ވިކާސް ބާލްގެ ކުރިއަށް އޮތް ފިލްމް "ޝާންދާރު" ގެ ލިޑް ރޯލުން ޝާހިދު ކަޕޫރާއި އާލިއާ ބަޓް ފެނުމުގެ ފުރުސަތު ބޮޑުވެއްޖެ އެވެ.
އެ ފިލްމަށް ޝާހިދު މިހާރު ސޮއިކޮށްފައިވާކަން ވިކާސް ވަނީ ކަށަވަރުކޮށް ދީފަ އެވެ. އެހެން ނަަމަވެސް އަދި އާލިއާގެ ސޮއި ލިބޭ ގޮތެެއް ނުވެ އެވެ.
މި އަހަރުގެ މިހާތަނަށް ރިލީޒްވި ފިލްމުތަކުގެ ތެރޭގައި ހިމެނޭ އެންމެ ކާމިޔާބު އެއް ފިލްމު ކަމަށްވާ "ކުއީން" ގެ ޑައިރެކްޓަރު ވިކާސް ބުނީ "ޝާންދާރު" ގެ ބަތަލާއަކަށް އާލިއާ ގެނެވޭތޯ ވާހަކަތަކެއް ދެކެވެމުން އަންނަ ކަމަށެވެ.
"ޝާހިދު ވަނީ ފިލްމަށް ސޮއިކޮށްފައި. ފިލްމުގެ ބަތަލާއަކަށް އާލިއާ ގެންނަން ވަރަށް ބޭނުން. އެކަމަކު އެކަމާ ބެހޭ ގޮތުން މީޑިއާގައި ވާހަކަ ދައްކަން އަދި މާ އަވަސް. ފިލްމު އޮތީ އަދި ސްކްރިޕްޓިން މަރުހަލާގައި. ހުރިހާ ކަމެއް ފައިނަލްވެލީމާ ވާ ނުވާ އަންގާލަ ދޭނަން މީޑިއާ އަށް،" ހުނަރުވެރި ޑައިރެކްޓަރު ބުންޏެވެ.
"ޝާންދަރު" ގައި ޝާހިދުގެ ބަތަލާއަކަށް ޒުވާން އަދި ވިދަމުން އަންނަ ބަތަލާ އާލިއާ ހަމަޖެހިއްޖެ ނަމަ މި ޖޯޑް އަނެއްކާ ވެސް ވެގެން ދާނީ ބޮޑު ސްކްރީނުން ފެނިގެން ދާނެ ތާޒާ ޖޯޑަކަށެވެ.
"އާރް ރާޖްކުމާރު" ގެ ބޮޑު ކާމިޔާބީ އަށް ފަހު، ޝާހިދު މިހާރު މަސައްކަތް ކުރަމުން އަންނަނީ "އާޝިގީ 2" ގެ ބަތަލާ ޝްރަދާ އާ އެކު ވިޝާލް ބަރަދްވާޖްގެ "ހައިދަރު" ގަ އެވެ.
އާލިއާގެ ކުރިއަށް އޮތް ފިލްމް "2 ސްޓޭޓްސް" މި މަހުގެ 18 ގައި ސިނަމާތަކަށް އަންނާނެ އެވެ. މި ފިލްމުގައި އާލިއާ ފެނިގެން ދާނީ އުންމީދީ ޒުވާން އެކްޓަރު އަރުޖުން ކަޕޫރާ އެކުގަ އެވެ.