(މާޗް 27، 2014 ވަނަ ދުވަހުގެ ބަޔާ ގުޅޭ)
ނަމަވެސް 1992 ވަނަ އަހަރު ވަރަށް ހައިރާންވާ ފަދަ ގޮތަކަށް ފެނިގެން ދިޔައީ ހިޔަލީ ރަޝީދަށް ތާއީދު ކުރާ ފޭދޫގެ އެންމެ އިސް ކެމްޕޭން ޓީމް އެއްކޮށްހެން ރަށުން ބޭރުކޮށްލެވުނު ތަނެވެ.
އިންތިހާބު ބޯމަތި ވަމުން އަންނަނިކޮށެވެ. މިގޮތުން މާލެ ގެންގޮސް، ޖަލުގައި ހައްޔަރު ކުރި މި އެންމެންގެ މައްޗަށް ވެސް ތުހުމަތު ކުރެވިފައި ވަނީ ސަރުކާރާއި ރައްޔިތުންނާ ޖެހޭ ފަދަ ގޮތަކަށް ފިތުނަ ފަސާދަ އުފައްދަބް މަސައްކަތް ކުރި ކަމުގެ މައްސަލަ އެވެ.
ސަރުކާރުން އައްޑޫ ރައްޔިތުންނަށްކޮށް ދެއްވުމަށް މަސައްކަތް ކުރައްވާ ކަންތައްތަކުގެ ވާހަކައިންނެވެ. ގަން އެއާޕޯޓް ތަރައްގީ ކުރުމާއި ވިލިގިލި ރިސޯޓަށް ހެއްދެވުމަށް ކުރައްވާ މަސައްކަތްޕުޅަކީ އޮޅުވާލާފައި ބޭތިއްބުމަށް ދައްކަވާ މަކަރުވެރި ވާހަކަފުޅެއް ކަމަށެވެ.
މިއީ ވޯޓްގެ ދުވަސްވރު އާންމުކޮށް ދެކެވޭ ވާހަކަތަކެވެ. ވީމާ މިފަދަ ވާހަކަތަކެއްގެ ސަބަބުން "ސިއްރުން ނަމަވެސް" އެހާ ދެރަ ގޮތެއް މެދުވެރި ވެދާނެއޭ ހީކުރެވިފައެއް ނެތެވެ. ވާހަކަ ދައްކާ މީހުން ފާޑު ކިޔައި ހަދަނީ ރައްކާތެރިވެގެންނެވެ.
އެހެން ނޫނަސް މި ފަހަރު ޖަލަށް ދާން ޖެހުނު ގިނަ މީހުންނަކީ އެޓޮލްސް މިނިސްޓަރު ހަމީދުގެ ފަރާތްޕުޅުން ވެސް، ރިޔާސީ އިންތިހާބުފެ ދުވަސްވަރު ވޯޓްގެ ދާއިރާ ބަލަހައްޓައި، ވޯޓް ލާން ދާ މީހުންނަށް އެހީތެރިވެ ދޭން ތިބި މީހުންނެވެ. ސަރުކާރަށް ވަފާތެރި ތެދުވެރިންނެވެ. މީގެ ތެރޭގައި ފޭދޫ ކަތީބު ވެސް ހިމެނެ އެވެ.
މި ފަހަރު ދިމާވީ އެހެން ގޮތެކެވެ. އަތޮޅުވެރިއަކަށް ހުންނެވީ މާލޭގެ ބޭފުޅެއް ކަމަށްވާ ހައިވަކަރު އަހުމަދުފުޅެވެ. އެ ބޭފުޅާއަކީ ހަމީދުގެ ދުވަސްވަރު އަތޮޅުތެރޭގައި ކަން ކުރެއްވި އުސޫލްތަކާއި އަދި ސިޔާސަތާ އެހާ ރުހިވަޑައިގަންނަވާ ބޭފުޅެއް ނޫނެވެ. ހަމީދު ރުހުން ދެއްވާ ބޭފުޅެއް ވެސް ނޫނެވެ.
އެހެންވުމުގެ ސަބަބުން ހަމީދުގެ އެންމެ އަރިސް ބޭފުޅުންނާއި އަހުމަދުފުޅާ އެހާ ގާތެއް ނޫނެވެ. ވުމާ އެކު ހިޔަލީ ރަޝީދާއި އޭނާގެ ގާތް މީހުން ވެސް ވީ އަހުމަދުފުޅުގެ އަތޮޅުވެރިކަމަސް ފާޑު ކިޔާ މީހުންނަށެވެ.
ނަތީޖާއެއްގެ ގޮތުން މ ފަހަރު ޖަލަށް ލެވުނު ހިޔަލީ ރަޝީދުގެ އެކުވެރިންގެ މައްސަލަ ވެސް ވީ މި ދެބަސްވެރިވުމުގެ ތެރޭގައި ހިނގައި ދިޔަ ސިޔާސީ ކޯޅުމަކަށެވެ. ޖަލުގެ ވަރަށް އަނިޔާވެރި ދުވަސްވަރެއްގައި މަސް ދުވަސް ފަހުން މި އެންމެން ދޫކޮށްލީ އެއްވެސް ކުށެއް ނެތް ބައެއްގެ ގޮތުގަ އެވެ.
ހަގީގަތުގައި ވެސް އެއީ ސަރުކާރަށް ވަފާތެރި ބައެކެވެ. ސަރުކާރުގެ އެކި ކަންކަމުން މަދަދު ލިބެމުން ދިޔަ މީހުންނެވެ. މިހާ ދެރަ ގޮތެއް މެދުވެރިވީ އެ މީހުންގެ އެއްވެސް ކުށެއް އޮވެގެން ކަމަކަށް ނުވި އެވެ. ޖަލުން ދޫކޮށްލެވުނު ކަތީބަށް އަހުމަދުފުޅުގެ އަތޮޅުވެރިކަމުގައި ފޭދޫގެ ބޮޑު ކަތީބުކަން ދެއްވުމުން އެކަން ސާބިތުވެގެން ދިޔަ އެވެ.
މިއީ އެ ދުވަސްވަރު ސިޔާސީ ހަޖުލެއްގެ ގޮތުގައި މުނިފޫހިފިލުވުމަށް މީހުން ކިޔައި އުޅުނު ހަގީގީ ވާހަކައެކެވެ. އަދި މިއީ އެ ދުވަސްވަރު އަތޮޅު ތެރޭގެ ސިޔާސީ ހަރަކާތްތައް ހުރި ގޮތެވެ. އިންތިހާބުތައް ހިނގަމުން ދިޔަ ގޮތެވެ.
ދެން އޮތީ ކަތީބުންގެ ފަރާތުން ވޯޓް ފޮށީގައި ބަނޑު އަޅުއްވާ ވާހަކަ އެވެ. ފާހަގަ ޖަހާފައިވާ ވޯޓް ކަރުދާސްކޮޅުތައް ފޮށްޓަށް ވެއްޓުމަށް މީހުންނާ ހަވާލު ކުރި ވާހަކަ އެވެ. އެއީ އެންމެން ދަންނަ ސިއްރެކެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.