އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައި ވާ ގޮތުގެ މަތިން، ރައްޔިތުންނަށް އާންމުކޮށް ހުޅުވާލައިގެން މިދިޔަ މަހު ބައްދަލުވުން ބޭއްވި 15 ކައުންސިލްގެ ތެރޭގަަަަައި އައްޑޫ ސިޓީ ކައުންސިލް ހިމެނި ކުރިން ނުލިބޭ "ޝަރަފެއް" ހޯދައިފި އެވެ.
މުޅިން ވެސް އިދިކޮޅު އެމްޑީޕީ އަށް ނިސްބަތްވާ ކައުންސިލަރުން ތިއްބަވާ އައްޑޫ ސިޓީ ކައުންސިލަކީ ފުރަތަމަ ދައުރުގައި، ބައްދަލުވުންތައް ނުބާއްވައިގެން ވަރަށް ގިނަ ބައެއްްގެ ފާޑު ކިޔުންތައް އަމާޒުވެފައިވާ ކައުންސިލެކެވެ.
އެހެން ނަމަވެސް މި އަހަރު އެެއްވެސް ބަޔަަކަށް ޝަކުވާ ނުުރެވޭ ވަަރަށަ އަދި ގާނޫނުގައި ބުނާ ވަރަށް ވެސް އިތުރަށް ބައްދަލުވުންތައް އާންމުންނާ އެކު ބާއްވާނެ ކަަމަށް ކައުންސިލަރުން ހުވާ ކުރުމުގެ ރަސްމިއްޔާތުގައި ބުނެފައިވެ އެވެ.
ލޯކަލް ގަވަރަމަންޓް އޮތޯރިޓީ (އެލްޖީއޭ) އިން ބުނީ ލާމަރުކަޒީ ގާނޫނުގެ 110 ވަނަ މާއްދާގައި ވަނީ، ރައްޔިތުންނަށް އާންމުކޮށް ހުޅުވާލާފައިވާ ބައްދަލުވުމެއް، ކޮންމެ އަހަރެެއްގެ ފެބްރުއަރީ މަހާއި ޖުލައި މަހު ސިޓީ ކައުންސިލްތަކުންނާއި ރަށު ކައުންސިލްތަކުން ބާއްވަން ޖެހޭ ކަމަށެވެ.
މީގެ ތެރެއިން ފެބްރުއަރީ މަހުގެ ބައްދަލުވުމުގައި، ފާއިތުވި އަހަރުގެ އަހަރީ ރިޕޯޓާއި މާލީ ރިޕޯޓް އަދި އޮޑިޓް ރައްޔިތުންނަށް ހުށަހަޅަން ވާނެ ކަމަށް ގާނޫނުގައިވެ އެވެ. ޖުލައި މަހުގެ އާންމު ބައްދަލުވުމުގައި ކުރަން ވާނެ ކަމަށް ގާނޫނުގައި ބުނަނީ، ކައުންސިލްގެ ކުރިއަށް އޮތް އަހަރުގެ ތާވަލާއި ބަޖެޓް ރައްޔިތުންނަށް ހުށަހަޅައި ހިޔާލު ހޯދުމެވެ.
އެލްޖީއޭ އިން ބުނި ގޮތުގައި ގާނޫނުގައިވާ ގޮތުގެ މަތިން އާންމުންނަށް ހުޅުވާލައިގެން މިދިޔަ މަހު ބައްދަލުވުން ބޭއްވީ އައްޑޫ ސިޓީ ކައުންސިލްގެ އިތުރުން ބ. ކަމަދޫ ކައުންސިލާއި ގދ. ތިނަދޫ ކައުންސިލާއި ފުވައްމުލަކު ދަޑިމަގު ކައުންސިލާއި ހއ. ފިއްލަދޫ ކައުންސިލާއި ނ. ހޮޅުދޫ ކައުންސިލާއި ރ. ކިނޮޅަހު ކައުންސިލާއި ހދ. ވައިކަރަދޫ ކައުންސިލާއި ތ. ވިލުފުށީ ކައުންސިލާއި އއ. ހިމަންދޫ ކައުންސިލާއި ހއ. އުތީމް ކައުންސިލާއި ފުވައްމުލަކު މާލެގަން ކައުންސިލާއި ފުވައްމުލަކު މާދަނޑު ކައުންސިލާއި ރ. މަޑުއްވަރީ ކައުންސިލް އަދި ހދ. ކުމުންދޫ ކައުންސިލެވެ.
އެލްޖީއޭ ވަނީ އެ 15 ކައުންސިލްތަކުގެ ގާނޫނީ ޒިންމާ އަދާކޮށްފައިވާތީ އާއި ކައުންސިލްގެ މަސައްކަތްތަށް ފާހަގަކޮށް، މަރުހަބާ ވެސް ކިޔައިފަ އެވެ.