މަހުމާ ހުސައިން ރަޝީދު ޕްރޮޑިއުސްކޮށްފައިވާ ފިލްމް "ފިރިއެއްގެ ލޯބި" އަންނަ މެއި މަހޫ ރިލީޒް ކުރާ ގޮތަށް ހަމަޖައްސައިފި އެވެ.
މިއީ 1997 ވަނަ އަހަރު ނިކުތް ކާމިޔާބް ހިންދީ ފިލްމް "ޖުދާއީ" ގެ މައްޗަށް ބިނާކޮށް ހަދާފައިވާ ފިލްމެކެވެ.
"ފިރިއެއްގެ ލޯބި" ގައި ލީޑް ރޯލް ކުޅެފައި ވަނީ މުހައްމަދު މަނިކާއި އޭނާގެ އަންހެނުން ޝީލާ ނަޖީބުގެ އިތުރުން އައިމިނަތު އާޒިފާ (އަޒޫ) އެވެ.
ފައިސާގެ ދަހިވެތިކަމުގައި ފިރިމީހާ އެހެން އަންހެނަކަށް "ވިއްކާލުުމުން" އާއިލާއެއްްގެ ތެރޭގައި ހިނގާ ހާދިސާތަކެއް ދައްކުވައިދޭ "ޖުދާއީ" އަށް ބިނާކޮށް ހަދާފައިވާ "ފިރިއެއްްގެ ލޯބީ" ގައި ސްރީދޭވީ ކުޅުނު ރޯލުން ފެނިގެން ދާނީ ޝީލާ އެވެ.
އަދި އަނިލް ކަޕޫރުގެ ރޯލުން، މަނިކު ފެނިގެންދާ އިރު، އުރުމިލާ މަޓޯންޑްކަރުގެ ރޯލުން ފެނިގެން ދާނީ އަޒޫ އެެވެ.
މީގެ އިތުރުން މި ފިލްމުގެ މުހިއްމު ރޯލަކުން އަހުމަދު ނިމާލު ވެސް ފެނިގެން ދާނެ އެވެ.
މި ފިލްމް މެއި މަހު ސިނަމާއަށް ގެންނަން ނިންމި ނަމަވެސް، އަދި ވަކި ތާރީހެއް ހަމަޖައްސައިފައެއް ނުވެ އެވެ.
އޮލިމްޕްހުގައި މިހާރު ދައްކަމުން އަންނަ އަހަރުގެ ފުރަތަމަ ފިލްމް "އަނިޔާ" އަކީ ވެސް މަހުމާ ހުސައިން ޕްރޮޑިއުސްކޮށްފައިވާ ފިލްމެކެވެ.