(އެޕްރީލް 1، 2014 ވަނަ ދުވަހުގެ ބަޔާ ގުޅޭ)
ނޮވެމްބަރު 3
ރައީސް މައުމޫންގެ ވެރިކަމުގެ ތިން ވަނަ ދައުރަކަށް ވޯޓްލާން ހަފުތާއެއްހާ ދުވަހަށް ވެފައި ވަނިކޮށް 1988 ގެ "ނޮވެމްބަރު 3" ވެގެން ދިޔައީ މައުމޫނުގެ ސަރުކާރުގެ މޫނުމަތި ބަދަލުކޮށްލި، ބިރުވެރި އުދުވާނަށެވެ.
ފުރަމާލޭގެ ރައްޔިތުން އަރާމު ނިދީގައި ނިދާފައި ތިބި ހަމަހިމޭން މެންދަމެއްގައި ލަންކާ ތަމަޅައިންގެ ޓެރިރިސްޓް ޖަމާއަތެއް ކަމަށްވާ ޕްލެޓޫން މާލެ އަރައި، ބަޑި ޖަހައި، ސިފައިންގެ މަރުކަޒަށް ހަމަލާދީ، މީހުން މަރައި އެ ހިންގި އުދުވާނުގެ ސަބަބުންނެވެ.
މި ހިތާމަވެރި ދުވަހު މައުމޫނާއި އެ މަނިކުފާނުގެ ބައެއް ވަޒީރުން ސިއްރިޔާތުގައި ފިއްލަވާ ވަޑައިގެން ތިއްބަވާ، އިންޑިއާ ސަރުކާރުގެ އެހީ އަށް އެދިވަޑައިގަތުމުން ބޮޑު ވަޒީރު ރަޖީވް ގާންދީގެ ސަރުކާރުން ސިފައިންނާއި ބަރު ހަތިޔާރު ފޮނުވައި، ރާއްޖެ އަށް ދެއްވި ހިމާޔަތުގެ އެހީތެރިކަން އެކި މީހުން އެކި ގޮތަށް ސިފަ ކުރަމުން ދިޔަ އެވެ.
ބައެއް ބޭފުޅުންގެ ނަޒަރުގައި އެއީ ދިވެހިންގެ މިނިވަންކަމާއި އިސްތިގްލާލް ނިކަމެތިކޮށް ލެވުނު ދުވަހެކެވެ. އަދި ބައެއް މީހުން ވަންހަނާގައި ނަމަވެސް ސުވާލު އުފައްދަމުން ދިޔައީ މިހާ ފަސޭހައިން ބަނޑޭރިގެއަށް ހަމަލާ ދެވުނު ސަބަބަކާ މެދުގަ އެވެ.
ކޮންމެއަކަސް މި ސުވާލުތަކުގެ ޖަވާބު ހޯދަން އުޅުމަށް ވުރެ، ދިވެހި ގައުމު ބޭތު ހާއިނުންގެ އަތްމައްޗަށް ނުގޮސް ސަލާމަތްވި ކަމާ މެދު ﷲގެ ހަޟްރަތަށް ޝުކުރުވެރިވެ، ރައިސް މައުމޫނަށް ތައުރީފްކޮށް ސަނާ ކިއުން ނޫން ގޮތެއް ނެތެވެ. މިއީ މިފަދަ ހުރިހާ ދަނޑިވަޅުތަކުގައި ވެސް ދިވެހިންގެ އާދަކާދަ ހުރި ގޮތެވެ.
މަސްއޫލުވެރި ފަރާތް ޒިންމާދާރުވެފައި އޮތީ ކިހާ ވަރަކަށްތޯ ބެލުން މުހިއްމެއް ނުވެ އެވެ. "ނޮވެމްބަރު 3" ގެ އުދުވާނުގައި މަރުވެ ދިޔަ ސިފައިންގެ ބޭކަލުންނަށް ޝަހީދުންގެ ދަރަޖަ ދެއްވައި ދިރި ތިބި އިސް އޮފިސަރުންނަށް ޢާޒީގެ މެޑެލް ދެއްވައި، ހިފައި ހައްޔަރު ކުރެވުނު ކުށްވެރިންނަށް ބާޢީންގެ ހުކުމް އިއްވީމާ އެހާވަރުން ފުދުނީ އެވެ.
ކޮންމެއަކަސް އެނގިގެން ދިޔަ ހަގީގަތަކީ ރައީސް މައުމޫންގެ ޒައާމަތާއިގެން އަމާންކަމާއި އޮމާންކަމާ އެކު ނިޔާމައިގައި ދަތުރު ކުރަން އޮޑި ހަލަބޮލި ކަނޑެއްގައި ބިޔަ ރާޅުތަކުގެ ތެރެއަށް ނިކުންނާން ޖެހުނު ކަމެވެ.
އެއީ މައުމޫންގެ ޒައާމަތުގެ މިސްރާބް ބަދަލުވެގެން ދިޔަ ހިސާބު ކަމަަށް ފާހަގަވެގެން ދިޔަ އެވެ. ބަނޑޭރިގޭގެ ކަންތައް ހަރުދަނާ ކުރެއްވުމަށާއި މާލޭ ރައްޔިތުންގެ ލާބަ އަށް ބަޖެޓް ދީލާލުމުން ދަރަނި ބޯ ބޮޑުވެގެން ދިޔަ ހިސާބެވެ.
ވިޔަފާރި ކޮންޓްރޯލް ކުރުމާއި ގާތް ވިޔަފާވެރިންގެ ލާބަ އަށް ތަރައްގީގެ މަޝްރޫއުތައް ލެނބިގެން ދިއުން، ކޮރަޕްޝަނާއި ފަސާދަ އަށް މަގު ފަހި ކުރުވީ އެ ހިސާބުން ކަމަށް ޝަކުވާތަކުގައިވެ އެވެ.
ވީމާ މި ދައުރު ވެގެން ދިޔައީ ސިޔާސީ ގޮންޖެހުންތަކާ ކުރިމަތިވި ކުރުވި އުނދަގޫ ފަސް އަހަރަށެވެ. ވެރިކަން ދިފާއު ކުރެއްވުމަށް ނުހަނު އުނދަގޫ އުފުއްލަވަން ޖެހިވަޑައިގަތް ދައުރަކަށެވެ. ވުމާ އެކު މި ވާހަކަތަކަށް ކުރު ގޮތަކަށް ނަމަވެސް ބަލާލައި ހަނދާންތައް އައުކޮށްލުން މުހިއްމު ކަމަށް ދެކިގެން މި ހާދިސާތަކުގެ ސުރުހީ އަޅާލީ އެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.