ރައްޔިތުންގެ މަޖިލީހުގެ ހިތަދޫ މެދު ދާއިރާގެ އިންތިޚާބު ބާތިލް ކުރަން އެދި، އެ އިންތިޚާބުގައި ޕީޕީއެމްގެ ފަރާތުން ވާދަކޮށް ނާކާމިޔާބުވެވަޑައިގަތް ކެންޑިޑޭޓް މުހައްމަދު ރަޝީދު (ހިޔަލީ) ގެ ފަރާތުން މިއަދު ހައި ކޯޓަށް ހުށަހަޅައިފި އެވެ.
އެ އިންތިޚާބުގައި ތިން ކެންޑިޑޭޓަކު މެދު ދާއިރާ އަށް ވާދަ ކުރި އިރު އިންތިޚާބު ކާމިޔާބުކޮށްފައި ވަނީ އެމްޑީޕީގެ ފަރާތުން ވާދަކުރި ރިޓަޔާޑް ބްރިގޭޑިއާ ޖެނެރަލް އިބްރާހިމް މުހައްމަދު ދީދީ އެވެ.
އެ މައްސަލަ ކޯޓަށް ހުށަހަޅާފައިވީ ނަމަވެސް ރަޝީދުގެ ވަކީލް އަދި ތުލުސްދޫ ދާއިރާ އަށް އިންތިޚާބުވެފައިވާ މުހައްމަދު ވަހީދު އިބްރާހިމް (ލޯޔަރު ވައްޑެ) ގެ ފަރާތުން އެ މައްސަލައިގެ ތަފްސީލެއް އަދި ލިބޭ ގޮތެއް ނުވެ އެެވެ.
އިންތިޚާބާ ބެހޭ ގާނޫނު ބުނާގޮތުން އިންތިޚާބީ ޝަކުވާގެ މައްސަލަތައް ފުރަތަމަ މަރުހަލާގައި ބަލާނީ ހައި ކޯޓުންނެވެ.
އަދި އެ ބާވަތުގެ މައްސަލަތަކަކީ ރަސްމީ ނަތީޖާ އިއުލާން ކުރާތާ ގިނަވެގެން 30 ދުވަހުގެ ތެރޭގައި ބަލައި، ނިންމަން ޖެހޭ ބާވަތުގެ މައްސަލަތަކެކެވެ.
އަދި މި މައްސަލާގައި ހިޔަލީގެ ބަހެއް ހޯދަން ކުރި މަސައްކަތް ވެސް ކާމިޔާބުވާ ގޮތެއް ނުވި އެވެ.