މަންޓާ އެއާ އިން އަންނަ އަހަރު ސްރީ ލަންކާ އާއި އިންޑިއާ އަށް ދަތުރުތައް ފަށާނެ ކަމަށް އެ އެއާލައިނުން ބުނެފި އެވެ.
މި ވަގުތު ރާއްޖޭގެ ތިން އެއާޕޯޓަށް އުދުހޭ އެއާލައިނުން ބުނި ގޮތުގައި އިންޓަނޭޝަނަލް ދަތުރުތައް ފަށައި، އެކަން ފުޅާކުރުމަކީ މަންޓާ އެއާގެ ވަރަށް ބޮޑު އަމާޒެކެވެ. މަންޓާ އަކީ 2019 ގައި އޮޕަރޭޝަނަށް ނުކުތް އެއާލައިނެކެވެ. އަދި މިއީ މި ވަގުތު ރާްޖޭގައި އޮޕަރޭޓްކުރާ ޕްރައިވެޓް ދެވަނަ އެއާލައިނެވެ.
އަވަށްޓެރި އިންޑިއާ އާއި ލަންކާ އަށް ދަތުރުތައް ފެށުމާ ބެހޭ ގޮތުން މަންޓާ އެއާގެ ޑެޕިއުޓީ ސީއީއޯ އަހުމަދު މައުމޫން ވިދާޅުވީ އެ ގައުމަށް ދަތުރުތައް ބޭއްވުމަށް ހޯދަން ޖެހޭ ހުއްދަތަކަށް މިހާރު އެދިފައިވާ ކަމަށެވެ. އެހެންވެ ހުއްދަތައް ލިބުމާ އެކީ އަންނަ އަހަރުގެ ތެރޭގައި އޮޕަރޭޝަންތައް ފަށާނެ ކަމަށް ވިދާޅުވި އެވެ.
"ބޭނުން ވަނީ ދެ ގައުމަށް ވެސް ދަތުރުތައް ފެށުމަށް ފަހު، ޑިމާންޑް ލިބޭ ވަރަކަށް ބަލައި ދަތުރުތައް އިތުރުކުރުން." މައުމޫން ވިދާޅުވި އެވެ.
އޭނާ ވިދާޅުވި ގޮތުގައި ލަންކާ އަށް ދަތުރުތައް ފަށާ އިރު އަމާޒަކީ އެ ގައުމުގެ ބަންޑާރަނަޔަކަ އެއާޕޯޓަށް ދަތުރުތައް ބޭއްވުން ކަމަށެވެ. އަދި އިންޑިއާގެ ތިން ސިޓީއަކަށް މަންޓާ އެއާ އިން އަމާޒު ހިފާފައިވާ ކަމަށް މައުމޫން ވިދާޅުވި އެވެ. އެއީ ބެންގަލޫރް، ޓްރިވެންޑްރަމް އަދި ކޮޗިން އެވެ.
މަންޓާ އިން ބުނީ އެެއާލައިނުން ލަންކާ އާއި އިންޑިއާ އަށް ދަތުރުތައް ކުރާނީ އެއާލައިންގެ ފްލީޓްގައި މިހާރު ބޭނުންކުރާ އޭޓީއާރް މަރުކާގެ ބޯޓްތަކުގަ އެވެ.
މަންޓާ އިން މި ވަގުތު އުދުހޭ އެއާޕޯޓްތަކީ ދ. އެއާޕޯޓާއި ދަރަވަންދޫ އެއާޕޯޓްގެ އިތުރުން ހއ. ހޯރަފުށީ އެއާޕޯޓެވެ. މި އަހަރުގެ ފެބްރުއަރީ 24 ގައި އައްޑޫ ގަމަށް ފެށި ދަތުރުތައް މިހާރު ވަނީ މެދުކަނޑާލައިފަ އެވެ.