(މާޗް 27، 2014 ވަަނަ ދުވަހުގެ ބަޔާ ގުޅޭ)
އެހާ ވަރުން ވެސް އެ މަގުގެ ދެ ފަރާތުގައި ރުއް ގަހުގައި ލިޔުންތައް ލިޔެފައިވެ އެވެ. ރަށުތެރެއަށް ލިއުންތައް އަޅައި، ފާރު ނޫސް ޝާއިއު ކުރި އެވެ. ރައީސް މައުމޫންގެ ސަރުކާރަށް ނުރުހުން ފާޅުކޮށްފައިވާ ބަސްތަކުންނެވެ. ހިތްހަމަނުޖެހުމުގެ ޝުއޫރުތަކުންނެވެ.
ރައްޔިތުންނަށް ވެވަޑައިގެންފައިވާ ވައުދުތައް ހަނދާންކޮށް ދެއްވުމަށެވެ. މިފަދަ "ނޭއްގާނީ" އަމަލުތައް ހިންގާ ކަމަށް ޝައްކު ކުރެވޭ މީސްމީހުްނ ގެންގޮސް ތަހުގީގުކޮށް، ބަޔާން ނަގައި ހެދި އެވެ. ކެމްޕޭނުގެ ދުވަސްވަރާ ދިމާކޮށް ނޫނަސް ފަހުން ފަހުން އައިސް މިފަދަ އަމަލުތައް ތަކުރާރުކޮށް ހިނގަމުން އައިސްފައިވެ އެވެ.
ނަވާރަ ސަތޭކަ ނުވަދިހަ ހަ ވަނަ އަހަރު ގަމުގައި ފިހާރަ ހިންގާ ވިޔަފާރިވެރިންތަކެއް ގަމުން ބޭރުކޮށްލެވުނެވެ. މި ވިޔަފާރިވެރިން ގަމުގައި ހިންގަމުން އައި ފިހާރަތައް ހުސްކޮށް، ގަމުން ފޭބުމަށް ދިނީ އެންމެ ހަފުތާއެއްހާ ދުވަހެވެ.
މި ގޮތަށް ބޭރުކޮށްލެވުނު ފޭދޫ އިބްރާހީމް ޒާދީއަކީ ބޭރުން މުދާ އެތެރެކޮށްގެން ވިޔަފާރިކޮށް ކުރިއެރުން ހޯދާފައިވާ މުޅި އަތޮޅަށް ވެސް މަޝްހޫރު ޒުވާން ވިޔަފާވެރިއެކެވެ.
އޭނާގެ މައްޗަށް ވެސް ތުހުމަތު ކުރި ބަޔަކު ތުހުމަތުކޮށްފައި ވަނީ ރައީސް މައުމޫންގެ ސަރުކާރަށް ފާޑުކިޔާ މީހެއްގެ ގޮތުގަ އެވެ. އެހެން ނަމަވެސް އޭނާގެ ވިޔަފާރި ހިނގަމުން ދިޔަ ގަމުގައި ސަރުކާރުން ހިންގެވި ކޮންމެވެސް ކަމެއްގައި އޭނާ އަށް އެހީތެރިވެ ދީފައިވެ އެވެ.
އަޅުގަނޑުގެ ނުހަނު ގާތް ރަހުމަތްތެރިއެއް ކަމަށްވާ ޒާދީ 1993 ވަނަ އަހަރު އޮތް ރިޔާސީ އިންތިހާބުގައި ވޯޓްލާން ދިޔައީ އަޅުގަނޑާ އެކުގަ އެވެ.
ހިތާ ދެކޮޅަށް ނަމަވެސް އޭނާ ވޯޓް ދިނީ ހެޔޮ ފާހަގަ ޖަހައިގެންނެވެ. އެ ނޫން އެހެން ގޮތެއް ވެސް ނެތީ އެވެ. ވޯޓް ކަރުދާސްކޮޅުގައި ފާހަގަ ޖެހުން އޮތީ އެއަށް ވުރެ "ދެ ފުށް ފެންނަ" ކަހަލަ ގޮތަކަަށެވެ.
ވޯޓްގެ ކަންތަކުގައި އެހީތެރިވެ ދިނުމަށް، ވޯޓް ލުން އޮތް ދުވަހު ބޭނުން ކުރަން އޭނާގެ ދެ ކާރު ވެސް ދޫކޮށްފައި އޮތެވެ. އަދި ބޯ ފެނާއި ސައިގެ ކަންތައް ވެސް ހަމަޖައްސައިދީ، އެތަކެއް ހަރަދު ވެސްކޮށްފައިވެ އެވެ. ނަމަވެސް އާހިރުގައި އޭނާ ވެސް ލޭބަލްވީ ދެކޮޅުވެރިއަކަށެވެ.
އަބްދުﷲ ހަމީދުގެ އެޓޮލްސް މިނިސްޓަރުގެ ކަމުގެ ދުވަސްވަރު އައްޑު އަތޮޅު ރައްޔިތުންގެ މަޖިލީހުގެ މެމްބަރުކަން ކުރެއްވި ހިޔަލީ މުހައްމަދު ރަޝީދުކީ އައްޑޫގައި ވަރަށް ބޮޑު ނުފޫޒެއް ލިބިވަޑައިގެން ހުންނެވި ބޭފުޅެކެވެ. އެސްޓީއޯ އިން އައްޑޫގައި ކުރަމުންދާ ވިޔަފާރި އާ ހަވާލުވެ ހުންނެވި އިސް ވެރިއެއްގެ ހައިސިއްޔަތުން އެ ބޭފުޅާވީ ގިނަ ބަޔަކަށް ހެޔޮ ފަސޭހަ ލިބިދެވޭ ފަދަ މަގާމެއްގައި ހުންނެވި ބޭފުޅަކަށެވެ.
އެކަން ވެފައި އޮތީ ވެސް އެހެންނެވެ. އެސްޓީއޯގެ ވަޒީފާތަކުގައި މަސައްކަތް ކުރި އެންމެންހެން ފެންނަމުން ދިޔައީ އިންތިހާބްތަކުގައި އެ ބޭފުޅާގެ ރުހުން ލިބޭ ރޯލެއް ކުޅެމުން ދިޔަ ތަނެވެ.
ހިޔަލީގެ ކެމްޕޭނުގައި އެހީތެރި ނުވާ، އެސްޓީއޯ އާއި ސްޓެލްކޯ އަދި އޭޑީއޭގެ ބައެއް މުވައްޒަފުން ވަރަށް އިހާނެތި ގޮތަކަށް ވަޒީފާތަަކުން ބޭރު ވެސް ކޮށްލެވިފައިވެ އެވެ.
އެ ދުވަސްވަރު އެސްޓީއޯ އާއި ސްޓެލްކޯ (އެމްއީބީ) އަދި އޭޑީއޭ ހިންގެވީ ސީދާ ރައީސް މައުމޫންގެ ކޮއްކޯފުޅު ހަމީދާއި ޔާމީންގެ ބެލެހެއްޓެވުމުގެ ދަށުންނެވެ. ހިޔަލީއަކީ އެ ބޭފުޅުން ނުހަނު އިތުބާރު ކުރައްވާ ގާތް ބޭފުޅެކެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.