(މާޗް 31، 2014 ވަނަ ދުވަހުގެ ބަޔާ ގުޅޭ)
އަތޮޅުތެރޭގެ ނިކަމެތި އެހެން ރައްޔިތުންނެކޭ އެއްފަދައިން އައްޑޫ ރައްޔިތުން ވެސް ދިގު އިންތިޒާރެއްގައި ކެތްތެރިވެ ތިބުމަށް ދޫކޮށްލެއްވީ އެވެ.
ރައީސް މައުމޫނަށް ވެރިކަން ލިބިވަޑައިގަތުމާ އެކު އަތޮޅު ތެރޭގެ ރައްޔިތުންނާ ދާދި އެއް ފެންވަރަަކަށް ދިރިއުޅުމުގެ ހާލަތު އޮތް މާލޭގެ ރައްޔިތޔުން އާސްމާނަށް އަރުއްވައި، މުޅި މާލެ ތަރައްގީކޮށް ދެއްވީ އެވެ.
އޭގެ ސަބަބުން ދިރިއުޅުމުގެ ފަސޭހަތައް ހޯދަން ބޭނުންވި ފުދުންތެރިން އައްޑޫން ވެސް މާލެ އަރައި، ވަޒަންވެރިވަމުން ދިޔައީ އެވެ. ރަށުތެރެ ތޮއްޖެހި މާލޭގެ ރައްޔިތުން މާލެ އަންނަ ކޮންމެ މީހަކީ ވިސާ ނަގަން ޖެހޭ މީހެއްގެ ގޮތުގަ އެވެ. އެކަން ހައްލު ކުރުމަށް ބީރައްޓެހިންނަށް ކުޑަ ސިޓީ ތައާރަފް ކުރެއްވި އެވެ.
މާލޭގެ ފަޅުން 6.3 މިލިއަން އަކަފޫޓްގެ ބިން ހިއްކައިގެން ބޯހިޔާވަހިކަމުގެ މައްސަލަ ހައްލު ކުރެއްވުމަށް ހަތް އަހަރު ދުވަހުގެ ތެރޭގައި ސަރުކާރުގެ ބަޖެޓުން 47.115 މިިލިއަން ރުފިޔާ ހަރަދު ކުރެއްވި އެވެ. އެވަރަކުން ނުފުދިގެން ވިލިމާލެ ހެއްދެވި އެވެ. ސަރުކާރަށް އެތައް ބޮޑު އާމްދަނީއެއް ލިބިލިބި އޮތް އަދި މާލެ އާ އެންމެ ކައިރި ރިސޯޓް ނަންގަވައި އެ ރަށުގައި މާލޭގެ ރައްޔިތުން ވަޒަންވެރި ކުރުވައިގެންނެވެ. ހުޅުމާލެ ހެއްދެވުމަށް ބިން ހިއްކުމަށް އެކަނި ވެސް ސަރުކާރުގެ ބަޖެޓުން އެތައް މިލިއަން ރުފިޔާއެއް ހަރަދު ކުރެއްވި އެވެ.
ހަމައެކަނި މާލޭގެ ރައްޔިތުންގެ ހައްގުގަ އެވެ. މި ބިމުން ޖާގަ ލިބުމަށް އެދިގެންނާއ މިތަންތާގައި ގާއިމު ކުރެވިފައިވާ ދިރިއުޅުމުގެ ފަސޭހަތައް ހޯދަން މާލެ އަށް ހިޖުރަ މީހުން އެއް ދުވަހުން އަނެއް ދުވަހަށް އިތުރުވަމުން ދިޔަ އެވެ. ރަށްވެހިވުމަށެވެ. މިކަމަށް ހުޅުއްވާލެއްވި "މާލެ ދަފްތަރު" ގައި ޖެއްސުމުން މާލޭން ދެވަނަ ދަރަޖައިގައި ނަމަވެސް ރަށްވެހިކަން ލިބޭތީ އެވެ. މި ދުވަސްވަރު އައްޑޫ މާލެ އަށް ބަދަލުވި މީހުން ވަރަށް ގިނަ އެވެ.
މާލޭގެ ރަށްވެހިކަމުގެ ޕްރިޖެކްޓް ކުރިއަށް ގެންދެވުމުގައި ހަމައެކަނި ބެލެވިފައި އޮތީ މާލެ އަށް ކަމަށް ފެނެ އެވެ. އޭގެ ސަބަބުން އަތޮޅުތެރެ އެކަހެރިވެ، ފަޅުވެގެން ދާ ތަން ފެނުނެވެ.
ހުޅުމާލޭގެ ސަބަބުން މާލޭގެ އާބާދީ އިތުރަށް ފުފިގެން ދިޔަ އެވެ. އަތޮޅުތެރޭގެ ފަސް ސަރަހައްދެއް ނުވަތަ ފަސް ރަށެއް ލާމަރުކަޒީ އުސޫލުން ތަރައްގީ ކުރެއްވުމަށް ޕްލޭން ކުރައްވާފައި ވަނިކޮށެވެ. އެ ވާހަކަ އެންމެ ބާރަށް ދެކެވެމުން ދިޔަ ދުވަސްވަރުގެ ތެރޭގަ އެވެ. އައްޑު އަތޮޅު ހިތަދުއަކީ ވެސް އޭގެ އެއް ރަށެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.