ރަޖްނީކާންތުގެ ކުރިއަށް އޮތް ފިލްމް "ކޮޗަދައްޔާން" އަކީ އެއްގޮތަަކަށް ވެސް "ކާޓޫން ފިލްމެއް ނޫން ކަަމަށާއި އެކަމަކު އެއީ ވަަރަށް ފުރިހަމަ އެނިމޭޓެޑް ފިލްމެއް ކަމަށް" އެ ފިލްމް ޑައިިރެކްޓްކޮށްފައިވާ ރަޖްނީކާންތުގެ އަންހެން ދަރިފުޅު ސައުންދަރިއާ ރަޖްނީކާންތު ބުނެފި އެވެ.
އެ ފިލްމުގެ ޓްރެއިލާތައް އާންމު ކުރުމާ އެކު، ބައެއް މީހުންގެ ފަރާތުން ލިބެން ފެށި ފާޑު ކިއުންތަކަށް ރައްދު ދެމުން، ސައުންދަރިއާގެ ފުރަތަމަ ޑައިރެކްޝަނާ ބެހޭ ގޮތުން އޭނާ ބުނީ "ކޮޗަދައްޔާން" އަކީ އިންޑިއާގެ ފުރަތަމަ ޕާފޯމަންސް ކެޕްޗަ ރިއަލިސްޓިކް 3ޑީ އެނިމޭޓެޑް ފިލްމް ކަމަށެވެ.
"މިއީ އެއްގޮތަކަށް ވެސް ކާޓޫން ފިލްމެއް ނޫން. އަހަންނަށް ހީވަނީ އިންޑިއާ މީހުންނަށް އަދިވެސް ކާޓޫން ފިލްމްތަކާއި އެނިމޭޓެޑް ފިލްމުތަކުގެ ފަރަގު ނޭނގޭހެން،" "ކޮޗަދައްޔާންގެ ހިންދީ ވާޝަންގެ ޓްރެއިލާ ލޯންޗް ކުރަން ބޭއްވި ހަފުލާގައި ސައުންދަރިއާ އިއްޔެ ބުންޏެވެ. "މިއީ އަހަރެން ވަރަށް ލޯބިން ހަދާފައިވާ އަހަރެންގެ ހިތާ ވަރަށް ގާތް ފިލްމެއް."
ބޮލީވުޑްގެ ވަރަށް ގިނަ ފަންނާނުން ބައިވެރިވި ހަފުލާގައި ފިލްމުގެ ފުރަތަމަ ޓްރެއިލާ ލޯންޗްކޮށް ދިނީ އަމީތާބް ބައްޗަން އެވެ.
ސައުންދަރިއާ އިތުރަށް ބުނީ ކުރިއަރާފައިވާ ޓެކްނޮލޮޖީ ބޭނުންކޮށްގެން އޭނާގެ ބައްޕަގެ ޝަހުސިއްޔަތު ދައްކުވައިދޭ ފިލްމެއް ހެދުމުގެ ނަސީބު ލިބުމަކީ، ދެކެމުން ދިޔަ ހުވަފަނެއް ހަގީގަތަކަށްވުން ކަމަށެވެ.
ދީޕިކާ ޕަދްކޯން އާ އެކު ރަޖްނީކާންތު ފުރަތަމަ ފަހަރަށް ފެނިގެންދާ "ކޮޗަދައްޔާން" އަށް ރަޖްނީކާންތު ވަނި އޭނާގެ އަޑުން ލަވައެއްްް ވެސް ކިޔައި ދީފަ އެވެ.
"ބައްޕަ ކިޔާފައިވާ ލަވަަ އާ ދޭތެރޭ ވަރަށް ހިތްހަމަޖެހި އުފަލުން އަހަރެން މިހިރީ. އަދި ފިލްމެއް ލަވައެއް ކިޔައިދޭން ބައްޕަ ލައްވައި އެއްބަސް ކުރުވުން ވެސް އެހާ އުނދަގޫ ކަމަކަށް ނުވި،" ސައުންދަރިއާ ބުންޏެވެ. "އެކަމަށްޓަކައި ބައްޕަ އަށް ވަރަށް ބޮޑަށް ޝުކުރިއްޔާ."
"ކޮޗަދައްޔާން" ކުރިން ރިލީޒް ކުރަން ހަމަޖެއްސީ އަންނަ މަހުގެ 11 ވަނަ ދުވަހު އެވެ. އެހެން ނަމަވެސް ފިލްމް މިހާރު ވަނީ މެއި އެކަކަށް ފަސްކޮށްފަ އެވެ.