މި މަހުގެ 10 ވަނަ ދުވަހު ފެށުމަށް ހަމަޖެހިފައިވާ "އަލިކެފޭ ސްޓްރީޓް ސޮކަ 2013" ގެ މުބާރާތުގެ ގުރުއަތުލުން ރޭ ގަމުގައި ހުންނަނަ ޔޫތު ސެންޓަރުގައި ބާއްވައިފި އެވެ.
ޖުމްލަ 16 ޓީމަކުން ވާދަކުރާ މި މުބާރާތުގެ ގްރޫޕް އޭ ގައި ހިމެނެނީ ފްރެންޑްސް ކްލަބާއި، ޝަންގްރިއްލާ ޔުނައިޓެޑް، ހިތަދޫ ޕޮލިސް ޓީމާއި ގަމުގެ ޕޮލިސް ޓީމެވެ.
ގްރޫޕް ބީގައި ހިމެނެނީ އެމްއެންޑީއެފް އާއި، ފޭދޫ އެފްއާރްޓީ އާއި، ހިތަދޫ ޔަންގް ވަންސްގެ އިތުރުން ހިތަދޫ މަލްޓި ޖީނިއަސް ޓީމެވެ.
ގްރޫޕް ސީގައި ހިމެނެނީ ފޭދޫ މެޖެންޓާ އާއި ފޭދޫ ޔަންގް މެޖެނޓާގެ ޓީމާއި މަރަދޫ ފޭދޫ ޓީމުގެ އިތުރުން ފޭދޫ އެސްއެމްޓީއެވެ.
ގްރޫޕް ޑީގައި ހިމެނެނީ ހަބޭސް އާއި، ކަޅަ ބެންޗާ އަދި އެފްވައިސީގެ އިތުރުން އެފްސީ ލިޓްލް ޓައުން އެވެ.
މުބާރާތް ހުޅުވާ މެޗްގައި ބައްދަލު ކުރުމަށް ހަމަޖެހިފައި ވަނީ ފްރެންޑް ކްލަބާއި ޝަންގް ޔުނައިޓެޑް އެވެ. ފޯރިގަދަ ހުޅުވުމުގެ ރަސްމިއްޔާތަކާއި އެކު މެޗް ފެށުމަށް ހަމަޖެހިފައި ވަނީ މި މަހުގެ 10 ވަނަ ދުވަހުގެ ރޭ 9:00 ޖަހާ އިރު ގަމުގެ ސަވާހެލި ކުރިމަތީގައި އޮންނަ ދަނޑުގަ އެވެ.
މިި މުބާރާތުގެ މެއިން ސޮޕޮންސަރަކީ ގްލޯބަލް ލިންކްސް ޕްރައިވެޓް ލިމިޓެޑުން އެތެރެކޮށް މާކެޓް ކުރާ "އަލިކެފޭ" ކޮފީ އެވެ. އޮފިޝަލް އެނާޖީ ޑްރިންކަކީ ޕަވަ ހޯން އެވެ. ކޯ ސްޕޮންސަރުންނަކީ ޔަމަހާ އަދި ޝަންގްރިއްލާ އެވެ.
މި މުބާރާތަށް އައްޑޫ ސިޓީ ކައުންސިލުން ވަރަށް ބޮޑު އެހީތެރި ކަމެއް ލިބެމުންދާ ކަމަށް މުބާރާތް އިންތިޒާމް ކުރާ ފޭދޫ ސްޕޯޓްސް ކުލަބުން ބުންޏެވެ.