(އެޕްރީލް 2، 2014 ވަނަ ދުވަހުގެ ބަޔާ ގުޅޭ)
ހުކުރު ނޫސް
ރައީސް މައުމޫންގެ ވެރިކަމަށް 10 އަހަރު ފުރި، ތިން ވަނަ ދައުރަކަށް ކުރިމަތިލެއްވީ "ނޮވެމްބަރު 3" ގެ އުދުވާނީ ހަމަލާގެ ސަބަބުން މިލާފައިވާ ސަރުކާރުގެ މޫނުމަތި ރީތި ކުރެއްވުމަށް، ކުރައްވަން ޖެހިވަޑައިގެންނެވި މަސައްކަތްޕުޅުތަކާ އެކުގަ އެވެ.
ނަވާރަ ސަތޭކަ އަށްޑިހަ ނުވަ ވަނަ އަހަރުގެ ރިޔާސީ ބަޔާން އިއްވަވަމުން ގައުމާ މުހާތަބު ކުރައްވައި "ތޮށިގަނޑު ފަޅާލާފައި ނުކުތުމަށް" ރައީސް މައުމޫން އެދިވަޑައިގެންނެވި އެވެ. މި މޭރުމުން ވިދާޅުވެ، ހިޔާލު ފާޅު ކުރުމުގެ މިނިވަންކަން ދެއްވި އެވެ. ސަރުކާރަށާއި ސަރުކާރުގެ ވެރިންގެ މަސައްކަތަށް ފާޑު ކިއުމުގެ ދޮރު ތަންމިނަށް ހުޅުވާލަ ދެއްވި އެވެ.
ރައީސް މައުމޫންގެ ސިޔާސަތަށް ތާއީދު ކުރައްވާ ބޭފުޅުންސ ހީފުޅު ކުރެއްވީ ހިޔާލު ފާޅު ކުރުމުގެ މިނިވަންކަމަކީ ނޮވެމްބަރު 3 ގެ އުދުވާންގެ ސަބަބުން އެ މަނިކުފާނަށް ވިސްނިވަޑައިގަތް ވިސްނުންފުޅެއް ކަމުގަ އެވެ.
ވެރިކަން ކުރުމުގެ ނިޒާމުގެ ތެރެއިން މިނިވަން ވިސްނުމުގެ އަހުލުވެރިންނަށް ވެސް ދެއްވުން ކަމުގަ އެވެ. ތައުލީމީ ގާބިލް ޒުވާނުންނަށް ޖާގަ ދިން ނަމަވެސް އިދިކޮޅު ވިސްނުމުގެ މީހުން ގަބޫލް ކުރީ މި ދޫދެއްވުމަކީ ވަރަކަށް ޖެއްސެވުން ފަދަ ކަމެއް ކަމަށެވެ.
ބޭނުންފުޅަކީ ސަރުކާރާ މެދު އާންމުންގެ ވިސްނުން ހުރީ ކިހިނެއްކަން ދެނެވަޑައިގަތުމަށެވެ. ސަރުކާރާ ދެކޮޅު ވިސްނުމުގެ މީހުންގެ ނުވަތަ ހަތުރުންނަކީ ކޮބައިތޯ ބަލައި އެފަދަ ފަރާތްތައް އެކަހެރިކޮށްލެވުމެވެ.
މި ލިބުނު ރަނުގެ ފުރުސަތުގެ ބޭނުން ހިފުމަށް ފިސާރި ޒުވާން ލިއުންތެރިންކޮޅެއް އިސް ނަގައިގެން ނެރުނު "ސަންގު" އާއި "ހުކުރު" ނޫސްވެގެން ދިޔައީ ސީދާ ގޮތެއްގައި ސަރުކާރަށް ފާޑު ކިއުމުގެ މިނިވަންކަން ލިބިގަތް ފުރަތަމަ ނޫސްތަކަށެވެ.
"ހުކުރު" ނޫހަކީ އައްޑޫގެ ޒުވާން ލިއުންތެރިން އިސް ނަގައިގެން ނެރުނު ހަފުތާ ނޫހެކެވެ. ބޮޑު މިނިވަންކަމަކާ އެކު މި ނޫސްތަކުން ސަރުކާރަށް ފާޑު ކިޔަން ފެށި އެވެ.
އެކަން ވެގެން ދިޔައީ އާންމުންގެ ތަރުހީބް ލިބިގެން ދިޔަ ކަމަކަށެވެ. އެހާ ހިސާބުން ސަރުކާރުގެ ފޮރުވިފައިވާ ސިއްރުތައް ކަޝްފުވެ، ވަތު ބަތާނައިން ނިވާވެފައިވާ ބޮޑެތި ކޮރަޕްޝަނާއި ވައްކަމާއި އުދުވާނީ އަމަލުތައް ހާމަވެގެން ދިޔަ އެވެ.
އިންސާނީ ހައްގުތަކާ ގުޅިފައިވާ ބޮޑެތި ޖަރީމާތަކާއި ލާދީނީ ކަންތައްތަކުގެ ވާހަކަ ފަޅާ އަރަމުން ދިޔަ އެވެ. މަޝްހޫރު އެފްޕިއައިޑީގެ މަހުގެ ކޮރަޕްޝަން ފެންމަތިވި އެވެ. މިނިވަންކަމުގެ ބަތަލުގެ މަގާމު ހައްގުވެގެންވާ ރައިސް އިބްރާހީމް ނާސިރާ މެދު މައުމޫނުގެ ސަރުކާރުން ކަންތައް ހާމަވެ، އަނގަ ބަންދުވެފައިވާ ދީނީ އިލްމުވެރިންނަށް ކުރިމަތިވެފައި އޮތް ގޮންޖެހުންތަކުގެ ވާހަކަ އެވެ.
ހާއްސަކޮށް އަސާސީ ހިދުމަތްތަކުން އެއްކިބާ ކުރެވިފައިވާއ އަތޮޅުތެރޭގެ ނިކަމެތި ރައްޔިތުން އެކަހެރި ކުރެވިފައިވާ ގޮތުގެ ވާހަކަ އެވެ. ހާއްސަކޮށް ސަރުކާރުގެ ހިންގުމުގެ ނިޒާމުގައި ހުރި ދޯހަޅި ކަމެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.