އަލީ ރަމީޒަކީ އޭނަގެ ބޮޑު ފޭންބޭސްއެއް އައްޑޫގައި ވެސް އޮތް ތަނެކެވެ. ހާއްސަކޮށް އޭނާ ލަވަކީ ދުވަސްވަރު އެވެ. އޭރު އައްޑޫގައި އަލީ ރަމީޒްގެ "ފްރީޒް" ބޭންޑުން ޝޯތަކެއް ވެސް ދީފައިވެ އެވެ. އަދި އޭނަ އަކީ އައްޑޫ ބަހުން ލަވަތަކެއް ވެސް ކީ ފަންނާނެކެވެ. އޭގެ ތެރޭގައި "ފިނިފިނި ރެއަކަށް" ފާހަގަކޮށްލެވެ އެވެ.
އެކަމަކު މިހާރު އަލީ ރަމީޒްގެ ވާހަކަ މިހާރު ދައްކަން އޮތީ ލަވައާ މިއުޒިކާ ގުޅުވައިގެނެއް ނޫނެވެ. އިސްލާމް ދީނަށް އޭނަ ކުރާ މަސައްކަތްތަކާ ގުޅުވައިގެންނެވެ. ދީން ފެތުރުމަށް ކުރާ މަސައްކަތްތަކާއި ހާއްސަކޮށް ރާއްޖޭގެ އެކި ހިސާބުތަކުގެ ޒުވާނުން ދީނަށް އަހުލުވެރިކުރިވަން ކުރާ މަސައްކަތުގަ އެވެ.
އެގޮތުން ރޭ އައްޑޫ ހުޅުމީދޫގައި މަޝްހޫރު ދީނީ އިލްމުވެރިޔާ އަހުމަދު ސަމީރުގެ ދަރުހެއް ބޭއްވި އިރު، އެ ދަތުރުގެ ޓީމްގައި އަލީ ރަމީޒް ވެސް ހިމެނެ އެވެ. މި ދަތުރުގެ ފާހަގަކުރެވުނު އެއް ކަމަކީ އަލީ ރަމީޒް ނެގި އައްޑޫގެ ބައެއް ފޮޓޯތަކާއި ވީޑިއޯ އެވެ. މި އެއްޗެހި އޭނަގެ ސޯޝަލް މީޑިއާ އެކައުންޓްތަކުގައި ވެސް ޕޯސްޓްކޮށްފައިވެ އެވެ.
އެހެންވެ އަލީ ރަމީޒް ފޮލޯކުރާ އައްޑޫ މީހުންނަށް މިއީ ޔަގީނުން ވެސް ހަމަ ހާއްސަ ކަމަކަށް ވެދާނެ އެވެ.
އޭނަގެ ލެންސަށް އެރި ތަންތަނުގެ ތެރޭގައި މީދޫ މަތިކިޅި އާއި އައްޑޫ ނޭޗާ ޕާކާއި މީދޫގެ "ޒުވާން ދަނޑުވެރިޔާ" ހުސައިން ރަމްޒީގެ ދަނޑުގެ މަންޒަރުތަކެއް ވެސް އަލީ ރަމީޒް ވަނީ އައްޑޫ ދަތުރުގެ ހަނދާނަކަށްޓަކައި ރައްކާކޮށްފަ އެވެ.