ބޮލީވުޑްގެ މަޝްހޫރު ބޮޑެތި ތަރިންގެ ފިލްމްތައް ރިލީޒް ކުރުމުގެ ކުރިން ވެސް ބޮޑެތި ފައިދާތަކެއް ހޯދާ ވާހަކައަކީ އާ ވާހަކައެއް ނޫނެވެ.
ފިލްމު ރިލީޒް ކުރުމުގެ ކުރިން އެެފަދަ ފިލްމުތައް، ހަދަން ކުރާ ހަރަދު ވެސް ބައެއް ފަހަރު ލިބޭ ވާހަކައަކީ އަޖައިބުވާ ވަރުގެ ވާހަކައެއް ވެސް ނޫނެވެ.
މި ފަހަރު ވެސް މި އޮތީ ހަމަ އެފަދަ ވާހަކައެކެވެ. މިދިޔަ އަހަރު ރިލީޒްވި ޝާހްރުކް ހާނާއި ދީޕިކާ ޕަދްކޯން ލީޑް ރޯލް ކުޅުނު "ޗެންނައި އެކްސްޕްރެސް" ބޮކްސް އޮފީހުގައި ހޯދި ބޮޑު ކާމިޔާބާ އެކު، އެ ދެ ތަރިންގެ ކުރިއަށް އޮތް ފިލްމް "ހެޕީ ނިއު އިޔާ" އަށް ގިނަ ބައެއްގެ ލޯތައް ވަނީ އަމާޒުވެފަ އެވެ. ހާއްސަކޮށް ފިލްމީ ވިޔަފާރީގައި ހިމެނޭ ފަރާތްތަކާއި ވާދަވެރި ޓީވީ ޗެނަލްތަކެވެ.
ފަރަހް ހާން ޑައިރެކްޓް ކުރާ "ހެޕީ ނިއު އިޔާ" ދުނިޔޭގެ އެކި ހިސާބުތަކުގައި ޑިސްޓްރިބިއުޓް ކުރުމުގެ ޒިންމާ ހަވާލުކޮށްފައި ވަނީ ބޮލީވުޑްގެ އެންމެ ވަރުގަދަ އަދި އެންމެ ކާމިޔާބް ޕްރޮޑަކްޝަން ހައުސް ޔާޝްރާޖް ފިލްމްސް (ވައިއާރްއެފް) އާ އެވެ. އެއީ 125 ކްރޯޑް ރުޕީސްގެ ޗަންދާއަކާ އެކުގަ އެވެ.
މީގެ އިތުރުން މި ފިލްމުގެ ސެޓްލެއިޓް ރައިޓްސް ޒީ ޓީވީ އަށް މިހާރު ވިއްކާލައިފައިވާ ކަމަށް މީޑިއާ ރިޕޯޓްތައް ބުނެ އެވެ. އެއީ 65 ކްރޯޑް ރުޕީސްއަށެވެ. "ޗެންނައި އެކްސްޕްރެސް" ވެސް ޓީވީން ދެއްކުމުގެ ހައްގު އޮތީ ޒީއަށެވެ.
އަދި ހަމަ މިއާ އެކު ވިޝާލް-ޝޭކަރު މިއުޒިކް ތައްޔާރުކޮށް ދީފައިވާ "ހެޕީ ނިއު އިޔާ" ގެ މިއުޒިކް ރައިޓްސް ޓީ-ސީރީޒަށް ވަނީ ވިއްކާލައިފަ އެވެ. އެއީ 12 ކްރޯޑް ރުޕީސްއަށެވެ.
މި ހުރިހާ ނަމްބަރުތަކަކާ އެކު ޝާހްރުކްގެ ރެޑް ޗިލީޒް އިން ޕްރޮޑިއުސް ކުރާ "ހެޕީ ނިއު އިޔާ" މިހާރު މި ވަނީ ރިލީޒް ކުރުމުގެ މާ ކުރިން ޖުމްލަ 202 ކްރޯޑް ރުޕީސްގެ ފައިދާއެއް ހޯދައިފަ އެވެ.
އެހެންވެ ފިލްމް އަޅުވައިގެން ބޮކްސް އޮފީހުގައި ކާމިޔާބީއެއް ނުލިބުނަސް، ފިލްމް އުފެއްދި ފަރާތަށް ވާނެ ގެއްލުމެއް ނެތެވެ.
އެކަމަކު އެެހެން ވާނެ ކަމަކަށް ނުބެލެވެ އެވެ. ސަަބަބަކީ "ހެޕީ ނިއު އިޔާ" އަކީ އަހަރުގެ އެންމެ އުންމީދީ އެއް ފިލްމެވެ. އަދި މިއީ ބޮޑު ކާސްޓިންއެއް ހިމެނޭ ފިލްމެކެވެ.
މީގެ އިތުރުން މިއީ 2007 ވަނަ އަހަރު ރިލީޒްވި "އޯމް ޝާންތީ އޯމް" އަށް ފަހު ފަރަހް އާއި ޝާހްރުކްގެ އިތުރުން ދީޕިކާ އެކުގައި މަސައްކަތް ކުރާ ފުރަތަމަ ފިލްމަށް "ހެޕީ ނިއު އިޔާ" ވުމަކީ ގިނަ ބައެއްގެ ސަމާލުކަން މި ފިލްމަށް ހުއްޓިފައިވާ އެންމެ ބޮޑު އެއް ސަބަބެވެ.
ޝާހްރުކާއި ދީޕިކާގެ އިތުރުން މި މިއުޒިކަލް އެކްޝަން ތްރިލާ އިން އަބިޝެކް ބައްޗަން، ސޯނޫ ސޫދު، ވިވާން ޝާހް، ބޮމަން އިރާނީ އަދި ހާއްސަ ފެނިލުމަކުން ޑީނޯ މޯރިއާ ވެސް ފެނިގެން ދާނެ އެވެ.
"ހެޕީ ނިއު އިޔާ" ސިނަމާތަކަށް އަންނާނީ މި އަހަރުގެ ދިވާލީގަ އެވެ.