އައްޑޫ ސިޓީ ކައުންސިލަރުންނާއި ހުރިހާ މުވައްޒަފުން ހިމެނޭ ގޮތަށް ހެލްތު އިންޝުއަރެންސް ސްކީމެއް ތައާރަފުކުރަން ނިންމާފައިވާތީ އޭގައި ބައިވެރިވާން ޝައުގުވެރިވާ މުވައްޒަފުންނަށް އެ ފުރުސަތު ހުޅުވާލަން ނިންމައިފި އެވެ.
ކައުންސިލުން އެގޮތަށް ނިންމީ މިދިޔަ މަހުގެ 29 ވަނަ ދުވަހު ބޭއްވި 66 ވަނަ ޖަލްސާގަ އެވެ. ކައުންސިލްގެ ހެލްތު އިންޝުއަރެންސް ސްކީލްމުގައި މުވައްޒަފުން ބައިވެރިން ހުޅުވާލުމާ ބެހޭ ގޮތުން މަޝްވަރާކޮށް އެކަން އެގޮތަށް ކުރިން ނިންމި ނަމަވެސް އެކަމަށް ހުޅުވައިލާނެ ވަކި ތާރީހެއް ނުނިންމަ އެވެ.
ކައުންސިލުން މިފަދަ ސްކީމެއް ތައާރަފުކުރަން ނިންމައި، "އައްޑޫ ޓްރަސްޓް ފަންޑް" އިން މިލިއަން ރުފިޔާގެ ލޯނެއް ނަގަން ނިންމީ މިދިޔަ ބުދަ ދުވަހު ބޭއްވި 65 ވަނަ ޖަލްސާގަ އެވެ. އެގޮތަށް އެ ދުވަހު ހުށަހެޅުއްވީ ޑެޕިއުޓީ މޭޔަރު މުހައްމަދު ޝުއާއު އެވެ. އަދި މިކަމާ ގުޅިގެން ކައުންސިލަރުންގެ މެދުގައި ހިޔާލު ތަފާތުވުންތަކެއް ވެސް އުފެދިފައިވެ އެވެ.
ނަމަވެސް އެލައިޑް ހެލްތު އިންޝުއަރެންސާ ގުޅިގެން ކައުންސިލުން ތައާރަފުރަން ނިންމި މި ސްކީމާ ގުޅޭ ގޮތުން މޭޔަރު އަލީ ނިޒާރު ވިދާޅުވެފައި ވަނީ މުގެ ދަށުން ކައުންސިލްގެ މުވައްޒަފުންނަށް ތިން ގައުމަކުން ސިއްހީ ހިދުމަތްތައް ހޯދޭނެ ކަމަށެވެ. އެއީ އިންޑިއާ އާއި ލަންކާގެ އިތުރުން ތައިލެންޑެވެ.
އޭނާ ވިދާޅު މީގެ ސަބަބުން އާސަންދަ ނުލިބޭ ބަލިތަކަށް ކައުންސިލްގެ އިންޝޫރެންސް ސްކީލްގެ ތެރެއިން މަފުންނަށް ފަރުވާ ހޯދުމުގެ ފުރުސަތު ވެސް ފަހިވެގެން ދާނެ ކަމަށެވެ. ކައުންސިލުން ނިންމާފައިވާ ގޮތުން ސްކީމްގައި މަދުވެގެން 250 މުވައްޒަފުން ބައިވެރިވާން ޖެހޭ އިރު، މުވައްޒަފުންގެ މައިންބަފައިންނާއި ފިރިންނާއި އަނބިން އަދި 21 އަހަރު ނުވާ ދަރިން ބައިވެރިކުރުމުގެ ފުރުސަތު ވެސް އޮންނާނެ އެވެ.