ސައުދީ އަރަބިއްޔާގައި މިދިޔަ މަހު ބޭއްވި 42 ވަނަ ކިންގް ޢަބްދުލް ޢަޒީޒް އިންޓަނޭޝަނަލް މުބާރާތުގައި ވާދަކޮށް ރާއްޖެ ތަމްސީލުކުރި އަލްހާފިޒް އަހިމަދު ނަބީހު ހޯދި ކާމިޔާބީ މާލެ ސިޓީ ކައުންސިލުން ފާހަގަކޮށްފި އެވެ.
މައްކާގައި މިދިޔަ މަހުގެ 10-21 ޖުމްލަ 111 ގައުމަކުން 153 ހާފިޒުންނާ އެކީ ބޭއްވި މުބާރާތުގެ ފައިނަލުގައި ނަބީހު ކިޔަވާފައިވެ އެވެ. އޭނަ އަކީ ކީރިތި ޤުރުއާން ކިޔެވުމުގެ އެކިއެކި މުބާރާތްތަކުގައި ގައުމީ ފެންވަރުގެ ގިނަ ކާމިޔާބީތަކެއް ހާސިލުކޮށްފައިވާ ހާއްސަ އެހީ އަށް ބޭނުންވާ ރާއްޖޭގެ ވަރަށް ޒުވާން ހާފިޒެކެވެ.
ސައުދީ މިބާރާތުގައި ވާދަކޮށް ނަބީހު ގައުމަށް ހޯދައި ދިން ރީތި ނަމާއި ކާމިޔާބީ ފާހަގަކުރުމުގެ ގޮތުން ސިޓީ ކައުންސިލުން ވަނީ ބޭއްވި ހަފުލާއެއްގައި ވަނީ ނަބީހަށް ހަނދާނީފިލައަކާއި ސްމާޓް ޓީވީއެއް ހަދިޔާކޮށްފަ އެވެ. އަދި މާލޭގެ މޭޔަރު ޑރ. މުހައްމަދު މުއިއްޒު ވަނީ ނަބީހްގެ ކާމިޔާބީ ފާހަގަކުރުމަށް ހާއްސަ ޓްރޮފީއެއް ވެސް ދެއްވާފަ އެވެ.
ނަބީހުގެ މަސައްކަތުގެ އަގުވަޒަން ކުރުމަށް ބޭއްވި ހަފުލާގައި މޭޔަރު ވިދާޅުވީ މާލެ ސިޓީ ކައުންސިލަކީ ދީނީ ކަންކަމަށް ހާއްސަ އިސްކަމެއްދޭ ކައުންސިލެއް ކަމަށާއި ކީރިތި ގުރުއާން ކިޔެވުމުގެ މުބާރާތްތަކަށް ބޮޑު އަހަންމިއްޔަތުކަމެއް ދޭ ކަމަށެވެ.
ނަބީހާ އެކީ ސައުދީ މުބާރާތުގައި މުހައްމަދު ޔޫޝަޢު ބިން ޒަމްޒަމް ވެސް ވާދަކުރި އެވެ.