(މާޗް 30، 2014 ވަނަ ދުވަހުގެ ބަޔާ ގުޅޭ)
އައްޑޫގެ ތަރައްގީއަށާއި މި ގައުމުގެ އިގުތިސާދީ ފައިދާއަށްޓަކައި އައްޑޫގައި ކުރައްވަން ނިންމެވި މިފަދަ އެތައް ކަމެއް ކީހާ ޅެން ފަރިއްސަށް ވެ ދިޔައިމާ އެ ދޫތަކުން މައުމޫނަށް ތައުރީފާއި ސަނާގެ ބަސްތައް އޮއްސި ދޫތަކުގެ ބަސް ފުރޮޅިގެން ދިޔައީ އެވެ. ނަފްރަތަށެވެ.
އެހެން އެވީ ބޭސް ސިޓީ އަށް ސަލާން ޖަހަން ވެސް މެދުވެރިވީމަ އެވެ. ދެރައިި އިއްޔެ ރައީސް މައުމޫން ހިންގެވި މަގަށް ފިނިފެންމާތަކުން ސްކޫލް ޔުނިފޯމްގައި ނެރުނު ކުޑަ ކުދިން މިއަދު ބޮޑެތި މީހުންގެ ގޮތުގައި މައިންބަފައިންނަށް ވެ ދިޔައީ އެ ވެރިކަމަށް ނަފުރަތު ކުރާ ރައްޔިތެއްގެ ގޮތުގައި ކަމަށްވީ ކަމެވެ.
ހިތާމައަކީ އިއްޔެ ގައުމީ ރޫހުގައި ރައީސް މައުމޫން ވަޑައިގެންނެވި މަގުތަކަށް ދޮން ވެލި ލައި، ދިދަފަތި ދަމައި އުޅުނު ޒުވާނުން މާޔޫސްވެ، އިތުބާރު ގެއްލި ދިޔަ ފަހުން ހަރު މީހުންނަށް ވެ ދިޔައީ އިޖުތިމާއީ ހަރަކާތްތަކުން ބުރަހެލި ރައްޔިތެއްގެ ގޮތުގައި ކަމަށްވީ ކަމެވެ.
މި ގޮތަށް ކަންތައް ހިނގުމަށް ދިގު މުއްދަތެއް ފާއިތުވެ ދިޔަ އެވެ. އެ ދުވަސްތަކުގެ ތެރޭގައި ރައީސް މައުމޫންގެ ޒައާމަތުން ހިތްހަމަޖެހުމާއި އުފާ ފާގަތިކަން ލިބުމަށް، އެދިއެދި ތިބި އެތައް ބަޔަކު އިންތިޒާރުކޮށްކޮށް ވަރުބަލި އެވެ.
މި ދުވަސްތަކުގެ ތެރޭގައި ސަރުކާރު ހިންގުމުގެ ވައްޓަފާޅި އަށް ވެސް ބަދަލުތަކެއް އަންނަމުންދާކަން ފާހަގަ ކުރެވުނެވެ. ނަމަވެސް ސަރުކާރުގެ އޮނިގަނޑަށް އަދި ހިންގުމުގެ ނިޒާމަށް ވެސް ބަދަލެއް ނާދެ އެވެ.
ފުރަތަމަ ދެ ދައުރު
ރައީސް މައުމޫނުގެ ވެރިކަމުގެ ފުރަތަމަ ދެ ދައުރު ނިމިގެން ދިޔައީ އައްޑޫ މީހުން ފޮނި އުންމީދުތަކެއްގައި އިންތިޒާރު ކުރަން ޖައްސައިފަ އެވެ. އައްޑޫގެ ތަރައްގީ އާއި ރައްޔިތުންގެ ފާގަތި ދިރިއުޅުމަށް ވެވަޑައިގެންނެވި ވައުދުތައް ފުއްދަވައި ދެއްވުމަށް މަސައްކަތް ކުރައްވަނިކޮށެވެ.
މި ދިގު މުއްދަތުގެ ތެރޭގައި އައްޑޫގެ ކުރިއެރުމާއި ތަރައްގީއަށް ޓަކައި ސަރުކާރުން ކޮށް ދެއްވުމަށް ޕްލޭން ކުރައްވައި، ރޭއްވެވި ބޮޑެތި މަޝްރޫއުތަކަށްޓަކައި ތައުރީފާއި ސަނާގެ ބަސްތައް އޮއްދި ކަތީބުންގެ އަޑު ކެނޑިއްޖެ އެވެ. އާއިލާ އާ އެކު ގެދޮރުގައި ތިބެގެން ވަަޒީފާ އަދާ ކުރެވޭނެ ދުވަހެއްގެ އިންތިޒާރުގައި އެތަކެއް އަހަރު ހޭދަ ކުރި ޒުވާނުން މާޔޫސްވެގެން ވަޒަން ދޫކޮށް ފުރަފުރައިގެން ދިޔަ އެވެ.
އޭގެ ސަބަބުން އެކަނިވެރިވި އެތަކެއް އަނބިން އެކަނިވެރި މައިންނަށްވެ ދިޔައީ އެވެ. އަޅާލާނެ ޔާރެއް ނެތް މުސްކުޅި މައިންބަފައިން ބޭސް ފަރުވާ އިން މަހުރޫމުވެފައި ތިބެގެން އެ ހާލުގައި ދުނިޔެ އަޅައި ދިޔައީ އެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.