މޯހިތު ސޫރީ ޑައިރެކްޓްކޮށްފައިވާ "އެކް ވިލަން" ޖޫން 27 ގައި ރިލީޒް ކުރަން ނިންމައި، ފިލްމުގެ ފުރަތަމަ ޓީޒާ މިއަދު ލޯންޗްކޮށްފި އެވެ.
މި ފިލްމުގައި ލީޑް ރޯލް ކުޅެފައި ވަނީ މޯހިތުގެ ބްލޮކްބަސްޓާ "އާޝިގީ 2" ގެ ދެ ބަތަލާ ޝްރަދާ ކަޕޫރާއި ކަރަން ޖޯހަރުގެ "ސްޓޫޑަންޓް އޮފް ދޮ އިޔާ" އިން ބޮލީވުޑަަށް ނިކުތް އުންމީދީ ތަރި ސިދާތު މަލްއުތުރާ އެވެ. މިއީ ސިދާތުގެ ތިން ވަނަ ފިލްމެވެ.
އޭނާގެ ދެވަނަ ފިލްމަކީ ފެބްރުއަރީ 7 ގައި ރިލީޒް ކުރި "ހަސީ ތޯ ޕަސީ" އެވެ.
މީގެ އިތުރުން "އެކް ވިލަން" ގެ މުހިއްމު ރޯލަކުން ރިތޭޝް ދޭޝްމުކާއި ކަމާލް ރާޝިދު ހާން (ކޭއާރްކޭ) ވެސް ފެނިގެން ދާނެ އެވެ. މި ފިލްމު ޕްރޮޑިއުސްކޮށްފައި ވަނީ އެކްތާ ކަޕޫރުގެ ބަލާޖީންނެވެ.
މި ފިލްމަކީ މި އަހަރުގެ އެންމެ އުންމީދީ އެއް ފިލްމުގެ ތެރޭގައި ހިމެނޭ ފިލްމެކެވެ. އަދި މިއީ މޯހިތުގެ ފިލްމަކަށްވުމާ އެކު، ފިމްލާ ދޭތެރޭ އާންމުން ކުރާ އުންމީދުތައް ވެސް ހުރީ ވަރަށް އުހުގަ އެވެ.
"އެކް ވިލަން" އާ ބެހޭ ގޮތުން ބަތަލާ ޝްރަދާ ބުނީ މި ފިލްމުގެ ކޮންމެ ކެރެޓްއާއަކީ ވެސް "ގްރޭ ޝޭޑްސް" ހިމެނޭ ސިއްރުން ފުރިގެންފައިވާ ކެރެކްޓާތަކެއް ކަމަށެވެ. އަދި ފިލްމާ ދޭތެރޭ ވަރަށް ހިތްހަމަޖެހޭ ކަމަށް އޭނާ ބުންޏެވެ.