އެކްޓަރު ކުނާލް ކޭމޫ ޑައިރެކްޝަނަށް ނުކުންނަން ނިންމައި، އޭނަ ހަދާ ފުރަތަމަ ފިލްމު މިއަދު އިއުލާންކޮށްފި އެވެ.
މި ފިލްމަކީ ފަރުހާން އަޚްތަރާއި ރިތޭޝް ސިދުވާނީގެ އެކްސެލް އެންޓަޓައިންމަންޓުން ޕްރޮޑިއުސްކުރާ "މަދުގާއޯ އެކްސްޕްރެސް" އެވެ. ކުނާލް ލިޔެ، ޑައިރެކްޓްކުރާ ފިލްމުގެ ފަސްޓްލުކް ޕޯސްޓަރު ވެސް ސޯޝަލްް މީޑިއާގައި ޕޯސްޓްކޮށް ބުނީ ޑައިރެކްޝަނަކީ އަބަދު ވެސް ހުވަފަނެއް ކަމަށާއި އެކަން ހަގީގަކަށްވާތީ ވަރަށް އުފާވާ ކަމަށެވެ. އަދި އޭނަގެ ފުރަތަމަ ފިލްމު އެކްސެލް އިން ޕްރޮޑިއުސްކޮށްދޭތީ އެކަމާ ވަރަށް ބޮޑަށް ޝުކުރު އަދާކުރާ ކަމަށް ވެސް ބުންޏެވެ.
ނަމަވެސް "މަދުގާއޯ އެކްސްޕްރެސް" އާ ބެހޭ އިތުރު ތަފުސީލުތަކެއް އަދި ހާމައެއްނުކުރެ އެވެ. އެހެންވެ މީގެ ކާސްޓުންނަކީ ކޮބައި ކަމެއް ވެސް އަދި ނޭނގެ އެވެ.
މިހާތަނަށް ގިނަ ފިލްމުތަކެއްގައި މަސައްކަތްކޮށްފައިވާ ކުނާލް، 39، އަކީ އެކްޓަރު ސައިފް އަލީ ޚާންގެ ކޮއްކޮ ބަތަލާ ސޯހާ އަލީ ޚާންގެ ފިރިމީހާ އެވެ.
ކުނާލް އަކީ ވަރަށް ކުޑައިރު ފިލްމު ކުޅެން ފެށި ފަންނާނެކެވެ. އެގޮތުން އޭނަ ކުޑައިރު ކުޅުނު ފާހަގަކޮށްލެވޭ ފިލްމުތަކުގެ ތެރޭގައި އާމިރު ޚާނާ އެކީ މަސައްކަތްކުރި "ހަމް ހެ ރަހީ ޕިޔާރު ކޭ" އާއި "ރާޖާ ހިންދުސްތާނީ" ގެ އިތުރުން އަޖޭ ދޭވްގަނާ އެކު ކުޅުނު "ޒަހަމް" ހިމެނެ އެވެ.
މި ފަހުން ކުނާލް ފެނުނު ފިލްމުތަކުގެ ތެރޭގައި "ލޫޓްކޭސް"، "މަލަންގް"، "ކަލަންކް" އަދި "ގޯލްމާލް އެގެއިން" ހިމެނެ އެވެ. އޭނަ އާންމުކޮށް ކުޅެނީ ސަޕޯޓިން ރޯލުތަކެވެ. އެކަމަކު ބައެއް ފިލްމުތަކުގައި ލީޑް ރޯލު ވެސް ކުޅެފައިވެ އެވެ.
ކުނާލްގެ ކުރިއަށް ހުރި ބައެއް ޕްރޮޖެކްޓްތަކުގެ ތެރޭގައި "ކަންޖޫސް މައްކީޗޫސް" އަދި ވެބް ސީރީޒް "ގުލްކަންދާ" ހިމެނެ އެވެ.