(އެޕްރީލް 4، 2014 ވަނަ ދުވަހުގެ ބަޔާ ގުޅޭ)
ނޫސްވެރިކަމުގެ ސަބަބުން ފެންމަތިވި ކޮރަޕްޝަނާއި ފަސާދައިގެ ތެރޭގައި މަޝްހޫރު އެފްޕިއައިޑީގެ އެތަކެއް މިލިއަން ރުފިޔާގެ މައްސަލަ ހިމެނެ އެވެ.
މި ބޮޑު ހިޔާނާތުގެ މައްސަލާގައި އިލްޔާސް އިބްރާހީމް ޒިންމާ ވެވަޑައިގަންނަވަން ޖެހޭ ކަމަށް ވާހަކަތައް ފެތުރިގެން ދިއުމާ އެކު އެ މަނިކުފާން ވަނީ ރާއްޖޭން ބޭރަށް ފުރާވަޑައިގެންފަ އެވެ.
މެއި 29، 1990 ގަ އެވެ. އެފްޕީއައިޑީގެ މި މައްސަލަ ތަހުގީގު ކުރެއްވުމަށް ހަވާލު ކުރައްވާފައިވާ ކޮމިޓީ އަށް ވެސް އެ މަނިކުފާން ހާޒިރު ކުރަން ބޭނުންވެފައި ވަނިކޮށެވެ.
ސަރުކާރުގެ ވަރަށް އިސް މަގާމުތަކަކާ ހަވާލު ކުރައްވާފައިވާ ވެރިއަކު އެއްވެސް އެންގެވުމަކާ ނުލައި، ކުއްލިއަކަށް މި އަމަލު ކުރެއްވި ޒިންމާދާރުކަން ކުޑަ ގޮތާ މެދު ރައީސް މައުމޫން ވަނީ ކަންބޮޑުވެ ވަޑައިގެން އެ ވާހަކަ ދައްކަވާފަ އެވެ. ވީމާ ހަމަ އެ ދުވަހު ރައިސް މައުމޫން ވަނީ އިލްޔާސް އާ ހަވާލު ކުރައްވާފައިވާ މަގާމުތަކުން އެ މަނިކުފާން ވަކި ކުރައްވައިފަ އެވެ.
އެއީ ޓްރޭޑް މިނިސްޓްރީ އާއި މިނިސްޓަ އޮފް ސްޓޭޓް ފޮ ޑިފެންސް އެންޑް ނެޝަނަލް ސެކިއުރިޓީގެ މަގާމާއި ސިފައިންގެ ވެރިޔާގެ ނައިބްގެ މަގާމެވެ. އަދި އެސްޓީއޯގެ މެނެޖިން ޑިރެކްޓަރުގެ މަގާމުންނެވެ.
ޖެހިގެން އައި މޭ 30 ވަނަ ދުވަހު ޓްރޭޑް މިނިސްޓަރުކަން މުހައްމަދު މުޖުތަބާ އާ ހަވާކު ކުރެއްވި އިރު، ފާހަގަކޮށްލެވޭ މުހިއްމު އެންމެ މުހިއްމު ބަދަލަކަށް ވެގެން ދިޔައީ އިލްޔާސްގެ ސިޔާސީ ހަތުރެއް ކަމަަށްވާ އަބްދުﷲ ހަމީދުގެ އަތްޕުޅުން އަތޮޅުތެރޭގެ ވަޒީރުކަން ވަކި ކުރައްވައި، އެޓޮލްސް މިނިސްޓަރުކަން އަބްދުﷲ ޖަމީލަށް ދެއްވި ކަމެވެ.
މިއީ ވެެރިކަމުގެ ބާރުތައް ހިނދުކޮޅަކަށް ނަމަވެސް އާއިލީ ނުފޫޒުން ބޭރުވެގެން ދިޔަ ފުރަތަމަ ފަހަރު ކަމަށް ވަރަށް ގިނަ ބަޔަކު ގަބޫލް ކުރި އެވެ.
އެހެން ނަމަވެސް މާ ގިނަ ދުވަސްތަކެއް ނުވެ އަނެއްކާވެސް ފެނިގެން ދިޔައީ ވަރަށް ހައިރާން ކުރުވި މަންޒަރުތަކެކެވެ. ރާއްޖޭން ބޭރަށް "ފިިއްލަވާ" ވަޑައިގެންނެވި ކަމަށް ވިދާޅުވެ، މަގާމުތަކުން ވަކި ކުރެއްވި އިސްޔާސް ރާއްޖެ ގެންނަވައި މާޒީވެ ދިޔަ ކަންތައްތަކަކީ މާ ބޮޑު މައްސަލައަކަށް ނުހައްދަވައި،ކުރެއްވި ނަމަ އެ ކުރެއްވި ކުށަށް މާފު ވެސް ދެއްވި ތަނެވެ.
އިލްޔާސް ކޮށްދެއްވި ހިދުމަތުގެ އަގު ވަޒަން ކުރައްވައި، ތައުރީފް ވެސް ކުރައްވަމުން ގެންދެވި ތަނެވެ.
އަދި ފެށުނީއްސުރެ ކޮއްކޯފުޅު އަބްދުﷲ ހަމީދާ ހަވާލު ކުރައްވާ އަތޮޅުތެރެ ވަގުތީ ގޮތުން އެހެން ފަރާތަކާ ހަވާލު ކުރައްވާފައި އޮތަސް ހަމީދު އެންމެ ލޯބިފުޅުވާ އަތޮޅުތެރޭގެ ނިކަމެތި ރައްޔިތުންގެ ހާލު އަހުވާލް ބައްލަވަން ތާ އަބަދު ދަތުރު ކުރެއްވުމުގެ މަސްއޫލިއްޔަތު އިލްޔާސް އާ ހަވާލު ކުރެއްވީ އެވެ.
މިކަންވީ އަތޮޅުތެރޭގެ ކަތީބުންނަށް ވަރަށް ސިހުން ލިބުނު ކަމަކަށެވެ. ހުރިހާ ކަތީބުންނަކީ ހަމީދުގެ އަތްޕުޅު މައްޗަށް ކަތީބުކަމުގެ ފޫޅުކަނޑުއްވައިގެން ތިއްބެވި ބޭފުޅުންނެވެ. އައްޑޫން ވެސް މި ބޮޑު ބަދަލާ ގުޅިގެން ކަތީބުން ކަން ކުރެއްވި ގޮތް ވަރަށް ރަނގަޅަށް ފެނިގެން ދިޔަ އެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.