އައްޑޫ ސިޓީ ހިތަދޫގައި ހުންނަ ހިރާ ސްކޫލުން އޯލެވެލް އިމްތިހާނު ހެދި ހުރިހާ ދަރިވަރުން އޭ ފާސް ހޯދައިފި އެވެ.
މިއީ ހިރާ ސްކޫލުން އޯ ލެވެލް ހެދި ފުރަތަމަ ބެޗެވެ. އެ ބެޗްގައި ހިމެނެނީ ފިރިހެން ދަރިވަރަކާއި ހަ އަންހެން ދަރިވަރުންނެވެ.
އެގޮތުން މި ދަރިވަރުން ވަނީ ހުރިހާ މާއްދާ އަކުން އޭ ނުވަތަ އޭ ސްޓާ ހޯދައިފަ އެވެ.
މީގެ އަހަރުތަކެއް ކުރިން 50 ދަރިވަރުންނާ އެކު ފެށި ހިރާ ސްކޫލްގައި މިހާރު 300 އަށް ވުރެ ގިނަ ދަރިވަރުން ތައުލީމު ހާސިލުކުރެ އެވެ. ހިރާ ސްކޫލުގެ އަމާޒަކީ އެކާވީސް ވަނަ ޤަރުނުގެ ގޮންޖެހުންތަކާއި ކުރިމަތިލެވޭފަދަ، ފެންވަރު ރަނގަޅު ތަޢުލީމެއް ފޯރުކޮށްދީގެން، ޤާބިލު، ދިވެހި، މުސްލިމު ޖީލެއް ބިނާކުރުމެވެ.
މިއަހަރުގެ އޯލެވެލް އަދި އެސްއެސްސީ އިމްތިހާނުގެ ނަތީޖާ މިއަދު ދޫކުރަން ފަށާފައިވާއިރު މިއަހަރުގެ ޖީސީއީ އޯލެވެލް އިމްތިހާނުގައި 236 ސެންޓަރަކުން 5936 ދަރިވަރުން ބައިވެރިވެފައިވެ އެވެ. އަދި އެސްއެސްސީ އިމްތިހާނުގައި 233 ސެންޓަރަކުން 5640 ދަރިވަރުން ބައިވެރިވެފައިވެ އެވެ.