(މާޗް 29، 2014 ވަނަ ދުވަހުގެ ބަޔާ ގުޅޭ)
ބަދަލުވަމުން އައި ސިޔާސީ ހާލަތު
ގަމުގައި ހިންގި ފެކްޓްރީތައް ހުޅުވިގެން ދިއުމުގެ ސަބަބުން އެތަކެއް ސަތޭކަ ވަޒީފާގެ ފުރުސަތު އުފެދިގެން ދިޔަ އެވެ. އަދި ބަޔާންވެ ދިޔަ ފަދައިން ފެކްޓްރީތައް ހިންގުމަށްޓަކައި ސަރުކާރުން ފަހިކޮށް ދެއްވަން ޖެހިވަޑައިގެންނެވި އެއްގަމާއި ކަނޑާއި ވައިގެ ދަތުރުފަތުރާއި ހޮސްޕިޓަލާއި ބެންކް ފަދަ އަސާސީ ހިދުމަތްތައް އާންމުވެގެން ދިޔަ އެވެ.
މި ވަސީލަތްތަކަކީ އެއާ ނުލައި އިންޑަސްޓްރީއަކަށް ދެމި ނުއޮވެވޭނެ ހިދުމަތްތަކެވެ. މި ވަސީލަތްތައް ގާއިމުވެގެން ދިއުމާ އެކު ވިޔަފާރީގެ އިތުރު ފުރުސަތުތައް ހުޅުވިގެން ދިޔަ އެވެ.
ދުޅަހެޔޮ ސިއްހަތެއްގެ ބިންގާ އެޅިގެން ދިޔަ އެވެ. ސަރުކާރުގެ ވިޔަފާރި ކުންފުނި އެސްޓީއޯގެ ވިޔަފާރި ފެށުނެވެ. ތެލާއި ކާޑާއި އިމާރާތް ކުރަން ބޭނުންވާ ސާމާން ތަންކޮޅެއް ސަހަލު އަގުގައި އަތްފޯރާ ފަށުން ގަންން ލިބޭނެ ދޮރު ހުޅުވިގެން ދިޔަ އެވެ. ވަޒީފާގެ ބޭނުމުގައި ރަށް ދޫކޮށް ފުރައިގެން ދިޔަ ބައެއް މީހުން ނަމަވެސް އެނބުރި އަންނާން ފެށި އެވެ.
މިފަދައިން އަތޮޅުތެރޭގެ ހާލަތު ރަނގަޅުވަމުން ދިޔަ އިރު، ސިޔާސީ މަސްރަހުގައި ނަގާ ބޯމަތި ކުރަމުން ދިޔަ ކަޅުވިލާތަކުގައި ތޫފާނެއްގެ އަސަރު ހުރިކަން އެނގޭނީ މޫސުން ދަންނަ ބަޔަކަށްތާ އެވެ. އިސާހިތަކު ސަރުކާރުގެ ރީތި ތަނަވަސް ނޫ އުޑެއްގައި ދަތުރު ކުރަމުން ދިޔަ ކަފަ ވިލާތައް އެއްވެ، ބޯވެ، ކަޅުވެގެން ވިދުމާއި ގުގުރީން މުޅި ކާއިނާތު ބަދަލުކޮށްލި އެވެ.
އައްޑޫގެ ތަރައްގީ އަށް ޓަކައި އުފެއްދެވި އޭޑީއޭ ގަމުގައި ވިޔަފާރި ފެށި އެސްޓީއޯ އާ ޖެހުނީ އެވެ. އޭޑީއޭގެ ޗެއާމަން އަދި އެޓޮލްސް މިނިސްޓަރު ހަމީދާއި އެސްޓީއޯގެ ޗެއާމަން އަދި ޓްރޭޑް މިނިސްޓަރު އިލްޔާސާ ޖެހިވަޑައިގަތުމުންނެވެ.
ހަމީދަށް ތާއީދު ކުރައްވާ ރަށްރަށުގެ ވެރިންނާއި ކަމޮށިވެގެންވާ ބޭކަލުން، މެހު އެއްޗެތިކޮޅު ދެއްވާ ހަނފު ބޭކަލުންނަށް ވެ ދިޔައީ އެވެ.
އިލްޔާސަށް ތާއީދު ކުރައްވާ ގަމުގައި ތިއްބެވި ބޭކަލުންނާއި ފެކްޓްރީތަކުގެ އިސް މުވައްޒަފުންނާއި ގަން އެއާޕޯޓް ހިންގެވުމާ ހަވާލުވެގެން ތިއްބެވި އިސް ބޭކަލުންނާއި އަދި ނަން މަޝްހޫރު ވިޔަފާރިވެރިން އެ ދާއިރާތަކުން ބައި އެޅޭ ނަފާވެރިންނަށް ވެ ދިޔައީ އެވެ.
ސަރުކާރު އައްޑޫގައި ހިންގަވަން ރޭއްވެވި މަޝްރޫއުތަކާއި ކުރައްވަން ފަށްޓަވާ ބިންގާ އެޅުއްވި ކޮންމެ ކަމެއްގައިމެ ފިތުނައިގެ ސުންޕާކަން ޖެހިފައިވެ އެވެ. ނަތީޖާއަކަށް ވެގެން ދިޔައީ އެތަކެއް އަހަރު ވަންދެން ވިލިގިލި ރިސޯޓް ހައްދަވަން އިއުލާން ކުރައްވައި، ނަތީޖާއެއް ނުފެނި ބޭކާރުވެ ދިއުމެވެ.
އޭގެ ސަބަބުން އަނބިދަރިންނާއި އެތަކެއް ހާސް ދުރު ރިސޯޓްތަކުގައި ވަޒީފާ އަދާ ކުރަމުންދާ އައްޑޫ މީހުން ރައީސް މައުމޫނަށް ކުރި އިތުބާރު ގެއްލިގެން ދިޔައީ އެވެ.
ތައުލީމީގެ ރެފިއުޖީންގެ ގޮތުގައި މާލެތެރޭގައި ބިކަ ހިނގަން ޖެހުނު ދުވަސްވަރު، އެހާ ރަނގަޅަށް އިސްލާމީ ތައުލީމް ދެމުން އައި ދަރުމަށް ކިޔަބައިދޭ އިސްލާމިއްޔާ އާ މެދު ކަންތައް އެހި ހިނގި ދެރަ ގޮތާ މީހުން ތިބީ ހިތްހަމަނުޖެހިފަ އެވެ.
މި ދުވަސްވަރު ފައިދާ ހުރި ގޮތުގައި ގަން ވިޔަފާރި އުސޫލުން ހިންގާނެ ފަރާތެއް ހޯދަން އިންޓަނެޝަނަލް ބިޑަކަށް ގޮސް، އަލި މަގެއް ނުފެނުނެވެ. ބަންކަރިން ޕޯޓެއް ހެއްދެވުމަށް މަސައްކަތްފުޅު ކުރައްވައި، އެކަމެއް ނިމިގެން ދިޔަ ގޮތެއް ވެސް ނޭނގެ އެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.