ފުލުހުންގެ 81 ވަނަ އަހަރީ ދުވަސް ދުވަސް ފާހަގަ ކުރަން ރޭ ހިތަދޫ ޝަރަފުއްދީން ސްކޫލުގައި އޮތް ޖަލްސާގައި އިންނަވައިގެން އައްޑޫ ސިޓީ ކައުންސިލްގައި ހިތަދޫ މެދު ދާއިރާ ތަމްސީލް ކުރައްވާ ހުސައިން ހިލްމީ "ފްރަސްޓްރޭޓެޑް" ވެފައިވާ ކަމަށް އޭނާގެ އެފްބީ ސްޓޭޓަސްގައި ވިދާޅުވެއްޖެ އެވެ.
ރޭ ގާތްގަގަނޑަކަށް 9:00 ޖެހި އިރު ފެށި ޖަލްސާ 11:30 އެހާކަށްހާ އިރު ނިންމާލި އިރު، ޖަލްސާގައި ރޭ އެންމެ ބޮޑަށް އަަޑު އިވިގެން ދިޔަ ވާހަކަތަކަކީ ފެބްރުއަރީ 8، 2012 ގައި އައްޑޫގައި ހަމަނުޖެހުން ހިންގައި، ފުލުހުންގެ ތަންތަނަށާއި ފުލުހުންގެ ވަސީލަަތްތަކަށް ދިން ގެއްލުންތަކުގެ ވާހަކަ އެވެ.
އެ ވާހަކަތައް ކޮމިޝަނަރު އޮފް ޕޮލިސް ހުސައިން ވަހީދުގެ އިތުރަށް ޖަލްސާގެ ޝަރަފްވެރި މެހުމާން ނައިބް ރައީސް ޑރ. މުހައްމަދު ޖަމީލް އަހުމަދު ވެސް ވަރަށް ބޮޑަށް ދެއްކެވި އެވެ.
ސީޕީ ވަހީދު ވިދާޅުވީ ފެބްރުއަރީ 8 ގައި ފުލުހުންނަށް ދިން ގެެއްލުންތަކުން މިހާތަނަށް އަރައިގަނެވިފައި ނެތް ނަމަވެސް، ފުލުހުންގެ ހިތްވަރެއް އެެއްވެސް ބަދަލެއް އައިސްފައި ނެތް ކަމަށެވެ. އަދި ހަަމަ ކުރިން ވެސް ދެމުން ގެންދިޔަ ގޮތަށް ފުލުހުންގެ ހިދުމަތްތައް އައްޑޫގައި ދެމުން ގެންދިޔަ ކަމަށާއި ކުރިއަށް އޮތް ތަނުގައި ވެސް އެކަން އެގޮތަށް ކުރިއަށް ދާނެ ކަމަށް ވިދާޅުވި އެވެ.
ނައިބް ރައީސް ވެސް ފެބްރުއަރީ 8 އަށް ވަރަށް ބޮޑަށް އަލިއަޅުވާލައްވައި، އެއީ އައްޑު އަށް ބަޔަކު ދިން ވަރަށް ބޮޑު ގެއްލުމެއް ކަމަށް ވިދާޅުވި އެވެ.
އެގޮތުން ފުލުހުންނަށް ދިން ގެއްލުންތަކުގެ އިތުރަށް ހަތަރު ރަށެއްގެ މެޖިސްޓްރޭޓް ކޯޓްްތައް އަޅިއަށް ހަދާލުމަކީ ރައްޔިތުންނަށް ދުވަހަކު ވެސް ފޫބެއްދޭނެ ވަރުގެ ގެއްލުމަކަށް ނުވާނެ ކަމަށް ވިދާޅުވި އެވެ. ސަބަބަކީ ރައްޔިތުންނާ ގުޅުން ހުރި އެތަކެއް ލިއުންތަކެެއް އަންދާލުމެވެ.
މީގެ އިތުރުން ޑރ. ޖަމީލް ވިދާޅުވީ ފުލުހުންގެ މަރުކަޒުތަކާއި އެތަކެއް ވެހިކަލްތައް އަންްދާލައި، ބޭނުން ނުކުރެވޭ ވަރު ކޮށްލުމަކީ އިޔާދަ ކުރަން ފަސޭހަ ގެއްލުންތަކެއް ނޫން ކަމަށެވެ.
އެހެން ނަމަވެސް ބޭރުގެ ފަރާތްތަކުގެ އެހީ ހޯދައިގެން މި އަހަރުގެ ތެރޭގައި ފެބްރުއަރީ 8 ގައި ލިބުނު ގެއްލުންތައް ފޫބެއްދޭ ވަރު ވާނެ ކަމުގެ އުންމީދު ބޮޑު ކަމަށް ނައިބް ރައީސް ރޭ ވިދާޅުވި އެވެ.
ފެބްރުއަރީ 8 ގައި އައްޑޫގައި ހިންގި "ބޮޑު ހުޅު" ހާދިސާ އާ ގުޅިގެން ތަހުގީގަށް އޭރު ކައުންސިލްގައި ތިއްބެވި ހަ މެމްބަރުންގެ ތެރެއިން މޭޔަރު އަބްދުﷲ ސޯދިގް (މިހާރުގެ ވެސް މޭޔަރު) ނޫން ހުރިހާ ކައުންސިލަރުން ފުލުހުންގެ ބެލުމުގެ ދަށަށް ގެންގޮސް ބަޔާންތައް ނަގާފައިވެ އެވެ.
ހިލްމީއަކީ އަކީ ފަސް ކައުންސިލަރުންގެ ތެރޭގައި ވެސް ހިމެނިވަޑައިގަންނަވާ ބޭފުޅެކެވެ.
އެހެން ނަމަވެސް ދެވަނަ ދައުރަަކަށް އޭނާ ކައުންސިލަރަަށް ހޮވިވަޑައިގެން، ބައިވެރިވެވަޑައިގެންނެވި ބޮޑު ޖަލްސާއެއްގައި ފެބްރުއަރީ 8 ގެ ވާހަކަ ރޭ ތަކުރާރުކޮށް ކަންފަތުގައި ގުގުމަން ފެށުމުން "ފްރަސްޓްރޭޓެޑް" ވީ ކަމަށް ދެކޭ ބަޔަކު ވެސް އެބަ ތިއްބެވެ.
އޭނާ ރޭ އެފްބީގައި ކުރެއްވި "ފްރަސްޓްރޭޓެޑް" ސްޓޭޓަސް އާ ގުޅިގެން ބައެއް މީހުން މީހުން އެއީ ކީއްވެތޯ އަހާފައިވެ އެވެ.
ނަމަވެސް އެ ސްޓޭޓަސްއަކަޑް ހިލްމީ އެއްވެސް ވަރަކަށް ކޮމެންޓް ކުރައްވާފައެއް ނުވެ އެވެ.