ޑާކް ރެއިން އެންޓަޓައިމަންޓުން މަސައްކަތް ނިންމާފައި އޮތް ފިލްމު "ހިނދުކޮޅެއް" ގެ ލަވަތަކުގެ ތެރެއިން "ލޮލަކަށް ނިންޖެއް ނާދޭ" މިއަދު އާންމުންނަށް ދޫކޮށްލައިފި އެވެ.
މި ލަވަ ދޫކޮށްލީ ފިލްމުގެ ބަތަލާ އައިމިނަތު ރަޝްފާ (އާޝާ) ގެ އުފަން ދުވަސް މިއަދު ފާހަގަކުރާތީ އެކަމާ ގުޅުވައިގެންނެވެ. އަރަމުން އަންނަ ޒުވާން ބަތަލާ އަކީ ޑާކް ރެއިންގެ 2019 ގެ ފިލްމު "ގޮށްރާޅު" އިން ފިލްމީ ދާއިރާ އަށް ނުކުތް ބަތަލާއެކެވެ.
ލޯބީގެ ވާހަކައަކަށް ހަދާފައިވާ "ހިނދުކޮޅެއް" އަކީ އާޝާ އާއި ޝަރަފު އަބްދުﷲ ލީޑް ރޯލުން ފެންނާނެ އެއްޗެކެވެ. މީގެ ކާސްޓްގައި ރަވީ ފާރޫގާއި މަރިޔަމް މަޖުދާ (މަޖޫ) ވެސް ހިމެނެ އެވެ. އަހުމަދު ތޮލާލުގެ ސްކްރީންޕްލޭއަކަށް ހަދާފައިވާ ފިލްމުގެ ޑައިރެކްޓަރަކީ އަލީ ޝިފާއު (ޗިއްޕެ) އެވެ.
"ހިނދުކޮޅެއް" ގައި ހިމެނޭ "ލޮލަކަށް ނިންޖެއް ނާދޭ" އަކީ ކުރީގެ ލަވަކިޔުންތެރިޔާ އަލީ ރަމީޒުގެ ވަރަށް މަޝްހޫރުވި ލަވައެކެވެ. މީގެ އާ ވާޝަން ކިޔާފައި ވަނީ މަރިޔަމް އަޝްފާ އެވެ.