އަންނަ މެއި މަހުގެ ނުވަ ވަނަ ދުވަހު ރިލީޒް ކުރަން ހަމަޖެހިފައިވާ އިންޑިއާގެ ފުރަތަމަ ސްކޭޓިން ފިލްމް "ހަވާ ހަވާއީ" ގެ ޓްރެއިލާ ލޯންޗްކޮށްފި އެވެ.
ފޮކްސް ސްޓާ ސްޓޫޑިއޯ އިން ޕްރޮޑިއުސްކޮށްފައިވާ މި ފިލްމަކީ މީގެ ކުރިން ވެސް ކުޑަކުދިންގެ ފިލްމްތަކެއް ހަދާފައިވާ އެފަދަ ދެވަނައެއް ނެތް އަމުލް ގުޕްތޭ ލިޔެ، ޑައިރެކްޓްކޮށްފައިވާ ފިލްމެކެވެ.
އޭނާއަކީ އެތައް ބައެއްގެ ހިތްތަކާ ކުޅެލި "ތާރޭ ޒަމީން ޕަރް" ލިޔެ، އެ ފިލްމުގެ ކްރިއޭޓިވް ޑައިރެކްޓަރުގެ ރޯލް އަދާ ކުރި ފަންނާނެވެ. އަދި ފަހުން އަމުލް ވަނީ އޭނާގެ ފިރިހެން ދަރިފުޅު ޕަރްތޯ ގުޕްތޭ ލީޑް ރޯލަށް ލައިގެން ވެސް ގިނަ ބައެއްގެ މަގުބޫލަކަން ހޯދި ފިލްމެއް "ސްޓޭންލީކާ ޑައްބާ" ގެ ނަމުގައި ގެނެސް ދީފަ އެވެ.
"ހަވާ ހަވާއީ" އަކީ އެ ފިލްމަށް ފަހު އަމުލް ގެނެސްދޭ ފުރަތަމަ ފިލްމެވެ. މި ފިލްމުގައި ވެސް ލީޑް ރޯލުން ވެސް ފެނިގެން ދާނީ ޕަރްތޯ އެވެ. އޭނާ ފެނިގެން ދާނީ ސްކޭޓިން އިން ކުރިއަށް ދިއުމުގެ ހުވަފެން ދެކެމުން އަންނަ އާދައިގެ ނިކަމެތި ކުއްޖެއްގެ ރޯލުންނެވެ.
ފިލްމުގައި އުޅޭ ކުޑަކުދިންގެ ސްކޭޓިން ކޯޗުގެ ގޮތުގައި ފެނިގެން ދާނީ "މޭރޭ ޑޭޑް ކީ މަރޫތީ" ގެ އެކްޓަރު ސާގިބް ސަލީމެވެ.