ބައެއް ކޯފް ސިރަޕް ބޭނުން ނުކުރުމަށް ފުޑް އެންޑް ޑްރަގް އޮތޯރިޓީން އިލްތިމާސް ކޮށްފިއެވެ.
ފުޑް އެންޑް ޑްރަގް އޮތޯރިޓީން ނެރެފައިވާ އެލާޓެއްގައި ބުނެފައިވަނީ އިންޑިއާގެ ހަރިޔާނާ ސްޓޭޓްގައި ހުންނަ Maiden Pharmaceuticals Limited އިން އުފައްދާ ކުޑަކުދިންނަށް ދޭ ކޯފް ސިރަޕްގައި ބޭސްތައް ތަގައްޔަރުވާފަދަ އެއްޗެއް ހިމެނިފައިވާ ކަމަށް ވޯލްޑް ހެލްތް އޮގަނައިޒޭޝަނަށް ރިޕޯޓް ކޮށްފައިވާ ކަމަށެވެ.
ފުޑް އެންޑް ޑްރަގް އޮތޯރިޓީން ބުނެފައިވަނީ މި ބޭސްތަކުގެ ބެޗްތަކުގެ ރައްކާތެރިކަން ކަށަވަރުނުވާތީ މިބޭސްތަކުގެ އެ ބެޗްތައް ބޭނުން ނުކުރުމަށް ޑަބްލިއު.އެޗް.އޯގެ އެލާޓްގައި ބުނެފައިވާކަމަށެވެ.
"މިބޭހަކީ ރާއްޖެއަށް އިމްޕޯޓް ކުރުމާއި ވިއްކުމަށް ހުއްދަ ކުރާ ބޭހުގެ ލިސްޓް (އެޕްރޫވްޑް ޑްރަގް ލިސްޓް)ގައި ހިމެނޭ ބޭހެއް ނޫން ނަމަވެސް، ބޭސްސިޓީއަށް ނުވަތަ އެނޫޏްވެސް ގޮތަކުން ރާއްޖެއަށް މިބޭސް އިމްޕޯޓް ވުމުގެ ފުރުސަތު އޮތްކަމަށް ވާތީ ، މިކަމަށް ސަމާލުވުމަށް ދެންނެވީމެވެ." ފުޑް އެންޑް ޑްރަގް އޮތޯރިޓީން ބުނެފައިވެއެވެ.
މީގެއިތުރުން ރައްކާތެރިކަމުގެ ފިޔަވަޅެއްގެ ގޮތުން ބޭސް ސިޓީއަށް ބޭސް އެތެރެކުރާއިރު ހާއްސަ ސަމާލުކަމެއް ދީގެން ޕޯޓްތަކުގައި ބަލައި ފާސްކުރަމުން ގެންދާނެކަމަށްވެސް ބުނެފައިވެއެވެ.