އަންނަ މަހު ސިނަމާތަކަށް ގެންނަން ނިންމާފައިވާ ޑައިރެކްޓަރު އިންދަރް ކުމާރުގެ ކޮމެޑީ ފިލްމު "ތޭންކް ގޯޑް" ގެ ޕޯސްޓަރުތަކެއް ދައްކާލައިފި އެވެ.
ބުޝަން ކުމާރުގެ ޓީ ސީރީޒުން ޕްރޮޑިއުސްކޮށްފައިވާ މި ފިލްމުގެ ކާސްޓުންނަކީ އަޖޭ ދޭވްގަނާއި ރަކުލް ޕްރީތު ސިންގްގެ އިތުރުން ސިދާތު މަލްއުތުރާ އެވެ. "ތޭންގް ގޯޑް" ގެ ކުރިން ރަކުލް ވަނީ މި އަހަރު ރިލީޒްކުރި "ރަންވޭ 34" އާއި 2019 ގެ "ދޭ ދޭ ޕިޔާރު ދޭ" ގައި ވެސް އަޖޭއާ އެކީ މަސައްކަތްކޮށްފަ އެވެ. އަދި ކުރިއަރަމުން އަންނަ ބަތަލާ ވަނީ ސިދާތާ އެކީ ވެސް ދެ ފިލްމެއްގެ މަސައްކަތްކުރިން ކޮށްފަ އެވެ. އެއީ 2018 ގެ "އައްޔާރީ" އާއި 2019 ގެ "މަރުޖާވާ" އެވެ.
އަންނަ މަހުގެ 25 ގައި ސިނަމާތަކަށް ގެންނަން ތާވަލުކޮށްފައިވާ "ތޭންކް ގޯޑް" ގެ ޑައިރެކްޓަރު އެންމެ ފަހުން ގެނެސްދިން ފިލްމަކީ އަޖޭ މުހިއްމު ރޯލެއް ކުޅުނު 2019 ގެ "ޓޯޓަލް ދަމާލް" އެވެ. އިންދަރަކީ ވަރަށް ކާމިޔާބު ފިލްމުތަކެއް ހަދާފައިވާ ޑައިރެކްޓަރެކެވެ. އޭގެ ތެރޭގައި "ދިލް"، ބޭޓާ"، "ރާޖާ"، "އިޝްގް"، "މަން" އަދި "މަސްތީ" ހިމެނެ އެވެ.
"ތޭންކް ގޯޑް" ގެ އެންމެ ހާއްސަ އެއް ކަމަކަށް ވާނީ ސްރީ ލަންކާގެ ލަވަކިޔުންތެރިޔާ ޔޮހާނީގެ ވިދުން ގަދަކޮށް ދިން ލަވަ "މަނިކެ މަގޭ ހިތޭ" ގެ ހިންދީ ވާޝަން މި ފިލްމުގައި ހިމެނުމެވެ. އެ ލަވަ އިން ފެންނާނީ ނޯރާ ފަތުހީ އެވެ.
"ތޭންކް ގޯޑް" ގެ ޓްރެއިލާ މާދަމާ އާންމުންނަށް ދޫކޮށްލަން ހަމަޖެހިފައިވެ އެވެ.