އަށާރަ އަހަރުން މަތީ އުމުރުފުރާގެ މީހުންނަށް ކޮވިޑް-19 ވެކްސިންގެ 4 ވަނަ ޑޯޒް ދޭން ފަށައިފިއެވެ.
ހެލްތް ޕްރޮޓެކްޝަން އެޖެންސީ، އެޗްޕީއޭ އިން ބުނެފައިވަނީ 8 ސެޕްޓެމްބަރުން ފެށިގެން ކޮވިޑް-19 ވެކްސިންގެ 4 ވަނަ ޑޯޒް، އުމުރުން 18 އަހަރުން މަތީގެ މީހުންނަށް ޖެހުމަށް ހަމަޖެހިފައިވާ ކަމަށެވެ.
މި ޑޯޒް ޖަހާނީ ކޮވިޑް-19 ގެ ފުރަތަމަ ބޫސްޓަރ ކަމަށްވާ 3 ވަނަ ޑޯޒް ޖެހިފަހުން 4 މަސް ދުވަސް ފުރިހަމަވެފައިވާ ފަރާތްތަކަށް ކަމަށްވެސް އެޗްޕީއޭއިން ބުނެފައިވެއެވެ.
ހަތަރު ވަނަ ޑޯޒްގެގޮތުގައި ޖެހުމަށް ހަމަޖެހިފައިވަނީ ފައިޒަރ ވެކްސިނެވެ.
އެޗްޕީއޭއިން ބުނެފައިވަނީ މާލެ ސަރަހައްދުގައި ވެކްސިން ޖެހުމަށް ހަމަޖެހިފައިވަނީ އެޕޮއިންޓްމެންޓް އުސޫލުން ކަމަށާއި، އަތޮޅުތެރޭގައި ވެކްސިންޖެހުމުގެ އިންތިޒާމު ހަމަޖެހިފައިވާ ގޮތް އެރަށެއްގެ ހޮސްޕިޓަލް ނުވަތަ ސިއްހީ މަރުކަޒުން އާއްމު ކުރާނެ ކަމަށެވެ.
މީގެ އިތުރުން 12 އަހަރުން މަތީގެ މީހުންގެ ތެރެއިން ވެކްސިންގެ ފުރަތަމަ އަދި ދެވަނަ ޑޯޒް މިހާތަނަށް ފުރިހަމަ ނުކުރެވި ހުރި ފަރާތްތަކަށްވެސް ވެކްސިން ސެންޓަރ ތަކުން ވެކްސިން ދިނުމުގެ އިންތިޒާމް ހަމަޖެހިފައިވާ ކަމަށް ވެސް އެޗްޕީއޭއިން މައުލޫމާތުދެއެވެ.