ރާއްޖޭން ފަސް ދައްޖާލުން ފާޅުވެފައިވާ ކަމަށް ރައްޔިތުންގެ މަޖިލީހުގެ މެޖޯރިޓީ ލީޑަރު އަދި އޭދަފުށި ދާއިރާގެ ޕީޕީއެމް މެމްބަރު އަހުމަދު ސަލީމް ވިދާޅުވެއްޖެ އެވެ.
ރޭ ޕީޕީއެމުން ބޭއްވި ޖަގަހަ ޖަލްސާގައި ވާހަކަދައްކަމުން ސަލީމް ވިދާޅުވީ ކުދި ދައްޖާލުންގެ އަދަދު 30 އާއި ގާތްކުރާނެ ކަމަށް ރަސޫލާގެ ހަދީސްފުޅުގައިވާ ކަމަށާއި މިއިން ކޮންމެ ދައްޖާލެއްގެ މަގުސަދަކީ މީހުން މަގު ފުރެއްދުމާއި، އޮޅުވާލުމާއި، ދޮގުހެދުމާއި އިސްލާމްދީނުގެ އުސޫލުތައް ގޮތްގޮތަށް ބަދަލުކޮށް މީހުން މަގުފުރެއްދުން ކަމަށެވެ.
މިފަދަ ދައްޖާލުންތައް އެކި މޫސުންތަކުގައި ފާޅުވާނެ ކަމަށާއި އެގޮތުން މި ސިފަތައް ހުރި ފަސް ދައްޖާލުން ފާޅުވެފައިވާ ކަމަށް ސަލީމް ވިދާޅުވި އެވެ. އަދި އައްތަހިއްޔާތަށްފަހު މިފަދަ ދައްޖާލުންގެ ކިބައިން ސަލާމަތްވާން ވެސް ދުއާކުރަންޖެހޭ ކަމަށް އޭނާ ވިދާޅުވި އެވެ.
"ދައްޖާލެއްގެ ހުންނަންވާ ސިފަތަކަށް ބަލާއިރު މީގެ ފަސް ދައްޖާލުން ފާޅުވެއްޖެ. މިއީ ބިރުހުރި ކަމެއް. މި ހުރިހާ ދައްޖާލުންގެ މަގުސަދަކީ މީހުން މަގު ފުރެއްދުން، މީހުންނަށް ހައްގާއި ބާތިލު އޮޅުވާލުން." ސަލީމް ވިދާޅުވި އެވެ.
ސަލީމް ވިދާޅުވީ މިއީ މިއީ މަޖަލަކަށް ނަގަންވީ ކަމެއް ނޫން ކަމަށާއި މިފަދަ ދައްޖާލުންގެ ކިބައިން ސަލާމަތްވާން ދުއާނުކޮށް ސަލާމަތެއް ނެތް ކަމަށެވެ. އަދި މަސީހުއްދައްޖާލު އަންނައިރު ދުނިޔޭގައި ތިބޭނެ ކަމެއް ވެސް ނޭނގޭ ކަމަށާއި އޭގެކުރިން މިފަދަ ކުދި ދައްޖާލުންގެ ކިބައިން ސަލާމަތްވާންޖެހޭ ކަމަށްވެސް އޭނާ ވިދާޅުވި އެވެ.
ރޭގެ ޖަލްސާގައި ޕީޕީއެމްއާ އަލަށް ބައެއް އާންމު މެމްބަރުން ގުޅިފައިވާއިރު އެ ފަރާތްތަކުގެ ފޯމުތަކާއި ހަވާލުވީ ކުރީގެ ރައީސް އަބްދުﷲ ޔާމީނެވެ.