އަންނަ މަހު މާލެ އާއި އައްޑޫގައި ބާއްވާ އޭއެފްސީ ޗެލެންޖް ކަޕަށް އައްޑޫ "ނަލަ ފެހި" ކުރުމަށް އައްޑޫ ސިޓީ ކައުންސިލުން އިސްވެ ތެދުވެއްޖެ އެވެ.
އޭޝިއާގެ ހަތަރު ޓީމަކާއި އޮފިޝަލުން އަދި ބޭރުގެ ބޮޑެތި މީޑިއާތައް އައްޑޫއަށް ޒިޔާރަތް ކުރުމަށް ހަމަޖެހުމާއި ގުޅުގެން އައްޑޫ ޒީނަތްތެރިކޮށް، ބޭރުން އަންނަ ފަރާތްތަކަށް މަރުހަބާ ކިއުމަށް އައްޑޫ ސިޓީ ކައުންސިލުން ނިކުތީ ސިޓީގެ ކުދި ބޮޑު އެންމެންނާ އެކު އެވެ.
އައްޑޫ ސިޓީ ކައުންސިލްގެ ހިތަދޫ ދެކުނު ދާއިރާ ކައުންސިލަރު މުހައްމަދު ޔަސްރިފް މިއަދު ވިދާޅުވީ، އައްޑޫ އަށް ޒިޔާރަތް ކުރާ ފަރާތްތަކަށް "ރީތި ނަލަ ފެހި" އައްޑުއަކަށް ހެދުމަށް ކުރާ މަސައްކަތުގައި ސިޓީގެ އެންމެހާ ރައްޔިތުންގެ ފުރިހަމަ އެއްބާރުލުން ލިބޭނެ ކަމަށެވެ.
ކައުންސިލުން ވަނީ މި ހަރަކާތާއި ގުޅިގެން އައްޑޫގައި ހަރަކާތްތެރިވާ ޖަމިއްޔާތަކާއި ސްކޫލްގެ ވެރިންނާއި ބައްދަލުކޮށް ކުރެވިދާނެ ކަންކަމާއި ގުޅޭ ގޮތުން މަޝްވަރާ ކުރުމަށް ސްޓިއަރިން ކޮމެޓީއެއް އެކުލަވާލާފައެވެ. އަދި މިކޮމެޓީގެ ފުރަތަމަ ބައްދަލުވުން މިރޭ ބޭއްވުމަށް ވަނީ ހަމަޖައްސާފައެވެ.
އައްޑޫ ސިޓީ ކައުންސިލުން ބޭނުންވަނީ ސިޓީގެ މައިމަގުތަކާއި، ބަނދަރުތައް އަދި އާއްމުން ގިނައިން އެެއްވެ އުޅޭ ސަރަހައްދުތައް ސާފުކޮށް، ރަށުގެ ހޭޅި ފަށައް އަޅާފައިވާ ކުނި ނަގާ އެތަންތަނަށް ކުރިއަށް އޮތްތަނުގައި ކުނި ނޭޅުމަށެވެ.
މުޅި އައްޑޫ ބައިނަލް އަގްވާމީ ދުނިޔެއަށް ހުޅުވިގެންދާ މިމުބާރާތާއި ގުޅިގެން އައްޑޫގެ ރައްޔިތުންނަށް ކުރިން ލިބިފައިވާ މެހްމާންދާރީ އަދާކުރުމުގެ ލާމަސީލް ނަމޫނާ މިފަހަރުވެސް ފެނިގެން ދާނެކަމަށް ކައުންސިލުން ބުނެއެވެ.
އޭއެފްސީ ޗެލެންޖް ކަޕާއި ގުޅިގެން ހިތަދޫ ޒޯން ސްޓެޑިއަމް ރަނގަޅު ފެންވަރަކަށް ހެދި މޭއި 20 ވަނަ ދުވަހު މުބާރާތުގެ މެޗްތައް އައްޑޫގައި ފެށޭއިރު އައްޑޫގެ "ރީތިކަން" ދައްކަން މިއޮތީ މަސައްކަތް ކުރަން ޖެހިފައެވެ.
ކައުންސިލްގެ ދުރު މުސްތަގްބަލް ޕްލޭންގައިވާ ގޮތަށް ފަތުރުވެރިކަން އައްޑޫގައި ކުރިއެރުވުމަށް މިމުބާރާތަކީ ހުޅުވިގެންދާ ބޮޑު ދޮރެކެވެ. އެހެންވެ ރައްޔިތުންނާއި ކައުންސިލް އަދި ސަރުކާރުގެ މުވައްސަސާ ގުޅިގެން މި މަސައްކަތް ވަރަށް ފުރިހަމައަށް ކުރަން މިވަނީ ޖެހިފައެވެ.
އައްޑޫ ސިޓީގައި އޭއެފްސީ ބާއްވަން ނިންމުމާއި ގުޅިގެން މިސިޓީގެ މީދޫ ޒުވާނުން ވަނީ ބޭރުގެ ޓީމްތަކަށް ޕްރެކްޓިސް ކުރެވޭނެ ފެންވަރަށް އެރަށު ފުޓްބޯޅަ ދަނޑު ތަރައްޤީކޮށްފައެވެ. ސިޓީގެ އެންމެން ތިބީ އޭއެފްސީ ޗެލެންޖް ކަޕް ކާމިޔާބް ކަމާއި އެކު ބޭއްވުމަށް ފުރިހަމަ އެއްބާރުލުމެއް ދޭށެވެ. އެހެންވެ އެކަމަށް ޔޫތު މިނިސްޓަރ ވަނީ ތައުރީފްކޮށްފައެވެ.
އައްޑޫގެ ޖަމިއްޔާތަކާއި، ކައުންސިލްއަދި ސްކޫލްތަކުން ރޭ ބޭއްވި ބައްދަލުވުމުގައިވެސް ވަނީ ތަފާތު ހިޔާލު ހުށަހެޅި މަޝްވަރާ ކުރެވިފައެވެ. ހުރިހާ އެންމެންވެސް ތިބީ އެއް ރޫހެއްގައި ނިކުމެ އައްޑޫ "ނަލަ ފެހި" އައްޑޫއަަކަށް ހެދުމަށް ތައްޔާރަށެވެ.
ކައުންސިލްގެ އިސްނެގުމާއި އެކު ރައްޔިތުންވެސް ތިބީ އައްޑޫއަށް ރީތި ނަމާއި ޝަރަފް ހޯދައިދޭށެވެ.