ޗޮކްލެޓާއި ޔޯގަޓް ފަދަ އެއްޗެހި ވެސް ހިމެނޭ ގޮތަށް ސްރީ ލަންކާ އިން 300 އަށް ވުރެ ގިނަ ބާވަތެއްގެ ތަކެތި އެ ގައުމަށް މި ދަނޑިވަޅުގައި އެތެރެކުރުން މަނާކޮށްފި އެވެ.
މި އަހަރުގެ ކުރީކޮޅުން ފެށިގެން މާލީ އަދި އިގުތިސާދީ ބޮޑު ތަދުމަޑުކަމެއްގެ ތެރެއަށް ވެއްޓި ކާބޯތަކެއްޗާއި އަސާސީ ވަރަށް ގިނަ ތަކެއްޗަށް ޖެހި، ތަކެތީގެ އަގު ވެސް އިންތިހާ އަށް އުފުލައިފައި ވަނިކޮށް 300 އަށް ވުރެ ގިނަ ބާވަތެއްގެ ތަކެތި މި ވަގުތަށް ގައުމަށް އެތެރެކުރުން މަނާކުރީ ފިނޭންސް މިނިސްޓަރުގެ މަގާމު ވެސް އަދާކުރައްވަމުން ގެންދަވާ ރައީސް ރަނިލް ވިކްރަމަސިންގް އިއްޔެ ނެރުއްވި ސާކިއުލާއަކުންނެވެ.
އޭގައި ބުނެފައިވާ ބޭރުގެ ފައިސާގެ ދަތިކަން ވެސް އިންތިހާ އަށް ކުރިމަތިވެފައިވާ ލަންކާ އަށް މި ވަގުތު އެހެން ގައުމުތަކުން އެތެރެކުރަން ޖެހެނީ އާންމު ދިރިއުޅުމަށް ބޭނުންވާ އެންމެ އަސާސީ ތަކެތި ކަމަށެވެ.
އެހެންވެ ޗޮކްލެޓާއި ޔޯގަޓް ފަދަ ތަކެއްޗާ އެކު އެތެރެކުރަން މަނާކުރި ލިސްޓްގައި ކޮސްމެޓިކްގެ ގިނަ ބާވަތްތައް ވެސް ހިމެނެ އެވެ. އޭގެ ތެރޭގައި މޭކަޕްކުރާ ސާމާއި ޝޭމްޕޫ އާއި ސެންޓް ފަދަ ތަކެތި ވެސް ހިމެނެ އެވެ.
މީގެ އިތުރުން އެ ލިސްޓްގައި ދިޔާ ކާށިކިރާއި އެކި ބާވަތްތަކުގެ ދަބަހާއި ފޮއްޓާއި ކުޅިވަރު ކުޅޭ ސާމާނާއި މިއުޒިކް ކުޅޭ ސާމާނާއި ކެމެރާ އަދި ސިނގިރެޓް ފަދަ އެތައް އެއްޗެހި ހިމެނެ އެވެ.
އިއްޔެ އިން ފެށިގެން ފިނޭންސް މިނިސްޓްރީގެ ސާކިއުލާ އަށް އަމަލުކުރަން އަންގާފައިވާ އިރު، އެތެރެކުރަން މަނާކުރި ލިސްޓްގައި ހިމެނޭ ބާވަތްތަކުގެ ތެރެއިން ކުރިން އޯޑަރުކޮށްފައި ހުރި ޝިޕްމަންޓް އަންނަ މަހުގެ 14 ކުރިން ކަސްޓަމްސް އިން ކްލިއާކުރަން ވެސް އަންގާފައިވެ އެވެ.
ނަމަވެސް މި ސާކިއުލާގެ މުއްދަތު ކިހާ ދުވަހެއް ކަމެއް ހާމަކޮށްފައެއް ނުވެ އެވެ.