޯދުމުގެ މަސައްކަތް އެޓާނީ ޖެނެރަލްގެ އޮފީހާއެކު ފެށިފައިވާ ކަމަށެވެ.