ދުނިޔޭގެ އެކި ގައުމުތަކުގައި މިހާރު ފެތުރެމުންދާ މަންކީޕޮކްސް ޖެހުނު މީހުންގެ އަދަދު 50،000 އަށް ވުރެ މައްޗަށް އަރައިފި އެވެ.
ދުނިޔޭގެ ސިއްްހަތު ޖަމިއްޔާ (ޑަބްލިއުއެޗްއޯ)ގެ ތަފާސް ހިސާބުތައް ދައްކާ ގޮތުން މި ބަލި މިހާތަނަށް 50،496 މީހަކަށް ޖެހިފަ އެވެ. މި ބަލީގައި 16 މީހަކު މިހާތަނަށް ވަނީ މަރުވެފަ އެވެ.
މަންކީ ޕޮކްސްގެ ކޭސްތައް މިދިޔަ މޭ މަހުގެ ތެރޭގައި އެންމެ ގިނަ އަދަދަކަށް ފެންނަން ފެށީ އެފްރިކާގެ ގައުމުތަކުންނެވެ. އޭގެ ފަހުން އެމެރިކާ އާއި ޔޫރަޕް އަދި އޭޝިއާގެ ބައެއް ގައުމުތަކުން ވެސް މި ބަލިޖެހިފައިވާ މީހުން ފެންނަން ފަށާފައިވާއިރު މިދިޔަ ޖުލައި މަހުގެ ތެރޭގައި ޑަބްލިއުއެޗްއޯ އިން ވަނީ މަންކީޕޮކްސް އަކީ ދުނިޔޭގެ ސިއްހީ ކުއްލި ނުރައްކަލުގެ ހާލަތެއްގެ ގޮތުގައި ކަނޑައަޅާފަ އެވެ.
ޑަބްލިއުއެޗްއޯގެ ޑިރެކްޓަރު ޖެނެރަލް ޓެޑްރޯސް އަދަނޮން ގެބްރެޔެސުސް ވިދާޅުވީ އެމެރިކާ އާއި ޔޫރަޕުން މަންކީ ޕޮކްސްގެ ކޭސްތައް ފެންނަ ނިސްބަތަށް ކޮންމެވެސް ވަރެއްގެ މަޑުޖެހުމެއް މިހާރު އައިސްފައިވާ ކަމަށެވެ. އެއީ މިއީ މި ބަލި ފެތުރުން ހުއްޓުވޭނެ ކަމުގެ ހެތްކެއް ކަމަށް ޓެޑްރޯސް ވިދާޅުވި އެވެ.
މި ބަލި މިހާތަނަށް ޖެހުނު މީހުންގެ ތެރެއިން ގިނަ މީހުންނަކީ އެއްޖިންސުން ގުޅުން ހިންގާ ފިރިހެނުން ކަމަށް ދައްކަ އެވެ. އެހެންވެ ބަލީގެ ނުރައްކާ އެންމެ ބޮޑީ ވެސް އެފަދަ މީހުންގެ މެދުގައި ކަމަށް ޑަބްލިއުއެޗްއޯ އިން ވެސް ބުނެފައިވެ އެވެ.