މިއަދު ފުލުހުންގެ ޚިދުމަތް ވާސިލުވެފައިވާ ހިސާބު ރަމްޒުކޮށް ދެނީ، މުޖުތަމަ އަށް ލިބިފައިވާ ކުރިއެރުން ކަމުގައި ނައިބު ރައީސް ޑރ. މުޙައްމަދު ޖަމީލު އަޙްމަދު ރޭ ވިދާޅުވެއްޖެ އެވެ.
ރޭ އައްޑޫގައި ބޭއްވި ފުލުހުންގެ 81 ވަނަ އަހަރީ ޖަލްސާގައި ނައިބް ރައީސް ވިދާޅުވީ ކޮންމެ މުޖުތަމަޢެއްގެވެސް ކުރިއެރުން ބިނާވެފައިވަނީ، އެތަނެއްގެ ރައްޔިތުން، އެތަނެއްގެ ޤާނޫނުތަކަށް ބޯލަނބައި، ޙުރުމަތްތެރިކޮށްހިތާ މިންވަރެއްގެ މައްޗަށް ކަމަށެވެ.
އަދި އެ ތަނެއްގައި ޤާނޫނު ހިނގައި، ޤާނޫނަށް ތަބާވާ މިންވަރެއްގެ މައްޗަށް ކަމަށް ވިދާޅުވިއެވެ.
"މިއީ، ދުނިޔޭގެ އެންމެ ތަހުޒީބު ވެފައިވާ ތަންތަނުގައި ވެސް، އެތަނެއް ތަހުޒީބު ވެފައިވާ މިންވަރު ބަލާ ނިސްބަތް. ރާއްޖޭގައި ސިޔާސީގޮތުން ދެބަސްވުން ހިނގާ ކޮންމެ ފަހަރަކު، ޙަޤީޤީ ތަހުޒީބުގެ މި ވާހަކަތައް ހަނދާން އެބަކުރަން ޖެހޭ. މިއަށް ވުރެ ބޮޑު ތަހުޒީބެއް، މިއަށްވުރެ ބޮޑު ކުރިއެރުމެއް ނުވާނެ،" ނައިބު ރައީސް ވިދާޅުވި އެވެ.
ޑރ. ޖަމީލްގެ ވާހަކަފުޅުގައި، ދިވެހި މުޖުތަމަޢުގައި "ތަހުޒީބު" މިހާރު މާނަ ކުރަނީ ކިހިނެއްތޯ، އަލުން ބަލަން ޖެހޭ ކަމަށް ވިދާޅުވި އެވެ.
އަދި ރާއްޖެއަށް މިފަދަ މުހިންމު ވަގުތެއްގައި، އެކި ގޮތްގޮތުން ޤައުމަށް ފާގަތިކަން ހޯދައި ދޭން މަސައްކަތްކުރާ ފަރާތްތަކުން ޤާނޫނުތަކަށް ޢަމަލު ކުރަނީ ކިހާ ވަރަކަށްކަމާ މެދު އެބަ ވިސްނަން ޖެހޭ ކަމަށް ވެސް އެ މަނިކުފާނު ވިދާޅުވިއެވެ.
މި ރޮނގުން ވާހަކަފުޅު ދައްކަވަމުން، ފުލުހުންގެ ޚިދުމަތަކީ، ޤާނޫނު ރައްކާތެރިކޮށް ދަމަހައްޓާ ޚިދުމަތެއްކަން ނައިބު ރައީސް ފާހަގަ ކުރެއްވި އެވެ.
އަދި ޤައުމުގެ ސިޔާސީ ވެރިން، މުޖުތަމަޢުގެ ހަރުދަނާ ޤާނޫނުތަކަށް ބޯލަނބާތަން ފެނިގެން ދިޔުމަކީ، ކުރިއެރުން ލިބިގެންދާކަން ދައްކައިދޭ ކަމެއް ކަމަށާއި، "ތަރައްޤީ" އޭ މިއަދު މި ކިޔަނީ، މި ކަންކަމަށް ކަމަޑށް އިބު ވިދާޅުވި އެވެ. އެއްވެސް ފަރުދަކަށް ވުރެ، އަދި ސިޔާސީ ޕާޓީއަކަށް ވުރެ، ޤައުމުގެ ސަލާމަތްތެރިކަމާއި ރައްކާތެރިކަން އަބަދުވެސް ބޮޑުވާނެކަން ވެސް ހަނދާންކޮށް ދެއްވި އެވެ.
އަދި ސިޔާސީ ފިކުރުގެ ތެރެއިން، ޤައުމީ ފިކުރަށް އިސްކަން ދޭން ޖެހޭނެކަން ވެސް އެމަނިކުފާނުގެ ވާހަކަފުޅުގައި ފާހަގަކުރެއްވި އެވެ.
ހަމައެއާ އެކު، ޤާނޫނަށް ތަބާވާ، ޤާނޫނަށް ޙުރްމަތްތެރިކޮށް ހިތާ މުޖުތަމަޢެއް ބިނާވެގެން ނޫނީ، ޤައުމަށް ކުރިއެރުމެއް ލިބިގެން ނުދާނެ ކަމަށް ވެސް ޑރ. ޖަމީލް ވިދާޅުވި އެވެ.
ރޭގެ ރަސްމިއްޔާތުގައި، ފުލުހުންގެ ޚިދުމަތުގައި 25 އަހަރަށް ވުރެ ދިގު މުއްދަތެއްގައި ޚިދުމަތްކޮށްފައިވާ ފަރާތަކަށް ދެވޭ ހަނދާނީ ފިލަޔާއި، އާންމުންގެ ތެރެއިން ފުލުހުންގެ މަސައްކަތްތަކަށް ވޭތުވެ ދިޔަ އަހަރު އެހީތެރިވެ ދީފައިވާ ފަރާތްތަކަށް އެކަމުގެ އަގު ވަޒަންކުރުމުގެ ގޮތުން ދެވޭ ހަނދާނީ ފިލަޔާއި، 2013 ވަނަ އަހަރު ފާހަގަ ކުރެވޭ އިޚްލާސްތެރި ޚިދުމަތްތަކެއް ކޮށްދެއްވާފައިވާ މުވައްޒަފުންނަށް ދެވޭ ހަނދާނީ ލިޔުން ދީފައިވެ އެވެ.