އިންޑިއާ މިހާރު އޮތް ހާލަތުން އެއަށް ވުރެ ރަނގަޅު ހާލަތަަކަށް ގެންދަން ބޭނުންވާ ނަމަ އެ ގައުމުގެ ޒުވާނުން، ކުރިއަށް އޮތް ގާނޫނު ހަދާ މަޖިލީހުގެ އިންތިހާބުގައި އެކަށީގެންވާ ކެންޑިޑޭޓުންނަށް ވޯޓް ދިނުމަށް ބޮލީވުޑްގެ ޒުވާން އެކްޓަރު ރަންބީރު ކަޕޫރު ގޮވާލައިފި އެވެ.
ސިޔާސީ ކުޅިގަނޑުތަކެއް ދައްކުވައިދޭ "ރާޖްނީތީ" ގައި ވެސް މުހިއްމު ރޯލެއް އަދާ ކުރި ރަންބީރު، 31، ބުނީ ޒުވާނުން މެއި މަހު ބާއްވާ އިންތިހާބުގައި ވޯޓްލާން ނިކުތުމަކީ ބަދަލެއްގެ ފެށުމަކަށް ވެދާނެ ކަމަށެވެ.
"ޒުވާނުން ވޯޓްލާން ނިކުތުމަކީ ވަރަށް މުހިއްމު ކަމެއް. ބަދަލަކަށް ޒުވާނުން އެދޭ ނަމަ ވޯޓްލާން ނިކުންނަން ޖެހޭނެ،" ކާމިޔާބް ފިލްމްތަކެއް ކުޅެފައިވާ އެކްޓަރު ބުންޏެވެ. "ހެޔޮ ނިޔަތުގައި ވޯޓްލައިގެން، އެ މީހުންގެ ކަންކަމުގައި ވަކާލާތު ކުރާނެ އެކަށީގެންވާ ބަޔަކު ގާނޫނު ހަދާ މަޖިލީހަށް ހޮވައިގެން ނޫނީ ބަދަލަކަށް އުންމީދު ކުރެވޭކަށް ވެސް ނޯންނާނެ."
ރަންބީރު އިތުރަށް ބުނީ ގައުމުގައި ހުރި އެކިއެކި މައްސަލަތަކާ މެދު ރައްޔިތުން އަބަދުވެސް ޝަކުވާތަކެއް ކުރަމުންދާ ކަމަށެެވެ.
"އެހެންވީމާ ޒުވާނުން އެ މީހުންގެ ޒިންމާއަކީ ކޮބައިކަން ދަނެގެން އެ ޒިންމާ ވެސް އެބަ ޖެހޭ އަދާކޮށްދޭން، ގައުމުގެ ހާލަތު ރަނގަޅު ހާލަތަކަށް ގެންދިއުމަށްޓަކައި،" ދެ ފިލްމެއްގައި އަވަދިނެތި މިހާރު އުޅޭ ޒުވާން ރަންބީރު ބުންޏެވެ.
މެއި މަހު ބާއްވާ އިންޑިއާގެ ގާނޫނު ހަދާ މަޖިލިސް ލޮލް ސަބާ އިންތިހާބުގައި މުނިފޫހިފިލުވުމުގެ ދާއިރާގައި ހަރަކާތްތެރިވާ ވަރަށް ބައެއް ފަންނާނުން ވެސް ވާދަ ކުރެ އެވެ.
އެހެންވެ އިންތިހާބުގެ ވާދަވެރިކަން ވަރަށް ބޮޑަށް އިތުރުވެފައިވެ އެވެ.