(އެޕްރީލް 3، 2014 ވަނަ ދުވަހުގެ ބަޔާ ގުޅޭ)
ކޮންމެއަކަސް މި ނޫސްތަކަށް ފުރުސަތު ދީގެން ތިބެވުނީ ހައެއްކަ މަސް ދުވަހަށެވެ. ބަލަން ތިބޭކަށެއް ކެތެއް ނުކުރެވުނެވެ. އެގޮތް މިގޮތަށް ކުރިމަތި ކުރުވި ބަހަނާތަކާ އެކުގައި ނޫސްތައް ބަންދު ކުރެއްވީ އެވެ. ނޫސްވެރިން ވެސް ބަންދު ކުރެއްވީ އެވެ.
މި ދެ ނޫހުގަައި ވެސް މެނޭޖްމަންޓްގައި މަސައްކަތް ކުރެއްވި އަދި އިސްވެ ނޫހަށް ލިއުއްވި ފަރާތްތައް ޖަލުންނާއި އަރުވާލުން އަދި ގޭ ބަންދުން އެތަކެއް ދުއްތުރާލާއި އަދަބު ލިބިގެން ދިޔަ އެވެ. ބައެއް ބޭފުޅުންނަށް ނަފުސާނީ އަދި ޖިސްމާނީ ވަރަށް ބޮޑެތި އަނިޔާތައް ލިބިގެން ދިޔަ އެވެ.
ހުކުރުގެ އެޑިޓަރު އެކި ފަހަރުމަތިން އިންފޮމޭޝަނަށް ހާޒިރުކޮށް ޖެއްސި މައްސަލަތަކާއި ދެެއްކެވި ބަހަނާތަކުގެ ތެރޭގައި އައްޑޫ ވިޔަފާވެރިން "ހުކުރު" ނޫހަށް ފައިސާ އާއި އެހެން އެހީތައް ވެސް ދޭ ކަމަށް ތުހުމަތު ކުރައްވާފައިވެ އެވެ.
މިއީ މިހާތަނަށް ރާއްޖޭގައި ބޭއްވޭ އެންމެ ބޮޑު ސަމިޓް ބޭއްވުމަށް މާލެ ނަލަހައްދަމުން ދިޔަ ދުވަސްވަރެވެ. މާލެ އާއި ރިސޯޓްތަކުގައި އުޅޭ އައްޑޫ ރައްޔިތުން ފަސް ވަނަ ސާކް ސަމިޓަށް މާލެ ޒީނަތްތެރި ކުރުމުގެ މަސައްކަތުގައި ބައިވެރިވި އެވެ.
މި މަސައްކަތުގެ އަގު ވަޒަންކޮށް އެޓޮލްސް މިނިސްޓަރު އަބްދުﷲ ޖަމީލް ޝުކުރު ދެންނެވުމަށް ބޭއްވި ބައްދަލުވުމެއް ޒުވާނުންގެ މަރުކަޒުގައި ބޭއްވުނީ ނޮވެމްބަރު 15، 1990 ގަ އެވެ. މިކަން އިންތިޒާމް ކުރެއްވުމުގައި އެންމެ އިސްކޮށް އުޅުއްވީ ޑިމްސް މުހައްމަދު ސޯލިހާއ ޕްލާޒާ މުހައްމަދު އަހުމަދުދީދީ އެވެ. އައްޑޫ ވިޔަފާރިވެރިންގެ ކުންފުންޏެއް ކަމަަށްވާ ޑިމްސްގެ އޮފީސް އިމާރާތް އަނދައިގެން ދިޔައި މި ދުވަސްކޮޅުގެ ތެރޭގަ އެވެ.
ރައީސް މައުމޫން ފީ ހޮވާލެއްވުމަށްޓަކައި މި ދެންނެވި ނޫސްވެރިިކަމުގެ މިނިވަންކަން ކަފުންކޮށް، ވަޅުލާފައިވާ "ސަންގު" އާއި "ހުކުރު" އިން ލިބިވަޑައިގަތް ތަޖުރިބާގެ އަލީގައި ކުރިއަށް ވަޑައިގަތުމަށް މަގު ކޮށްޓެވި އެވެ.
ރާއްޖޭގެ މިނިވަންކަމުގެ ރިހި ޔޫބިލް ފާހަގަ ކުރެވުނު ޑިސެމްބަރު 9، 1990 ގައި ޓެރަރިޒަމް މަނާ ކުރުމާ ބެހޭ ގާނޫނޫ ތަސްދީގު ކުރެއްވި އެވެ.
އޭގެ 16 މަސް ފަހުން އެޕްރީލް 8، 1992 ގައި "ސަންގް" ގެ އިސް ލިއުންތެރިޔާ ގ. ކެނެރީގޭ މުހައްމަދު ނަޝީދުގެ މައްޗަށް ޓެރަރިޒަމްގެ ގާނޫނުގެ ދަށުން ތިން އަހަރަށް ހުކުމް ކުރެއްވިގެން ދިޔަ އެވެ. ވަރަށް އެހެން ކަހަލަ ގޮތަކަށެވެ. (ނުނިމޭ)
—————————————————————————————————–
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.